ނަޝީދުގެ ތާރީޚީ ތަގުރީރު: މިއީ އިންސާފު ހޯދަން ގެނައި މަޖިލީހެއް
މެމްބަރުން އިންތިހާބު ކުރީ ނަޒާހަތްތެރި މަޖިލީހަކަށް ފެންބޮވައިގެންފައި ވަނިކޮށް
ރައްޔިތުންގެ މަޖިލީހުގެ ރިޔާސަތުގައި ރައީސް މުހައްމަދު ނަޝީދު
ނަވާރަ ވަނަ ރައްޔިތުންގެ މަޖިލީހަކީ އިންސާފު ހޯދުމަށް ރައްޔިތުން ހޮވި މަޖިލީހެއް ކަމަށް މަޖިލީހުގެ ރައީސް ކަމަށް އިންތިހާބުވެވަޑައިގެންނެވި، ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މެމްބަރުންގެ ތަނަވަސް އަގުލަބިއްޔަތަކުން، މަޖިލީހުގެ ރައީސް ކަމަށް އިންތިހާބުވެވަޑައިގަތުމަށްފަހު، ފުރަތަމަ ފަހަރަށް މަޖިލީހުގެ ރިޔާސަތާ ހަވާލުވެވަޑައިގެން ދެއްވި ތާރީޚީ ތަގުރީރުގައި ރައީސް ނަޝީދު ވިދާޅުވީ މެމްބަރުން އިންތިހާބުކޮށްފައި ވަނީ ނަޒާހަތްތެރި މަޖިލީހަކަށް ރައްޔިތުން "ފެންބޮވައިގެންފައި" ވަނިކޮށް ކަމަށެވެ.
ރައްޔިތުން އެދެނީ މެމްބަރުންގެ އިއްޒަތާއި ގަދަރު ހިފެހެއްޓެވުމަށް ކަމަށް ވިދާޅުވެ، ނަޝީދު ވިދާޅުވީ ރާއްޖޭގެ ގަދަރާއި އިއްޒަތް ގުޅިފައި ވަނީ މަޖިލީހުގެ މެމްބަރުންނާ ކަމަށެވެ.
އާ މަޖިލިސް އިންތިހާބުކޮށްފައި ވަނީ އެމަނިކުފާނު ވިދާޅުވި ގޮތުގައި ޝަރުއީ ނިޒާމު އިސްލާހު ކުރުމަށް ރާއްޖޭގެ ރައްޔިތުން އެދެމުންދިޔަ ދަނޑިވަޅެއްގަ އެވެ.
އަންގާރަ ދުވަހުގެ ރޭ ދަންވަރު 12:41ގައި މަޖިލީހުގެ ރިޔާސަތާ ހަވާލުވެވަޑައިގެން ދެއްކެވި ވާހަކަފުޅުގައި ނަޝީދު ވިދާޅުވީ މެމްބަރުންގެ ކިބައިން ރައްޔިތުން އެދެނީ ތަނަވަސް ދިރިއުޅުމެއް ކަމަށާއި މަޖިލީހުގެ މަސައްކަތަކަށް ވެސް ވާނީ އެކަން ކުރުން ކަމަށެވެ.
ނިމިދިޔަ 18 ވަނަ ރައްޔިތުންގެ މަޖިލީހުގެ ރައީސް ކަަން ކުރެއްވި ގާސިމް އިބްރާހިމާއި އަބްދުﷲ މަސީހާއި ނައިބު ރައީސްކަން ކުރެއްވި މޫސާ މަނިކަށް ޝުކުރު އަދާ ކުރައްވައި ނަޝީދު ވިދާޅުވީ ގާސިމް މަޖިލިހުގެ ރިޔާސަތު ބެލެހެއްޓެވީ ފުރިހަމައަށް ކަމަށެވެ.
އާ މަޖިލީހުގައި 65 މެމްބަރުންނާއެކު އެމްޑީޕިގެ ސުޕަރ މެޖޯރިޓީ އޮތް ނަމަވެސް، އެ މަނިކުފާނުގެ ރިޔާސަތުގައި އާ މަޖިލީހުގައި ހިމެނޭ ހުރިހާ ޕާޓީތަކުގެ މެމްބަރުންގެ ހިޔާލުފާޅު ކުރުމަށް އެންމެ މަތީ ދަރަޖައިގައި ފުރުސަތު ދެއްވާނެ ކަމަށް ނަޝީދު ވިދާޅުވި އެވެ.
ރައްޔިތުންގެ މަޖިލީހަކީ ދައުލަތުގެ މުއައްސަސާތަކުގެ ތެރެއިން ސިފައިންގެ ފިޔަވައި، އެންމެ ގިނަ ދުވަސްވީ މުއައްސަސާކަން ފާހަގަ ކުރައްވައި ނަޝީދު ވިދާޅުވީ ރައްޔިތުންގެ މަޖިލީހަކީ ރައްޔިތުންގެ އެންމެ މަތީގެ ކަމަށެވެ.
ނަޝީދުގެ ރިޔާސަތުގެ ދަށުން ބާއްވާ ރައްޔިތުންގެ މަޖިލީހުގެ ފުރަތަމަ ޖަލްސާ ބުދަ ދުވަހު ބާއްވާނެ އެވެ.
ނަޝީދު ވެވަޑައިގެންފައި ވަނީ، ރާއްޖޭގެ ރައީސުލްޖުމްހޫރިއްޔާކަން ކުރެއްވި ބޭފުޅުންގެ ތެރެއިން މަޖިލީހުގެ މެމްބަރުކަމާއި، މަޖިލީހުގެ ރައީސްކަން ވެސް ކުރައްވާ ފުރަތަމަ ބޭފުޅާއަށެވެ. ނަވާރަ ވަނަ މަޖިލީހުގެ މައްޗަންގޮޅީ މެދު ދާއިރާގެ މެމްބަރަކަށް ނަޝީދު އިންތިޚާބު ވެވަޑައިގެންފައިވާއިރު، އެންމެ ފުރަތަމަ އެ މަނިކުފާނު މަޖިލީހަށް އިންތިޚާބު ވެވަޑައިގަތީ 1999 ވަނަ އަހަރު މާލޭގެ މެމްބަރެއްގެ ގޮތުގަ އެވެ. ނަމަވެސް އެ ފަހަރު ދައުރު ފުރިހަމަ ނުކުރެއްވުނީ ވެލާނާގެއިން ވައްކަން ކުރި ކަމަށް ތުހްމަތުކޮށް ކުރި "ސިޔާސީ ދައުވާ" ސާބިތުކޮށް އަރުވާލުމުންނެވެ.
