މުލަކާއި ކޮޅުފުށީގެ ރަށްގިރުމުގެ މައްސަލައަށް ރައީސްގެ ސަމާލުކަމަށް ގެނެސްފި
15 މެއި 2019 | ބުދަ 08:36ރަށުގެ ޒުވާނުންނަށް ރަށާއި ކައިރިން ވަޒީފާ ލިބުމަށް މަގުފަހިކޮށްދެއްވުމަށް ކައުންސިލުން ވަނީ އެދިފައި
ރައީސް ސޯލިހު މުލަކު އަތޮޅު ކައުންސިލް މެމްބަރުންނާ އެކު
މ. އަތޮޅު ދިއްގަރާއި، މުލަކާއި ކޮޅުފުއްޓަށް ދިމާވެފައިވާ ރަށްގިރުމުގެ މައްސަލަ ރައީސުލްޖުމްހޫރީއްޔާ އިބްރާހީމް މުޙައްމަދު ސޯލިހުގެ ސަމާލު ކަމަށް ގެނެސްފިއެވެ.
ރައީސްގެ ސަމާލުކަމަށް އެެކަން ގެނައީ މުލަކު އަތޮޅު ކައުންސިލުން ރައީސް ސޯލިހުއާ އެކު ބޭއްވި ބައްދަލުވުމުގައެވެ. އޭގެ އިތުރުން ނާލާފުށީގެ ބަނދަރު ފުންކޮށްދެއްވުމަށް ވެސް މެންބަރުން ވަނީ ރައީސު އަރިހުން އެދިވަޑައިގެންފައެވެ.
ފަތުރުވެރިކަމުގެ ސިނާއަތް ތަރައްގީކޮށް ރަށުގެ ޒުވާނުންނަށް ރަށާއި ކައިރިން ވަޒީފާ ލިބުމަށް މަގުފަހިކޮށްދެއްވުމަށާއި، ރަށަށް ކުރިމަތިވެފައިވާ ގެދޮރުގެ ދަތިކަން ފާހަގަކުރައްވައި އެކަމަށް ހައްލެއް ހޯއްދަވައިދެއްވުމަށް ކައުންސިލުގެ މެންބަރުން އެދިވަޑައިގެންނެވިއެވެ.
އެބައްދަލުވުމުގައި ރައީސް ސޯލިހު ވިދާޅުވީ، ކައުންސިލުން އެދިވަޑައިގެންފައިވާ ކަންކަމުގައި ކަމާގުޅޭ މިނިސްޓްރީތަކާ އެކު މަޝްވަރާކުރައްވައިގެން އެކަންކަމަށް ހައްލެއް ހޯއްދަވައިދެއްވަން މަސައްކަތްޕުޅު ކޮށްދެއްވާނެ ކަމަށެވެ. އަދި ފަތުރުވެރިކަމުގެ ސިނާއަތް ގާއިމުވެފައި ނެތް ސަރަހައްދު ތަކުގައި ފަތުރުވެރިކަމުގެ ވިޔަފާރި ތަރައްގީކުރުމަށް ހާއްސަ އިސްކަމެއް ދެއްވައިގެން މަސައްކަތް ކޮށްދެއްވާނެކަމުގައި ވެސް ރައީސް ވިދާޅުވިއެވެ.
