ފޮރިން މިނިސްޓްރީން ރާއްޖޭގައި ތިބޭ އެކިއެކި ޑިޕްލޮމެޓިކް ބޭފުޅުންނާ އެމްބަސަޑަރުންނާއި އަދި މަލްޓިލޭޓަރަލް އެޖެންސީތަކުގެ ބޭފުޅުންނާ ރާއްޖޭގަ މިވަގުތު ތިބި އިތުރު ޑިޕްލޮމެޓިކް ބޭފުޅުން ހިމެނޭ ގޮތަށް މައުލޫމާތު ދިނުމުގެ ބައްދަލުވުމެއް ބާއްވައިފިއެވެ.

މި ބައްދަލުވުމުގެ ރިޔާސަތު ބެލެހެއްޓެވީ ފޮރިން މިނިސްޓްރީގެ އެމްބެސަޑަރ އެޓް ލާޖް ޑރ.އާސިމް އަހުމަދެވެ.

މިބައްދަލުވުމުގައި ފޮރިން މިނިސްޓްރީ އިން ވަނީ ރާއްޖޭގެ ހިންގަމުންދާ އަދި ހިންގުމަށް ޕްލޭން ކޮށްފައިވާ މައިގަނޑު މުހިންމު ޕްރޮޖެކްޓްތަކަށް އަލިއަޅުވާލާ މަޝްވަރާތައް ކޮށްފައެވެ. މީގެ އިތުރުން ޖޫން 17 އިން 18 އަށް ބާއްވާ ހަމަޖެހިފައިވާ ޕާޓްނަރޝިޕް ފޯރަމް އަށް ވަމުންދާ ތައްޔާރީތަކާ ގުޅޭ ގޮތުން ވެސް މައުލޫމާތު ހިއްސާ ކުރެއްވިއެވެ.

މި ޕާޓްނަރޝިޕް ފޯރަމް އަކީ ފާއިތުވި ދިޔަ އަހަރުތަކުގައި މިފަދަ ގޮތަކަށް ރާއްޖޭގެ އަވަށްޓެރި ގައުމުތަކުގެ ބައިވެރިން އަދި ރާއްޖޭގެ ކުރިމަގަށް ހުރި ޕްރޮޖެކްޓް ތަކުގެ މަސައްކަތް ކުރެވޭނެ ފަދަ ބޭފުޅުން ހިމެނިގެން މިގޮތަށް ބޭއްވޭ ފުރަތަމަ ބައްދަލުވުމެވެ.

ފޮރިން މިނިސްޓްރީން ބުނީ މަގުސަދަކީ ރައީސް އިބްރާހިމް މުހައްމަދު ސޯލިހުގެ ވިސްނުންފުޅު މިބޭފުޅުންނާ ހިއްސާކޮށް މިކަން ކުރެވޭނެ ފަސޭހަ ގޮތްތަކެއް ހޯދުމާއި އެކަމަށް ރަނގަޅު އިވެސްޓަރުން ހޯދުން ކަމަށެވެ. އަދި 100 ދުވަހުގެ ވައުދުގެ ދަށުން ނިންމަން ހުރި ޕްރޮޖެކްޓްތަކުގެ މައުލޫމާތާ ނޫއިގްތިސާދުގެ ދަށުން ކުރަން ހުރި ކަންތައްތަކާއި ސިއްހީ ދާއިރާ، ތައުލީމީ އަދި ގެދޮރުވެރިކަން ހުރި ގޮންޖެހުންތަކާ އެކަމަށް ހައްލު ހޯދޭނެ ގޮތްތަކާ މެދު މަޝްވަރާ ކޮށް އެކަމަށް ބޭނުންވާ އެހީ ހޯދުން ކަމަށެވެ.

މީގެ އިތުރުން ސަރުކާރު ވަކިވަކި ދާއިރާތައް އިތުރަށް ހަރުދަނާ ކުރުމާ އިސްލާހު ކުރުމަށް ބޭނުންވާ ފުންނާބު އުސް ބޭފުޅުންގެ ހިޔާލު ހޯދުމާ، އެކަމަށް އެހީ އަދި އެކަމަށް ބޭނުންވާ އިތުރު އެހެނިހެން މައުލޫމާތު ހޯދައި ސަރުކާރުގެ ސިޔާސަތު ގާއިމް ކުރުމަށް އެހީތެރިކަން ހޯދުން ކަމަށް ވެސް ފޮރިން މިނިސްޓްރީން މައުލޫމާތުދެއެވެ.

މިބައްދަލުވުން ބޭއްވީ ރައީސުލްޖުމްހޫރިއްޔާ އޮފީސް، ފިނޭންސް މިނިސްޓްރީ، އިކޮނޮމިކް މިނިސްޓްރީ އަދި އެޓާނީ ޖެނަރަލްގެ އޮފީހުގެ އެހީތެރިކަމާއި އެއްބާރުލުމާއެކުއެވެ.

ސަރުކާރު އިދާރާތަކުގެ އިސް ބޭފުޅުންތަކެއް ހިމެނޭގޮތަށް ޑރ.އާސިމް އިސްވެ ހުންނަވާ ވަފުދެއް ދެއްލިއާ ކޮލަންބޯ އަށް ޒިޔާރަތް ކުރައްވާނެކަން ފާހަގަކުރައްވައި މިނިސްޓްރީން ބުނީ އެގައުމުގައި ތިއްބަވާ އެހެނިހެން ގައުމުތަކުގެ އިސް ޑިޕްލޮމެޓުންނާއި އެހެނިހެން ސިޔާސީ ބޭފުޅުންނާ ބައްދަލުކުރައްވާ ކުރިއަށް އޮތް ޕާޓްނަރޝިޕް ފޯރަމްގެ މައުލޫމާތު ހިއްސާކުރާނެ ކަމަށެވެ.

ފޮރިން މިނިސްޓްރީން ބުނީ ރާއްޖޭގެ ސަރުކާރުން ހިންގަން ހަމަޖައްސާފައިހުރި ޕްރޮޖެކްޓްތަކާ މިފޯރަމް އާ ބެހޭ ގޮތުން ކުރާ ސުވާލުތަކަށް ޖަވާބު ވެސް ދެއްވާނެ ކަމަށެވެ .

މިވަފުދު މިމަހުގެ 10 ވަނަ ދުވަހު ކޮލަންބޯ އަށް އަދި 13 ވަނަ ދުވަހު ދެއްލީގައި މިބައްދަލުވުން ބާއްވާނެ ކަމަށް މިނިސްޓްރީން މައުލޫމާތުދެއެވެ.