މި ސީޒަނަށް ފަހު ނަވާސް ރެއާލް ދޫކޮށްލަނީ

މި ސީޒަނަށް ފަހު ރެއާލް މެޑްރިޑަށް ކުޅެމުން އަންނަ ކޭލޯ ނަވާސް އެ ކްލަބް ދޫކޮށްލާނެ ކަމަށް ރިޕޯޓްތައް ބުނެފިއެވެ.

ސްޕެއިންގެ ނޫސްތަކުން ބުނާގޮތުން އާލްގެ ފުރަތަމަ 11 އިން ފުރުސަތު ނުލިބޭތީ ނަވާސް ހުރީ ހިތްހަމަ ނުޖެހިފައި ކަމަށާއި، އޭނާ ބޭނުންވަނީ ފުރަތަމަ 11 އިން ޖާގަ ލިބޭ ކްލަބަކަށް ބަދަލުވާން ކަމަށް ބުންޏެވެ.

މިކަމާ ގުޅިގެން ރެއާލް އަދި ނަވާސް ވެސް އެއްވެސް އެއެއްޗެއް ބުނެފައެއް ނުވެއެވެ. އެހެން ނަމަވެސް ފުރަތަމަ 11 އިން ފުރުސަތު ނުލިބޭތީ ހިތްހަމަ ނުޖެހޭ ކަމަށް ނަވާސް މީގެކުރިން ވަނީ ބުނެފައެވެ.

ރިޕޯޓްތައް ބުނާގޮތުން ނަވާސް ހިތްހަމަ ނުޖެހިފައި ހުރީ ރެއާލް އަށް ޗެލްސީގެ ކުރީގެ ކީޕަރު ތިބޯޓް ކޯޓުއާ ގުޅުނު ހިސާބުންނެވެ. ކޯޓުއާ ކްލަބާ ގުޅުނު ހިސާބުން ފެށިގެން ނަވާސް އަށް ފުރަތަމަ 11 އިން ފުރުސަތު ލިބެނީ ވަރަށް މަދުންނެވެ.

މި ސީޒަނުގައި ރެއާލް އަށް ނަވާސް ކުޅެފައިވަނީ މިހާތަނަށް 20 މެޗެވެ. ކޯޓުއާ ވަނީ ރެއާލްއާ ގުޅި މިހާތަނަށް އެޓީމަށް މި ސީޒަނުގައި 35 މެޗު ކުޅެދީފައެވެ.

އުމުރުން 31 އަހަރުގެ ނަވާސް ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުން ކަމަށް ރިޕޯޓްތައް ބުނާއިރު، އޭގެ ތެރޭގައި ޔުވަންޓަސް ވެސް ހިމެނޭ ކަމަށް ބައެއް ރިޕޯޓްތައް ބުނެއެވެ. އޭނާ ރެއާލްއާއެކު ހަދާފައިވާ އެއްބަސްވުން ހަމަވާނީ 2020 ގައެވެ.

ލެވެންޓޭ ދޫކޮށްލުމަށް ފަހު ނަވާސް ރެއާލް އަށް ބަދަލުވީ 2014 ވަނަ އަހަރުގެ ސީޒަނުގައެވެ. އެގޮތުން އޭނާ ވަނީ މިހާތަނަށް އެޓީމަށް 161 މެޗު ކުޅެ، އެޓީމާއެކު ސްޕެނިޝް ލަލީގާ، ސްޕެނިޝް ސުޕާ ކަޕް، ޔުއެފާ ޗެމްޕިއަންސް ލީގު ތިންފަހަރު، ޔުއެފާ ސުޕާ ކަޕް ދެފަހަރު އަދި ކްލަބް ވޯލްޑް ކަޕް ތިން ފަހަރު ހޯދާފައެވެ.

ބްރެޒިލްގައި 2014 ވަނަ އަހަރު ބޭއްވި ވޯލްޑްކަޕުން ވިދާލި ކޮސްޓަރިގާ ގައުމީ ޓީމުގެ ނަވާސް ވަނީ އެޓީމަށް މިވީތަނަށް 83 މެޗު ކުޅެދީފައެވެ. އޭނާ ވަނީ 2014 ވަނަ އަހަރު ކޮންކާކަފްގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފައެވެ.