ޒިދާން ބޭނުންވަނީ މޮޑްރިޗް ބަހައްޓަން

ރެއާލް މެޑްރިޑަށް ކުޅެމުން އަންނަ ލޫކަ މޮޑްރިޗް އެ ކްލަބުގައި ބަހައްޓަން ކޯޗު ޒައިނުއްދީން ޒިދާން ބޭނުންވާ ކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާގޮތުން ކުރިޔަށް އޮތް ސީޒަނުގައި ޒިދާން ބޭނުންވަނީ މޮޑްރިޗް ރެއާލްގައި ކީރޯލެއް އަދާކުރުމަށް ކަމަށާއި، އެގޮތުން އޭނާ ކްލަބުގައި ބަހައްޓަން ޒިދާން ބޭނުންވެއެވެ.

ދާދި ފަހުން މަޝްހޫރު ކުޅިވަރު ނޫހެއް ކަމަށްވާ މާސާއިން ބުނީ، ރެއާލްއާ އެކު މޮޑްރިޗް ހަދާފައިވާ އެއްބަސްވުން އާ ކުރާނެ ކަމަށާއި، ކުރިއަށް އޮތް ދުވަސްތަކުގެ ތެރޭގައި އެ ކަންތައް ނިމިގެންދާނެ ކަމަށެވެ.

ރެއާލްއާ އެކު މޮޑްރިޗް ހަދާފައިވާ އެއްބަސްވުން އަންނަ އަހަރު ހަމަވާއިރު، އިންޓަ މިލާންގެ އިތުރުން ގިނަ ކްލަބްތަކުން އަންނަނީ އޭނާއަށް ފާރަލަމުންނެވެ.

ނަމަވެސް ނޫސްވެރިންނަށް ދާދި ފަހުން މައުލޫމާތު ދެމުން މޮޑްރިޗް ބުނީ، އޭނާ ރެއާލްއާއެކު ހަދާފައިވާ އެއްބަސްވުމުގައި ދޮޅު އަހަރު އެބައޮތް ކަމަށާއި، އެއްބަސްވުން ނިމެންދެން ކްލަބުގައި މަޑުކުރަން ބޭނުންވާ ކަމަށެވެ.

ދުނިޔޭގައި މިވަގުތު ހުރި އެންމެ މޮޅު ކުޅުންތެރިޔާ މޮޑްރިޗް ބުނީ، ރެއާލްގައި ގިނަ ދުވަސްތަކެއް ވަންދެން މަޑުކުރަން ބޭނުންވާ ކަމަށާއި، އޭނާ ކްލަބުގައި ހުރީ ވަރަށް ހިތްހަމަޖެހިގެން ކަމަށެވެ.

ރަޝިއާގައި ނިމިގެންދިޔަ ވޯލްޑް ކަޕްގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ މޮޑްރިޗް ވަނީ ނިމިގެންދިޔަ ސީޒަނުގައި ރެއާލްއާއެކު ޖެހިޖެހިގެން ތިންވަނަ ފަހަރަށް ޔުއެފާ ޗެމްޕިއަންސް ލީގު ކާމިޔާބު ކޮށްފައެވެ. އަދި އޭނާ ވަނީ މިދިޔަ އަހަރު ޔޫރަޕްގެ މޮޅު ކުޅުންތެރިޔާގެ އިތުރުން ދުނިޔޭގެ މޮޅު ކުޅުންތެރިޔާގެ މަގާމުވެސް ހޯދާފައެވެ.

ޓޮޓެންހަމް ހޮޓްސްޕާއިން ވިދާލި މޮޑްރިޗް ބާސާއަށް ބަދަލުވީ 2012 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް ކުޅުނު 301 މެޗުގައި 17 ލަނޑު ކާމިޔާބު ކޮށްފައެވެ.

ކްރޮއޭޝިއާގެ މޮޅު ފުޓުބޯޅަ ކުޅުންތެރިޔާގެ މަގާމު ފާއިތުވެދިޔަ ދެއަހަރު ވެސް ހޯދާފައިވާ މޮޑްރިޗް ވަނީ އެ ޓީމަށް ކުޅުނު 120 މެޗުގައި 14 ލަނޑު މިހާތަނަށް ކާމިޔާބު ކޮށްފައެވެ.