ރައީސްކަމަށް ކުރިމަތި ނުލާ ނަމަ އިނގިރޭސިވިލާތުގެ ރައްޔިތުކަން ދޫކޮށް ނުލާނަން: ގޯޓާބޭ ރާޖަޕަކްސަ

ސްރީ ލަންކާގެ ރައީސް ކަމަށް ކުރިމަތި ނުލައްވާ ނަމަ އިނގިރޭސި ވިލާތުގެ ރައްޔިތުކަން ދޫކޮށް ނުލައްވާނެ ކަމަށް ލަންކާގެ ކުރީގެ ޑިފެންސް ސެކްޓްރީ ގޯޓާބޭ ރާޖަޕަކްސަ ވިދާޅުވެއްޖެއެވެ.

ގޯޓާބޭ އަލްޖަޒީރާ އަށް ދެއްވި އިންޓަވިއުއެއްގައި ވިދާޅުވީ އޭނާ ލަންކާގެ ރައީސްކަމަށް ކުރިމަތިލައްވަން ނިންމަވާފައިވާ ކަމަށާއި ރައީސް ކަމަށް ކުރިމަތިލައްވަން ކުރީއްސުރެ ނިންމާފައިވާ ކަމަށެވެ. އަދި އޭނާ އިނގިރޭސިވިލާތުގެ ރައްޔިތުކަން ދޫކޮށްލެއްވީ އެ ސަބަބާ ހެދި ކަމަށް ވިދާޅުވިއެވެ.

ގޯޓާބޭ ވަނީ އެމެރިކާގެ ރައްޔިތުކަން ދޫކޮށްލުމަށް މިދިޔަ މާޗް މަހުގެ ތެރޭގައި ފޯމު ހުށައަޅާފައެވެ. އޭގެ ކުރިން އޭނާއަކީ ލަންކާ-އެމެރިކާގެ ރައްޔިތެކެވެ. ލަންކާގެ ގާނޫނު ބުނާ ގޮތުން އެ ގައުމުގެ ރައީސަކަށް ދެ ގައުމުގެ ރައްޔިތަކަން ހޯދާފައިވާ މީހަކަށް ނުވެވޭނެއެވެ.

ލަންކާގެ ކުރީގެ ރައީސް މަހިންދަ ރާޖަޕަކްސާގެ ކޮއްކޯފުޅު ގޯޓާބޭ ރާޖަޕަކްސާ ވަނީ ލަންކާގައި ދިގުދެމިގެންދިޔަ ދާޚިލީ ހަނގުރާމަ ނިމުމަކަށް ގެނައުމަށް އިސް ދައުރެއް އަދާކުރައްވާފައެވެ. އޭނާ އަށް ވަނީ ތަފާތު އެކި ޖިނާއީ ތުހުމަތުތަކެއް ކުރެވިފައެވެ. އެގޮތުން 2009 ވަނަ އަހަރު މަރާލި ލަންކާގެ ނޫސްވެރިޔާ ލަސަންތަ ވިކްރަމަތުންގެ މަރާލުމުގައި ގޯޓާބޭގެ އަތެއް ވާކަމުގެ ތުހުމަތުތަކެއް ވަނީ ކުރެވިފައެވެ. ލަންކާގެ ކްރިމިނަލް އިންވެސްޓިގޭޝަން ޑިޕާޓްމެންޓުން ވެސް ވަނީ ލަސަންތަ މަރާލި ކަމުގެ ތުހުމަތު ކުރެވޭ ސިއްރު ޔުނިޓަކީ ގޯޓާބޭގެ އޯޑަރަށް އަމަލުކުރަމުން ދިޔަ ޔުނިޓެއް ކަމަށް ބުނެފައެވެ.

ލަސަންތަ މަރާލާފައި ވަނީ 2009 ވަނަ އަހަރުގެ ޑިސެމްބަރު މަހުގެ 8 ވަނަ ދުވަހުގެ ރޭ އޭނާ މަސައްކަތް ކުރަމުންދިޔަ ނޫސް އެޖެންސީ" ދަ ސަންޑޭ ލީޑަރ"އަށް ދަނިކޮށް ހަތަރު މީހުންގެ ގުރޫޕަކުން ހަމަލާދީ ލިބުނު ޒަޚަމްތަކަށް ފަރުވާ ދެމުންދަނިކޮށް ހޮސްޕިޓަލުގައެވެ.

މީގެ އިތުރުން ބޭބޭފުޅު މަހިންދަ ރާޖަޕަކްސާގެ ވެރިކަމުގައި އެތައް ބަޔަކު މަރާލި ކަމުގެ ތުހުމަތުތަކެއް ވެސް ގޯޓާބޭގެ މައްޗަށް ކުރެވެއެވެ. އެކަމަކު އެތުހުމަތުތަކަށް ގޯޓާބޭ އިންކާރު ކުރެއެވެ.

ލަންކާގެ ރައީސަކު ހޮވުމަށް ބާއްވާ އިންތިޚާބު އަންނަ ޑިސެމްބަރު މަހުގެ ނުވަ ވަނަ ދުވަހުގެ ކުރިން ބާއްވަން ޖެހެއެވެ.