އެސްޓީއޯ މާލެ ލީގުގެ ގަދަ ހަތަރަކަށް ވަނުމަށް މަސައްކަތް ކުރަމުން އަންނަ ޓީސީއަށް ފުރުސަތު ހަނިވެއްޖެއެވެ.

ޓިސީއަށް ގަދަ ހަތަރެއްގެ ފުރުސަތު ހަނިވީ އާދީއްތަ ދުވަހުގެ ރޭ ކްލަބް އީގަލްސް އާއި ދެކޮޅަށް ކުޅުނު މެޗް އެއްވަރުވެ ޕޮއިންޓަކުން ފުއްދާލަން ޖެހުމުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގައި ދެޓީމުގެ ފަރާތުންވެސް ފެނިގެން ގޮސްފައިވަނީ ވަރަށް ވާދަވެރި ކުޅުމެކެވެ. ހާއްސަކޮށް ފުރަތަމަ ހާފުގައި ދެޓީމުގެ ފަރާތުންވެސް ވަނީ ރަނގަޅު ކުޅުމެއް ފެނިގެން ގޮސްފައެވެ. އެގޮތުން ދެޓީމުންވެސް ދިޔައީ ފުރުސަތުތަށް ތަނަވަސްކޮށް ގޯލެއް ކާމިޔާބުކުރަން ބުރަކޮށް މަސައްކަތް ކުރަމުންނެވެ. ނަމަވެސް ފުރަތަމަ ހާފުގެ ކުޅުން ނިމުނީ ދެޓީމަށްވެސް ލަނޑެއް ނުޖެހި އެއްވަރުވެގެންނެވެ.

ދެވަނަ ހާފު ފެށިގެން ޓިސީގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ. އެގޮތުން އެޓީމުން ވަނީ ބޯޅަ ހިފަހައްޓައި ރީތި ގޭމެއް ކުޅުމަށް މަސައްކަތް ކޮށްފައެވެ. ނަމަވެސް ޓިސީއިން ފޯމުގައި ކުޅެމުންދިޔަ ދަނޑިވަޅުގައިވެސް އީގަލްސްއިން ދިޔައީ ކައުންޓާ އެޓޭކްތަކުގައި ޓީސީގެ ގޯލަށް ނުރައްކާކުރަމުންނެވެ.

ޓީސީއިން ފައިނަލެއްގެ ގޮތުގައި ދެކިގެން ކުޅެމުންދިޔަ މި މެޗުގެ ފަހު 10 މިނެޓުގައި އެޓީމުން ވަނީ ފުލުފުލުގައި ގިނަ ހަމަލާތަކެއް ފޮނުވާލާފައެވެ. ނަމަވެސް އެޓީމުން ފޮނުވާލި ގިނަ ހަމަލާތަކުގެ ހުރަހަކަށްވީ އީގަލްސްގެ ހުޝިޔާރު ގޯލްކީޕަރު ސުޖަން ޕެރޭރާއެވެ. އެގޮތުން އޭނާ ވަނީ ޓީސީ އިން ފޮނުވާލި ނުރައްކާތެރި ގިނަ ހަމަލާތަކެއް ދިފާއުކޮށްފައެވެ.

މެޗު އެއްވަރުވުމުން ޓިސީއަށް ވަނީ ގަދަ ހަތަރަކަށް ވަނުމުގެ އަމިއްލަ ބާރު ކެނޑިފައެވެ. ލީގުގައި ކޮންމެ ޓީމަކުންވެސް 12 މެޗު މިހާތަނަށް ކުޅެފައި ވާއިރު، ބާކީ ކޮންމެ ޓީމަކަށްވެސް ދެން އޮންނާނީ 2 މެޗެވެ. އެގޮތުން ޓިސީ މިހާތަނަށް ކުޅުނު 12 މެޗުން އެޓީމަށް ލިބިފައިވަނީ 16 ޕޮއިންޓެވެ. އެޓިމު އޮތީ ތާވަލުގެ 6 ވަނަ މަގާމުގައެވެ. އެޓީމާއި އެންމެ ވާދަވެރި ވިކްޓްރީ އޮތީ ކުޅުނު 12 މެޗުން 19 ޕޮއިންޓް ހޯދައިގެން 5 ވަނާގައެވެ. 4 ވަނާގައި އޮތީ ކުޅުނު 12 މެޗުން 21 ޕޮއިންޓް ހޯދައިގެން އީގަލްސް އެވެ. އީގަލްސް އާއި 3 ވަނާގައި އޮތް ގްރީން ސްޓްރީޓާއި އޮތީ ޕޮއިންޓުގެ ގޮތުން ހަމަހަމަވެފައެވެ.