އަންނަ ސީޒަނުގައި ރެއާލް މެޑްރިޑް ތަފާތުވާނެ ކަމަށް އެ ކްލަބަށް ކުޅެމުން އަންނަ ބްރެޒިލްގެ ޑިފެންޑަރ މާސެލޯ ބުނެފިއެވެ.

ބެއިން ސްޕޯޓްއަށް ދިން އިންޓަވިއުއެއްގައި މާސެލޯ ބުނީ، ރެއާލްއިން ބޭނުންވަނީ ތަށިތައް ކާމިޔާބުކުރަން ކަމަށާއި، ކުޅުންތެރިން މި ސީޒަނުގައި އެކަމަށް ވަރަށް މަސައްކަތް ކުރި ކަމަށެވެ.

ނަމަވެސް މާސެލޯ ބުނީ، ރެއާލުން މި ސީޒަން ނިންމާލަން ޖެހުނީ ނިންމާލީ މާޔޫސްކަމާއެކުގައި ކަމަށާއި، އެއީ އެއްގޮތަކަށް ވެސް ބޭނުންވި ކަމެއް ނޫން ކަމަށެވެ.

އެގޮތުން މާސެލޯ ބުނީ، ކުރިޔަށް އޮތް ސީޒަނުގައި ރެއާލް އެނބުރި އަންނާނެ ކަމަށާއި، ރެއާލް އަންނާނީ އާ އަޒުމާއެކުގައި ކަމަށެވެ. އަދި މި ސީޒަނުގައި ހެދި ގޯސްތައް އަންނަ ސީޒަނުގައި ތަކުރާރުނުވާގޮތަށް ކަންކަން ބައްޓަން ކުރަންޖެހޭ ކަމަށް ވެސް އޭނާ ވަނީ ބުނެފައެވެ.

މާސެލޯ މިހެން ބުނެފައިވާއިރު، ރެއާލުން އަންނަނީ ކުރިޔަށް އޮތް ސީޒަނަށް އެޓީމު ވަރުގަދަކުރުމުގެ ގޮތުން ކުޅުންތެރިން ހޯދުމުގެ މަސައްކަތް ކުރަމުންނެވެ. އަދި އެޓީމުން އަންނަނީ ކުޅުންތެރިންގެ އެއްބަސްވުންތައްވެސް އާކުރަމުންނެވެ.

މި ސީޒަނުގައި ރެއާލްއަށް ލީގުގެ ތިންވަނަ ލިބުނުއިރު، އެޓީމު ވަނީ ލީގުގައި ކުޅުނު 38 މެޗުގެ ތެރެއިން 12 މެޗުން ބަލިވެފައެވެ. ބާކީ 21 މެޗުން އެޓީމު މޮޅުވިއިރު، ފަސް މެޗުން ވަނީ އެއްވަރުވެފައެވެ.

މި ސީޒަނުގެ ޔުއެފާ ޗެމްޕިއަންސް ލީގުގެ ގަދަ 16 އިން އަޔަކްސް އަތުން ރެއާލް ކަޓާފައިވާއިރު، ކޮޕަޑެލްރޭގެ ސެމީގައި ބާސާ އަތުން ރެއާލް ވަނީ ކަޓާފައެވެ.