ބިދޭސީން ގަވާއިދާ ހިލާފަށް މަސައްކަތް ކުރަނީ އެ މީހުން ގެންނަ މީހާގެ އިހުމާލުން: ތޮލާލް
23 މެއި 2019 | ބުރާސްފަތި 03:43މުސާރައަށް ފަރުވާ ކުޑަކުރާ ހިސާބުން އެމައްސަލަ ބިދޭސީން ހުށަހަޅާ
ޓްރާންސްޕޭރެންސީ މޯލްޑިވްސްގެ ސީނިއަރ ޕްރޮޖެކްޓް ކޯޑިނޭޓަރ ތޮލާލް
ރާއްޖޭގައި އުޅޭ ގިނަ ބިދޭސީން ގަވާއިދާ ހިލާފަށް މަސައްކަތް ކުރަމުން ގެންދަނީ އެ މީހުން ގެންނަ މީހާގެ އިހުމާލުން ކަމަށް ޓްރާންސްޕޭރެންސީ މޯލްޑިވްސްގެ ސީނިއަރ ޕްރޮޖެކްޓް ކޯޑިނޭޓަރ އަހުމަދު ތޮލާލް ވިދާޅުވެއްޖެއެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަ ދައްކަވަމުން ތޮލާލް ވިދާޅުވީ ގަވާއިދާ ހިލާފަށް ނުވަތަ ފިލައިގެން އުޅޭ ކޮންމެ ބިދޭސީއަކީ ހިއުމަން ޓްރެފިކިން ޝިކާރައަކަށް ވެފައި ތިބި މީހުން ނޫން ކަމަށެވެ. އޭގެ ތެރޭގައި އެކި މީހުންނަށް ދިމާވަނީ އެކި ހާލަތްތައް ކަމަށް އޭނާ ވިދާޅުވިއެވެ.
ތޮލާލް ވިދާޅުވީ ޓްރާންސްޕޭރަންސީގެ ފަރާތުން ބިދޭސީ މަސައްކަތްތެރިންނަށް އެގާނޫނީ އެހީތެރިކަން ފޯރުކޮށްދެވޭ ކަމަށާއި، ގިނަ ފަހަރު ބިދޭސީ މަސައްކަތްތެރިން ގާނޫނާ ހިލާފަށް އުޅެން މަޖުބޫރު ކުރުވަނީ އެ މީހުން ގެންނަ ފަރާތްތަކުގެ އިހުމާލުން ކަމަށެވެ.
ތޮލާލު ވިދާޅުވީ މުސާރައަށް ފަރުވާ ކުޑަކުރާ ހިސާބުން ބިދޭސީ މީހާ އެ މައްސަލަ ހުށަހަޅާ ކަމަށާއި، ނަމަވެސް އެމައްސަލަ ނުބަލާ ކަމަށެވެ. އޭނާ ވިދާޅުވީ ގަވާއިދާ ހިލާފަށް އެ މީހުން ދިރިއުޅެން ޖެހޭ ސަބަބުން ދެނެގަންނަން ޖެހޭ ކަމަށާއި، އެކަމުގައި އެ މީހުން ގެންނަ ފަރާތްތައް ވާއިހުމާލަށް ވެސް ފިޔަވަޅު އަޅަން ޖެހޭ ކަމަށެވެ.
ތޮލާލް ވިދާޅުވީ ރާއްޖޭގެ އިގްތިސާދު މިގޮތުގައި ދެމި މިއޮންނަނީ ބިދޭސީ މަސައްކަތްތެރިންނާ ހުރެ ކަމަށެވެ. އަދި ވިދާޅުވީ އެ މީހުންގެ އަދަދު މަދުކުރާ ނަމަ އެއަށް އެޑްރެސް ކުރަންޖެހޭނީ އިގްތިސާދީ ނަޒަރަކުން ކަމަށެވެ.
