އަންހެން ޑައިވަރ ޒޫނާ އަށް ބައިނަލްއަޤުވާމީ އެވޯޑެއް ލިބިއްޖެ!
11 މެއި 2019 | ހޮނިހިރު 08:23އޭނާ 12000 އަށް ވުރެ ގިނަ ޑައިވް ކޮށްފައިވޭ
ޒޫނާ ނަސީމް،
ޑައިވް އެސޯސިއޭޝަން އޮފް މޯލްޑިވްސްގެ ރައީސް އަދި "މޫދު ބުޅާ ޑައިވް ސެންޓަރު"ގެ ކޯ ފައުންޑަރ ޒޫނާ ނަސީމަށް ބައިނަލްއަޤުވާމީ އެވޯޑެއް ލިބިއްޖެއެވެ.
ކަނޑުގެ ދިރުންތައް ރައްކާތެރިކޮށް އެކަމަށްޓަކައި މަސައްކަތްކުރާ ފަރާތްތަކުގެ އަގުވަޒަން ކުރުމަށް އިނގިރޭސިވިލާތުގެ ބޯޓް އިންޓަނޭޝަނަލް މެގަޒި އާއި ބްލޫ މެރީން ފައުންޑޭޝަނުން ދެމުން އަންނަ އޯޝަން އެވޯޑްގެ "ލޯކަލް ހީރޯ އެވާރޑް" ޒޫނާއަށް ލިބިފައިވާއިރު، ޕުރޮފެޝަނަލް އެސޯސިއޭޝަން އޮފް ޑައިވިން އިންސްޓެކްޓަރ؛ (ޕަޑީ) ގެ ކޯސް ޑައިރެކްޓަރުކަން ލިބުނު ފުރަތަމަ ދިވެހި އަންހެން ޑައިވަރަކީ ވެސް ޒޫނާއެވެ.
ޒޫނާ ނަސީމްއަށް ވަނީ ލޯކަލް ހީރޯ އެވާރޑް ލިބިފައި
ޒޫނާ އަށް މި އެވާރޑް ލިބިފައިވާއިރު، އޭނާ ވަނީ 12،000 އަށް ވުރެ ގިނަ ޑައިވްކޮށް، 11،000 އަށް ވުރެ ގިނަ މީހުންްނަށް މި މަސައްކަތް ދަސްކޮށްދީފައެވެ. އޭގެ އިތުރުން، އަންހެނުން މި ދާއިރާއަށް ނެރުމަށް ބުރަ މަސައްކަތްތަކެއް ކޮށްފައިވާއިރު، އޭނާ މިހާތަނަށް ވަނީ ރާއްޖޭގެ 400 އަށް ވުރެ ގިނަ އަންހެނުންނަށް މި މަސައްކަތް ދަސްކޮށްދީފައެވެ.
މި މަސައްކަތުގައި 21 އަހަރު ހޭދަކޮށްފައިވާ ޒޫނާ ވަނީ ސަރުކާރުގެ ސްކީމެއް ކަމަށްވާ "ފަރުކޮއި" ސްކީމް ތައާރަފްކޮށް އުފެއްދުމުގައި ވެސް މުހިންމު ދައުރެއް އަދާކޮށްފައެވެ. އެގޮތުން ރާއްޖޭގެ ކަނޑުގެ ދިރުންތައް ހިމާޔަތްކޮށް އެކަން ކަމަށް ހޭލުންތެރި ކުރުވުން މި ސްކީމްގެ މަޤްސަދުތަކުގެ ތެރޭގައި ހިިމެނެއެވެ.
