ނަޝީދު މަޖިލީހުގެ ރައީސް ކަމަށް އިންތިޚާބު ކޮށްފި
28 މެއި 2019 | އަންގާރަ 18:58ނަޝީދުގެ ނަންފުޅު ހުށަހެޅުއްވީ ހިތަދޫ އުތުރު ދާއިރާގެ މެމްބަރު އަސްލަމް
ކުރީގެ ރައީސް މުހައްމަދު ނަޝީދު
ކުރީގެ ރައީސް އަދި މައްޗަންގޯޅި މެދު ދާއިރާގެ މެމްބަރު މުހައްމަދު ނަޝީދު މަޖިލީހުގެ ރައީސް ކަމަށް އިންތިޚާބު ކޮށްފިއެވެ.
ނަޝީދު މަޖިލިސް ރައީސް ކަމަށް އިންތިޚާބު ކުރަން ފެންނަ ކަމަށް ވޯޓު ދެއްވީ 67 މެމްބަރުންނެވެ. އަދި ވޯޓުގައި ބައިވެރިވެޑައިގެންނެވީ 85 މެމްބަރުންނެވެ. އަދި ގާސިމްއަށް ލިބިވަޑައިގަތީ 17 ވޯޓެވެ. ބާތިލް ވޯޓުގެ އަދަދަކީ އެކެކެވެ.
މަޖިލީހުގެ ރައީސް ކަމަށް ނަޝީދުގެ ނަންފުޅު ހުށަހެޅުއްވީ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމްއެވެ. އަދި ތާއީދު ކުރެއްވީ މެދު ހެންވޭރު ދާއިރާގެ މެމްބަރު އަލީ އާޒިމްއެވެ.
ނަޝީދު ރައީސް ކަމަށް އިންތިޚާބު ކުރެއްވިއިރު މަޖިލީހުގެ ރައީސް ކަމަށް ގާސިމް އިބުރާހިމްގެ ނަންފުޅު ވެސް ހުށަހެޅުނެވެ. ގާސިންގެ ނަންފުޅު ހުށަހެޅުއްވީ މަހިބަދޫ ދާއިރާގެ މެމްބަރު އަހުމަދު ތޯރިގެވެ. އަދި ތާއީދު ކުރެއްވީ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފްއެވެ.
19 ވަނަ ރައްޔިތުންގެ މަޖިލީހުގެ ރައީސް ކަމަށް ނަޝީދު އިންތިޚާބު ކުރެއްވިއިރު ނަޝީދަކީ ކުރިން މާލޭގެ މެމްބަރުކަން ކުރެއްވި ބޭފުޅެކެވެ.
