ދިޕިކާ އާއި ރަންވީރު އަނެއްކާ ވެސް އެކުގައި ފިލްމަކުން
14 މެއި 2019 | އަންގާރަ 15:52މި ފިލްމްގައި ރަންވީރު ފެނިގެންދާނީ އިންޑިއާގެ ކުރިކެޓް ޓީމްގެ ކުރީގެ ކެޕްޓަން ކަޕިލް ދޭވްގެ ރޯލުން
ދިޕިކާ ޕަދުކޯން އާއި ރަންވީރު ސިންގް
ބޮލީވުޑްގެ މަޝްހޫރު ޖޯޑެއް ކަމަށްވާ ދިޕިކާ ޕަދުކޯން އާއި އޭނާގެ ފިރިމީހާ ރަންވީރު ސިންގް އަނެއްކާ ވެސް އެކުގައި ފިލްމެއް ކުޅުމަށް ތައްޔާރުވަމުންދާ ކަމަށް ރިޕޯޓްތައް ބުނެފިއެވެ.
މި ފިލްމް ވެގެންދާނީ ކައިވެންޏަށް ފަހު މި ދެމަފިރިން އެކުގައި ކުޅޭ ފުރަތަމަ ފިލްމަށެވެ.
"83" ގެ ނަން ދީފައިވާ މި ފިލްމްގައި ރަންވީރު ފެނިގެންދާނީ އިންޑިއާގެ ކުރިކެޓް ޓީމްގެ ކުރީގެ ކެޕްޓަން ކަޕިލް ދޭވްގެ ރޯލުންނެވެ.
ރިޕޯޓްތައް ބުނާގޮތުން މި ފިލްމްގައި ދިޕިކާ ފެނިގެންދާނީ ރަންވީރުގެ އަނބިމީހާގެ ރޯލުންނެވެ. އަދި މި ފިލްމްގެ ކޯ ޕްރޮޑިއުސަރަކީ ވެސް ދިޕިކާ ކަމަށް ރިޕޯޓްތައް ބުނެއެވެ. ދިޕިކާ ޕްރޮޑިއުސަރެއްގެ ގޮތުގައި މަސައްކަތް ކުރާ ފުރަތަމަ ފިލްމަކީ އޭނާގެ އަންނަން އޮތް ފިލްމް "ޗަޕާކް"އެވެ.
މި ފިލްމް ވެގެން ދާނީ ދިޕިކާ އާއި ރަންވީރު އެކުގައި ފެނިގެންދާ ހަތަރު ވަނަ ފިލްމަށެވެ.
މި ދެތަރިން ކުރިން އެކުގައި ކުޅެފައިވާ ފިލްމް ތަކުގެ ތެރޭގައި "ގަލިޔޯންކީ ރަސީލާ ރާމް ލީލާ"، "ބާޖިރާއޯ މަސްތާނީ" އަދި "ޕަދްމާވަތް" އެވެ.
