ނަޒާހަތްތެރި މަޖިލީހެއް ހޯދުމަށްޓަކައި 19 ވަނަ މަޖިލީހުގެ ސްޕަރ މެޖޯރިޓީ، ވެރިކަންކުރާ އެމްޑީޕީއަށް ރައްޔިތުން ދީފައިވާއިރު، މަޖިލީހުގެ ރައީސް ކަނޑައެޅުމުގައި ޕާޓީތެރޭގައި އުފެދިފައިވާ ހިޔާލު ތަފާތުވުން ގޯހުން ގޯހަށް ވަނީ ގޮސްފަ އެވެ.

އާ މަޖިލީހުގެ ރައީސްކަމުގެ މަގާމަށް އެމްޑީޕީގެ ފަސް ބޭފުޅެއްގެ ޝައުގުވެރިކަން ހުރިއިރު، އެމްޑީޕީގެ ރައީސް އަދި ރާއްޖޭގެ ފުރަތަމަ ޑިމޮކްރެޓިކް ރައީސް މުހައްމަދު ނަޝީދުގެ ތާއީދު އޮތީ، ހިތަދޫ އުތުރު ދާއިރާގެ މެމްބަރު އަސްލަމަށެވެ. ނަމަވެސް، އެމްޑީޕީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހްގެ ތާއީދު އޮތީ ވިލުފުށީ ދާއިރާގެ އިންތިޚާބީ މެމްބަރު ހަސަން އަފީފަށެވެ.

އަފީފާއި އަސްލަމްގެ އިތުރުން އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އާއި، މެދުހެންވޭރު ދާއިރާގެ މެމްބަރު އަލީ އާޒިމް އަދި މަރަދޫ ދާއިރާގެ މެމްބަރު އިބްރާހިމް ޝަރީފް ވެސް މަޖިލީހުގެ ރައީސް ކަމަށް ޝައުގުވެރިކަން ފާޅުކުރައްވާފައިވެ އެވެ.

މަޖިލީހުގެ ރައީސް ހޮވުމުގައި ޕާޓީގެ އެންމެ މަތީ ފަށަލައިން އުފެދުނު ހިޔާލު ތަފާތުވުން، މަޖިލީހުގެ މެމްބަރުންނާއި ޕާޓީގެ ގައުމީ މަޖިލީހާއި އަދި އާންމު މެމްބަރުންގެ މެދުގައި ވެސް އެބަ އޮތެވެ. ރައީސް ނަޝީދުގެ ހާޑްކޯ ސަޕޯޓަރުން ފާޅުގައި އަސްލަމަށް ތާއީދު ކުރައްވަމުން ގެންދަވާއިރު، ރައީސް ސޯލިހްގެ ބަސް ގަބޫލްކުރެއްވި ބޭފުޅުންނާއި ސަޕޯޓަރުން ގެންދަވަނީ އަފީފަށް ތާއީދު ކުރައްވަމުންނެވެ.

ރާއްޖޭގައި އޮތް އެންމެ ބޮޑު ސިޔާސީ ޕާޓީގެ ތެރޭގައި އުފެދިފައިވާ މި ހިޔާލު ތަފާތުވުމަކީ ޕާޓީގެ މުއްސަނދިކަން ކަމަށް ބައެއް ބޭފުޅުން ވިދާޅުވަމުން ދިޔަ ނަމަވެސް، ފާޅުކުރައްވަމުން ގެންދަވާ ބައެއް ހިޔާލުފުތަކާއި ދައްކަވަމުންދާ ބައެއް ވާހަކަތައް ހުރީ ވަރަށް ދަށު ދަރަޖައެއްގަ އެވެ. އެއްބަޔަކު އަނެއް ބަޔަކު، "އޮރިޔާންކޮށް"، ހިތުހުރި އެއްޗެއް ގޮވަމުން އެބަ އެވެ.

މައްސަލައަކީ ދެ ރައީސުން މަޝްވަރާ ނުކުރެއްވުން

މައްސަލައަކަށް ވެގެން މި އުޅެނީ އަފީފެއް، އަސްލަމެއް ނޫނެވެ. މައްސަލައަކަށް ވެފައި ވަނީ ދެ ރައީސުން މަޝްވަރާާ ނުކުރެއްވުމެވެ. އަސްލަމްއަށް ތާއިދުކުރައްވާކަން ނަޝީދު ހާމަކުރެއްވިއިރު، ރައީސް ސޯލިހް އެއްވެސް ބޭފުޅަކަށް ތާއީދު ކުރައްވާފައެއް ނެތެވެ. އެހެންވެ، މަޖިލީހުގެ މެމްބަރުން އެދިވަޑައިގަންނަމުން ގެންދެވީ ރައީސް ސޯލިހްގެ ވިސްނުން ފުޅަކަށެވެ.

ރައީސް ސޯލިހްގެ ވިސްނުންފުޅުގައި މަޖިލީހުގެ ރައީސަކަށް އެންމެ ރަނގަޅީ އަފީފު ކަމަށް ވިދާޅުވެފައިވާއިރު، އަސްލަމް ވެސް ވިދާޅުވަނީ ރައީސް ސޯލިހްގެ ފުރިހަމަ އިތުބާރު އޭނާ އަށް އެބަ އޮތް ކަމަށެވެ. މި މައްސަލައިގައި "ބަނދެވިފައިވަނީ" މަޖިލީހުގެ މެމްބަރުންނެވެ. މިކަމަށް ހައްލެއް ހޯއްދެވުމަށް ބައެއް މެމްބަރުން ވެސް ދެ ރައީސުންގެ އަރިހުގައި ވެސް އެދިވަޑައިގަންނަވަމުން ދިޔައެވެ. ނަމަވެސް ހައްލެއް ނުހޯއްދެވުނެވެ.

އެމްޑީޕީގެ ބިޔަ ޕާލިމެންޓްރީ ގްރޫޕްގެ މިރޭ ބައްދަލުވުމުގައި މަޖިލީހުގެ ރައީސްއަކަށް ހުށަހަޅާނެ ބޭފުޅަކު ކަނޑައަޅާއިރު، ހިޔާލު އެއްގޮތް ކުރުމަށް ދެން ވަގުތެއް ނެތެވެ. މި ހިސާބަށް ދިޔައީ ރައީސް ނަޝީދު ވެސް، އަދި ރައީސް ސޯލިހް ވެސް މަޝްވަރާ އިސް ނުކުރެއްވުމުންނެވެ. ދެ ބޭފުޅުން ވެސް، މަޝްވަރާ އިސް ކުރައްވާނީ ކޮންބޭފުޅަކުތޯ ބައްލަވަން ހުންނެވުމުންނެވެ.

ޕާލިމެންޓްރީ ގްރޫޕުން ހޮވޭނީ ކާކު؟

އުފެދުނު ވާދަވެރިކަމުގައި ދާއިރާގެ ތަރައްގީ އާއި މަޖިލީހުގެ ރައީސްގެ ވޯޓާ ވެސް ގުޅުވައިފި އެވެ. ބައެއް މެމްބަރުންނަށް ގަބޫލް ކުރެއްވިފައިވާ ގޮތުގައި އަސްލަމަށް ތާއިދު ކުރެއްވުމަކީ ދާއިރާގެ ތަރައްގީ ހުއްޓިގެން މަޑުޖެހިގެން ގޮސްދާނެ ކަމެކެވެ. މިކަމާ އެމްޑީޕީގެ އިސް ބައެއް ބޭފުޅުންގެ ހިތްހަމަ ނުޖެހުން ވެސް އެބަ ހުއްޓެވެ.

އެއްވެސް ބަޔަކު މާބޮޑަށް ދައްކަން ބޭނުންނުވާ އެހެން ވާހަކައެއް ވެސް އެބަ އޮތެވެ. ސަރުކާރުގައި ތިއްބެވި ބައެއް ފަރާތްތަކުން ގަބޫލް ކުރައްވާ ގޮތުގައި ޖަވާބުދާރީ ކުރުވުމަށް ވުރެ ބޮޑަށް ސަރުކާރު "ހިންގާނީ" މަޖިލީހުގެ ތެރެއިން ކަމަށް ހެދުމަށް އެމްޑީޕީގެ ބައެއް ފަރާތްތަކުގެ ވިސްނުންފުޅު އެބަ ހުއްޓެވެ. އެކަމާ އެ ބޭފުޅުން ހިތްހަމަޖެހިވަޑައެއް ނުގަންނަވަ އެވެ.

ރައީސް ނަޝީދަށް ތާއީދު ކުރައްވާ ބައެއް ބޭފުޅުން ގަބޫލުކުރައްވާ ގޮތުގައި ބައިބައިވުން ބޮޑުވެގެން ދިޔައީ ސަރުކާރުގައި ތިއްބެވި ބައެއް ބޭފުޅުންގެ ސަބަބުންނެވެ.

މި ހިސާބަށް ދިޔައީ ވެސް ދެ ރައީސުން މައްސަލަ ހައްލުކުރަން މަޝްވަރާ ނުކުރެއްވުމުންނެވެ. ހަގީގަތުގައި ވެސް މިއީ ލީޑަރޝިޕްގެ ވަރަށް ބޮޑު ފެއިލްވުމެކެވެ. ދެން އޮތީ މިރޭގެ ވޯޓެވެ. ވޯޓްގެ ނަތީޖާއަށް ގިނަ ބަޔަކު އިންތިޒާރުކުރާއިރު، ކޮންމެ ގޮތަކަށް ނަތީޖާ ނުކުތަސް ޕާޓީގެ މަސްލަހަތު އިސްކުރުމަކީ މުހިންމު ކަމެކެވެ. އެހެން ނޫނީ ނަޒާހަތްތެރި މަޖިލީހެއް ވެސް ނުލިބޭނެ އެވެ. ރައްޔިތުންގެ އުއްމީދު ވެސް ހާސިލެއް ނުވާނެ އެވެ.