އިޔޫ ކައުންސިލްގެ ރިޔާސަތު ބަލަހައްޓާ ރުމޭނިޔާގެ ބޮޑު ވަޒީރުގެ ނައިބާ ޝާހިދު ބައްދަލު ކުރައްވައިފި
ޓެރަރިޒަމާއި ހައްދުފަހަނައެޅުމާއި ދެކޮޅަށް ދެގައުމު ގުޅިގެން މަސައްކަތްކުރުމާއި ބެހޭ ގޮތުން މަޝްވަރާ ކުރެއްވި
ފޮރިން މިނިސްޓަރު ޝާހިދު ރުމޭނިޔާގެ ބޮޑު ވަޒީރުގެ ނައިބު އަނާބަރޗޯލް
ފޮރިން މިނިސްޓަރ އަބްދުﷲ ޝާހިދު، އިޔޫ ކައުންސިލްގެ ރިޔާސަތު ބަލަހައްޓާ ރުމޭނިޔާގެ ބޮޑު ވަޒީރުގެ ނައިބު އަނާ ބަރޗޯލް އާއި ބައްދަލުކުރައްވައިފިއެވެ.
ރުމޭނިއާގެ ބޮޑު ވަޒީރުގެ ގެކޮޅު ވިކްޓޯރިއާ ޕެލެސްގައި ބޭއްވި އެ ބައްދަލުވުމުގައި ދެބޭފުޅުން ވަނީ ދެ ގައުމުގެ ދެމެދުގައި އޮތް ގާތް ގުޅުން އިތުރަށް ހަރުދަނާ ކުރުމާއި ބެހޭ ގޮތުން މަޝްވަރާކުރައްވާފައެވެ.
ތަފާތު އެކި ދާއިރާތަކުން ދިވެހިރާއްޖެ އާއި ރުމޭނިއާ ދެމެދު ގުޅުން ބަދަހިކުރުމާއި ބެހޭ ގޮތުން ދެބޭފުޅުން މަޝްވަރާކުރެއްވިއެވެ. އެގޮތުން ސިއްހީ ދާއިރާ އާއި، ގުދުރަތީ ކާރިސާތަކުން ލިބޭ ގެއްލުންތައް ކުޑަކުރުމުގެ މަސައްކަތުގެ ދާއިރާގެ އިތުރުން ވިޔަފާރިއާއި އިންވެސްޓްމަންޓްގެ ދާއިރާއާ ބެހޭ ގޮތުން ވަނީ މަޝްވަރާކޮށްފައެވެ.
ޓެރަރިޒަމާއި ހައްދުފަހަނައެޅުމާއި ދެކޮޅަށް ދެގައުމު ގުޅިގެން މަސައްކަތްކުރުމާއި ބެހޭ ގޮތުން ދެބޭފުޅުން މަޝްވަރާކުރެއްވާފައިވާ ކަމަށް ފޮރިން މިނިސްޓްރީން މައުލޫމާތުދެއެވެ.
ހަމައެއާއިއެކު ރާއްޖޭގެ މަހުގެ ބާވަތްތައް ޔޫރަޕްގެ މާރކެޓްގައި އިތުރަށް ޕްރޮމޯޓްކުރުމަށް ދިވެހި ސަރުކާރުން ބޭނުންވާކަން ހާމަކުރައްވައި، މިނިސްޓަރ ޝާހިދު ވަނީ އެކަމާ ގުޅޭ ގޮތުން ވެސް މަޝްވަރާކުރައްވާފެވެ.
ޝާހިދުގެ ދަތުރުފުޅާއި ބެހޭގޮތުން ރާއްޖެ.އެމްވީ އަށް މައުލޫމާތު ދެއްވަމުން ފޮރިން މިނިސްޓްރީގެ މީޑިއާ ޑައިރެކްޓަރ މިއުވާން މުހައްމަދު ވިދާޅުވީ، ޝާހިދުގެ ދަތުރުފުޅުގައި ގިނަ ކަންތައްތަކާއި ބެހޭ ގޮތުން މަޝްވަރާ ކުރަން ހަމަޖެހިފައިވާ ކަމަށެވެ.
'' އީޔޫ ކައުންސިލްގެ ރިޔާސަތު ބަލަހައްޓަމުންދާ ރުމޭނިއާ ސަރުކާރުގެ އިސް އޮފިޝަލުންނާއިއެކު ބާއްވާ ބައްދަލުވުންތަކުގައި ދެ ގައުމުގެ ގުޅުމާއި ބެހޭ ގޮތުން ކުރައްވާ މަޝްވަރާތަކުގެ އިތުރުން އީޔޫއާއި ގުޅުން ހުރި އެހެން މަޝްވަރާތައް މިނިސްޓަރު ކުރައްވާނެ. އެގޮތުން އީޔޫއިން ރާއްޖެއަށް އިންވެސްޓްމެންޓްތައް ގެނައުމާއި، ދިވެހި މަސްވެރިކަމުގެ ބާވަތްތަކުން ނަގާ 24 އިންސައްތަ ޑިއުޓީ ކުޑަކުރުމުގެ އިތުރުން ޔޫރަޕަށް ދާން ނަގަން ޖެހޭ ވިސާއާއި ގުޅޭ ގޮތުން މަޝްވަރާކުރައްވައި، އެކަންކަމުގައި ރާއްޖެއަށް ފަސޭހަތަކެއް ލިބޭތޯ މިނިސްޓަރު މަޝްވަރާ ކުރައްވާނެ'' މިއުވާން ވިދާޅުވިއެވެ.
އަންނަ ނޮވެމްބަރު މަހު ދިވެހިރާއްޖެ އާއި ރުމޭނިއާއާ ދެމެދު ޑިޕްލޮމެޓިކް ގުޅުން ގާއިމްކުރެވުނުތާ 40 އަހަރުފުރުން ފާހަގަކުރާނެއެވެ.
