ދޭ ދޭ ޕިޔާރުދޭ ފިލްމް މެއި 17 ވަނަ ދުވަހު ރިލީޒް ކުރަނީ

ދޭ ދޭ ޕިޔާރުދޭ ފިލްމް މެއި 17 ވަނަ ދުވަހު ރިލީޒް ކުރަން ނިންމައިފިއެވެ.

މި ފިލްމް ކުރިން ރިލީޒް ކުރުމަށް ނިންމާފައިވަނީ މާރޗް މަހުގެ 15 ވަނަ ދުވަހުއެވެ. އެހެންނަމަވެސް އަޖޭ ދޭވްގަން ހަރަކާތްތެރިވާ ޓޯޓަލް ދަމާލް ފިލްމް އެ ދުވަހު ރިލީޒް ކުރުމުން ދޭ ދޭ ޕިޔާރުދޭ ފިލްމް ރިލީޒްކުރާ ތާރީހަށް ވަނީ ބަދަލު ގެނެސްފައެވެ.

މި ފިލްމްގެ ލީޑް ރޯލުން ފެނިގެންދަނީ އަޖޭ ދޭވްގަންއެވެ. އަދި އޭނާއާއެކު ފިލްމުން ތައްބޫ އާއި ރަކުލް ޕްރީތް ސިންގް ފެނިގެންދެއެވެ. މި ފިލްމަކީ ރޮމޭންޓިކް ކޮމެޑީ ފިލްމަކަށްވާއިރު ފިލްމްގެ ޓްރެއިލަރ ރިލީޒްކޮށްފައިވަނީ އަޖޭގެ 50 ވަނަ އުފަންދުވަހުއެވެ.

ފިލްމްގެ ޓްރެއިލަރ އިން އަޖޭ ފެނިގެންދަނީ އުމުރުން 50 އަހަރުގެ ވަރިވެފައިވާ ދެކުދިންގެ ބައްޕައެއްގެ ރޯލުންނެވެ. އަދި އޭނާ އުޅޭނީ އުމުރުން 24 އަހަރުގެ ޒުވާން ރަކުލް އާއި ރައްޓެހިވެގެންނެވެ. އެ ދެމީހުންގެ މި ގުޅުމަށް އަޖޭގެ ކުރީގެ އަންހެނުން ތައްބޫ އަދި އާއިލާއިން ވެސް ނުރުހުން ފާޅުކުރާ މަންޒަރު ޓްރެއިލަރ އިން ފެނެއެވެ.

މި ފިލްމަކީ "ހައުސްފުލް 3" އަށް ފަހު އަޖޭ އާއި ތައްބޫ އެކުގައި ފެނިގެންދާ ފިލްމެވެ.

މި ފިލްމްގެ ދެވަނަ ބަތަލާ ރަކުލް އަޖޭއާ ގުޅޭގޮތުން ބުނެފައިވަނީ އޭނާ އިންޑަސްޓްރީއަށް ވަރަށް އާ ކަމަށާއި ނަމަވެސް މި ފިލްމްގައި މަސައްކަތް ކުރިއިރު އަޖޭ އެކަން އޭނާއަށް އިހުސާސް ނުކޮށްދޭ ކަމަށެވެ. އަދި މި ފިލްމަކީ ވަރަށް މަޖާ ފިލްމެއް ކަމަށާއި ޝޫޓިންތައް ދިޔައީ ވަރަށް ހިތްހަމަޖެހޭ ގޮތަށް ކަމަށެވެ.

ޓީ ސީރީސް އަދި ލަވް ފިލްމްސް ގުޅިގެން ޕްރޮޑިއުސް ކޮށްފައިވާ މި ފިލްމް ޑައިރެކްޓް ކޮށްފައިވަނީ އާކިވް އަލީއެވެ.