ޕާކިން މައްސަލަތަކަށް ހައްލު ގެނެވޭނީ ޕާކިން ބިލްޑިންތައް ހެދިގެން: ފުލުހުން
ސިޓީ ކައުންސިލުން ވަނީ އަމީނީ މަގުގެ ބައެއް ހިސާބުގައި ޕާކް ކުރުން މަނާ ވެސް ކޮށްފައި
ފުލުހުންގެ ހެޑް އޮފް ޓްރެފިކް ޑިޕާޓްމަންޓް، ސްޕްރިންޓެންޑެންޓް އޮފް ޕޮލިސް ހުސައިން ސަމީރު
ޕާކިން މައްސަލަތަކަށް ހައްލު ގެނެވޭނީ ޕާކިން ބިލްޑިންތައް ހެދިގެން ކަމަށް ފުލުހުންގެ ހެޑް އޮފް ޓްރެފިކް ޑިޕާޓްމަންޓް، ސްޕްރިންޓެންޑެންޓް އޮފް ޕޮލިސް ހުސައިން ސަމީރު ވިދާޅުވެއްޖެއެވެ.
ރާއްޖެއެމްވީއަށް ސަމީރު ވިދާޅުވީ މާލޭގެ ހުސްބިންތަކަށް ޕާކިން ހެދިކަމުގައި ވިއަސް ޕާކިންގެ މައްސަލަތަކަށް ހައްލު ގެނެވޭނެ ކަމަށް ނުބެލެވޭ ކަމަށެވެ. އަދި ޕާކިން މައްސަލަތަކަށް ހައްލު ގެނެވޭނީ ޕާކިން ބިލްޑިންތައް ހަދައިގެން ކަމަށް ވިދާޅުވިއެވެ.
"އަޅުގަނޑުމެން ދެކޭ ގޮތުގައި ޕާކިން ބިލްޑިންތަކެއް މާލޭގައި ހެދިގެން ޕާކިން މައްސަލަތަކަށް ހައްލު ލިބޭނީ،" ސަމީރު ވިދާޅުވިއެވެ.
ޕާކިން މައްސަލަތައް ހައްލު ކުރުމަށް އެކަމަށް ޚާއްސަ ބިލްޑިން ހެދުމުގެ ވިސްނުން ހުރި ކަމުގައި ވިއަސް އަދި އެކަމަށް މަޝްވަރާ ކޮށްފައެއް ނުވެއެވެ.
ސަމީރު ވިދާޅުވީ ޕާކިން މައްސަލަތައް ހައްލު ކުރެވޭނީ ރެޖިސްޓްރީ ކުރެވޭ އުޅަނދުތަކަށް ނުވަތަ ގަރާޖުތަކަށް ވަދެ ނިކުމެވޭނެ މާހައުލެއް އޮވެގެން ކަމަށެވެ.
ގަވާއިދާ ޚިލާފަށް ޕާކުކުރާ އުޅަނދުތައް ގިނަވެ، އާންމުންގެ ޝަކުވާ ބޮޑުވެފައިވާ ކަމަށް ފުލުހުން ހާމަކޮށްފައިވާއިރު ބުދަ ދުވަހު ވަނީ ފިނޭންސް މިނިސްޓްރީ ކައިރީ އޮންނަ ހުސްބިމުގައި ޕާކިން ޒޯނެއް ހަދައި އެތަނުގައި ގާތްގަނޑަކަށް 350 އެއްހާ ސައިކަލް ޕާކް ކުރެވޭނެ ގޮތަށް ހަދާފައެވެ.
ޕާކިން ޒޯން ހުޅުވާލުމާ އެކު، ސިޓީ ކައުންސިލުން ވަނީ އަމީނީ މަގުގެ ބައެއް ހިސާބުގައި ޕާކް ކުރުން މަނާ ވެސް ކޮށްފައެވެ. އެއީ އަމީނީ މަގުގެ ފެން ބިލްޑިންގުގެ އިރުމަތީ ކަންމަތިން ފެށިގެން، ގިޔާސުއްދީން ސްކޫލާ ހަމައަށް އަމީނީ މަގުގައި ޕާކް ކުރުން ވަނީ މަނާކޮށްފައެވެ.
ޕާކު ކުރާނެ ތަނުގެ ޝަކުވާއާ އެކު ޓްރެފިކްގެ މައްސަލައަކީ ވެސް އާންމުން ޝަކުވާކުރާ އެއް މައްސަލައެވެ. އެކަމާ ގުޅިގެން ސަމީރު ވިދާޅުވީ މާލޭގެ ޓްރެފިކް މައްސަލަތަކަށް ލުޔެއް ހޯދުމަށް ފުލުހުން މަސައްކަތްތަކެއް ކުރާ ކަމަށާއި މާލޭގައި ޓްރެފިކް ލުއި ކުރުމުގެ މަސައްކަތަށް އެއްފަހަރާ ހައްލު ނުގެނެވޭނެ ކަމަށެވެ. ޓްރެފިކް މައްސަލަތަކަށް ހައްލު ގެނައުމަށް ސަރުކާރުގެ އިދާރާތަކާ ގުޅިގެން މަސައްކަތް ކުރަމުންދާ ކަމަށް ވިދާޅުވިއެވެ.
"ރޯދަ މަހުގެ ކުރީގައި އަޅުގަނޑުމެން އެގޮތަށް އެކަންތައް ކުރިއަށް ގެންދިޔަ އިން. އެހެން ނަމަވެސް ރޯދަމަހާ ގުޅިގެން މުދާ އުފުލާ އުޅަނދުތަކާއި ސްކޫލް ގަޑިއާއި އޮފީސް ގަޑިއާއި އެއް ގަޑިއަކަށް ދިމާވެގެން އަޅުގަނޑުމެންނަށް ފާހަގަވީ މަޖީދީ މަގުގެ ބާރު ބޮޑުކަން. އެކަމާއި ގުޅިގެން ވަގުތީ ގޮތުން އަޅުގަނޑުމެން ކޯން ޖަހައިގެން ހަތަރު ފުރޮޅުލީ އުޅަނދު ތަކަށް އެގޮތަށް އެއްކޮޅަށް ދުއްވޭ ގޮތަށް ނިންމީ،" ސަމީރު ވިދާޅުވިއެވެ.
ޓްރެފިކް މައްސަލަތަކަށް ލުއި ގޮތް ހޯދުމަށް ރޯދަ މަހު މެންދުރު 12:30 އިން ފެށިގެން 18:30 އާ ހަމައަށް އެމްއެމްއޭ އިން ފެށިގެން މީރުބަހުރު ބަނދަރާ ހަމައަށް އާންމު ދަތުރުފަތުރު ކުރަން ވެހިކަލްތައް ބޭނުން ނުކުރެވޭނެ ގޮތް ފުލުހުން ވަނީ ހަދާފައެވެ. އަދި ރަމަޟާން މަހުގެ ރަސްމީ ދުވަސްތަކުގައި ހެނދުނު 08:00 އިން މެންދުރު 14:00 އަށް ހަތަރު ފުރޮޅުލީ އުޅަނދުތަކަށް މަޖީދީމަގުގައި އެއްކޮޅަށް ދުއްވޭ ގޮތަށް ވަނީ ހަދާފައެވެ.
