ދިވެހި ޕްރiމިއާ ލީގުގެ ފަހު ޖާގަ ޓީސީއަށް ލިބިއްޖެއެވެ.

ޓިސީއަށް ޕްރiމިއާ ލީގުން ޖާގަ ލިބުނީ މާލެ ލީގުގެ ފަހު މެޗް އެޓީމުން ކާމިޔާބުކޮށް 4 ވަނާގައި އޮއްވައި، އެޓީމާއި އެންމެ ވާދަވެރި އީގަލްސްއަށް 4 ވަނަ ޖާގަ ހޯދަން ލިބުނު ފުރުސަތު ނަގާލުމުންނެވެ. އީގަލްސްއަށް ފުރުސަތު ގެއްލުނީ އެޓީމް ކުޅުނު ފަހު މެޗުން ގްރީން ސްޓްރީޓް އަތުން ބަލި ވުމުނެންވެ. އެ މެޗް އެއްވަރު ކޮށްލައިގެންވެސް އެޓީމަށް ގަދަ ހަތަރެއް ކަށަވަރު ކުރުމުގެ ފުރުސަތު އޮތެވެ.

ބުދަ ދުވަހު ހަވީރު ގަލޮޅު ރަސްމީ ފުޓުބޯޅަ ދަނޑުގައި ގްރީން ސްޓްރީޓާއި އީގަލްސް ކުޅުނު މެޗް ގްރީންއިން ކާމިޔާބުކުރީ 1-0 ގެ ނަތީޖާއަކުންނެވެ. ވާދަވެރި ކުޅުމެއް ފެނިގެންދިޔަ މި މެޗުގައި ފެނިގެންދިޔަ ހަމައެކަނި ލަނޑު ގްރީންއިން ކާމިޔާބުކުރީ މެޗުގެ 5 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އަހުމަދު ނިޒާމެވެ.

އީގަލްސްއަށް ހިތި ނަތީޖާއެއް މި މެޗުން ލިބުނު ނަމަވެސް އެޓީމުން ވަނީ ގިނަ ފުރުސަތުތަކެއް ހޯދައި މޮޅު ކުޅުމެއް ދައްކާފައެވެ. އެގޮތުން މެޗުގައި ގިނަ ވަގުތު ބޯޅަ ހިފަހައްޓައި ގިނަ އެޓޭކްތަކެއް ކޮށްފައިވަނީވެސް އީގަލްސް އިންނެވެ. ނަމަވެސް މެޗުގެ ކުރީކޮޅުގައި ނެގި ލީޑާއި އެކު ގްރީން ސްޓްރީޓުން ވަނީ ވަރުގަދަ ޑިފެންސެއްކޮށް ލަނޑެއް ވަނަ ނުދީ ހިފަހައްޓާފައެވެ. ޙާއްސަކޮށް އެޓީމުގެ ގޯލް ކީޕަރު ޖުން ކޮޗީ ވަނީ މޮޅު ކުޅުމެއް ދައްކާފައެވެ. މެޗު މޮޅު ކުޅުންތެރިއަކަށްވެސް ހޮވުނީ ކޮޗީއެވެ.

މި ނަތީޖާއާއި އެކު އެސްޓީއޯ މާލެ ލީގުން ޕްރިމިއާ ލީގަށް ކޮލިފައި ވެފައިވަނީ މާޒިޔާ ސްޕޯޓްސް އެންޑް ރެކްރިއޭޝަނާއި، ނިއުރޭޑިއަންޓް ސްޕޯޓްސް ކުލަބާއި، މުޅިން އަލަށް ފުރަތަމަ ޑިވިޝަނަށް ކޮލިފައިވެ، ތަފާތު މޮޅު ކުޅުމެއް ދައްކާފައިވާ ކްލަބް ގްރީން ސްޓްރީޓާއި، ޓިސީ ސްޕޯޓްސް ކުލަބެވެ.

މާލެ ލީގުގެ ފަހު މެޗް ބުދަ ދުވަގެރޭ ކުޅޭއިރު މި މެޗުގައި ބައްދަލުކުރާނީ ލީގުގެ ތައްޓަށް ވާދަކުރަމުން އަންނަ ދެޓީމް ކަމަށްވާ މާޒިޔާ ސްޕޯޓްސް އެންޑް ރެކްރިއޭޝަން އާއި ނިއުރޭޑިއަންޓް ސްޕޯޓްސް ކުލަބެވެ. މި މެޗުން މޮޅުވާ ޓީމަކަށް މާލެ ލީގުގެ ޗެމްޕިއަންކަން ލިބޭއިރު، މެޗް އެއްވަރު ވެއްޖެނަމަ ޗެމްޕިއަންކަން ލިބޭނީ މާޒިޔާއަށެވެ.