ހަށިގޮއްވަން ތަމްރީންވެފައި ތިބި ހަތް މީހަކު ލަންކާ އިން ހައްޔަރުކޮށްފި
ހައްޔަރުކުރި މީހުންނާ ޒަހްރާން ހާޝިމާ ގުޅުން އޮވޭ
ލަންކާއަށް ދިން ހަމަލާއަށް ފަހު ކާއްތަންކުޑީގެ މިސްކިތެއްގެ ކައިރި
އީސްޓަރ ސަންޑޭގައި ލަންކާއަށް ދިން ހަމަލާތަކުގެ މޭސްތިރި ޒަހްރާން ހާޝިމްގެ ނެޝަނަލް ތައުހީދު ޖަމާއަތުގެ ހަށިގޮއްވަން ތަމްރީންވެފައި ތިބި ހަތް މީހަކު ލަންކާ ފުލުހުން ހައްޔަރުކޮށްފިއެވެ.
ލަންކާ ފުލުހުންގެ އޮފިޝަލަކު ވިދާޅުވީ މި ހަތް މީހުން ވެސް ހައްޔަރު ކުރެވުނީ، ހޯމަ ދުވަހު ފުލުހުން ހިނގި އޮޕަރޭޝަނެއްގައި ހަމްބަންޓޯޓާއިން ކަމަށެވެ. މި އެންމެންނަކީ ވެސް ޒަހްރާނާ ގާތް ގުޅުމެއް ބާއްވަމުން ދިޔަ ބަޔަކު ކަމަށް ޝައްކުކުރެވޭ ކަމަށް ފުލުހުން ބުނެފައި ވެއެވެ. އަދި މި ހަތް މީހުން ހަމަބަންޓޯޓާއަށް ގެންދިޔައީ ޒަހްރާން ހާޝިމްގެ ދެ ކޮއްކޮއިންގެ ތެރެއިން އެކަކު ކަމަށް ފުލުހުން ބުނެފައި ވެއެވެ. މި އެންމެންނަކީ ވެސް ކާއްތަންކުޑީއަށް ނިސްބަތްވާ މީހުންނެވެ.
ފުލުހުން ހާމަކޮށްފައިވާ ގޮތުގައި، މި އެންމެން ދިޔައީ ސިއްރިއްޔާތުގައި ހަތިޔާރު ބޭނުން ކުރުމުގެ ތަމްރީންތައް ފުރިހަމަކުރަމުންނެވެ. އެ މީހުން މިކަން ދިގުމުއްތަކަށް ކުރަމުން ގެންގޮސްފައިވާ އިރު، އެ މީހުންނަށް ތަމްރީން ދިނީ ބަޓިކްލޯގައި ހުންނަ ޒިއޯން ޗާޗަށް ހަމަލާދިން މުހައްމަދު ނަޒަރް މުހައްމަދު އާސަތު ކަމަށް ވެސް ފުލުހުން ބުނެފައިވެއެވެ.
ހައްޔަރުކުރެވުނު މީހުންނާ، އެންޓީޖޭގެ ކަންކަމާ ގުޅޭ ގޮތުން ސުވާލުކުރެވޭނެ ކަމަށާއި، އެ މީހުންނާ އީސްޓަރ ސަންޑޭގައި ދެވުނު ހަމަލާއާ އޮތް ގުޅުން ދެނެގަންނަން މަސައްކަތް ކުރާނެ ކަމަށް ފުލުހުން ބުނެފައި ވެއެވެ. އީސްޓަރ ސަންޑޭގައި ލަންކާއަށް ހަމަލާދިން އެންޓީޖޭ ޖަމާއަތާ ގުޅުން ހުރި އެތައް ބަޔަކު ހައްޔަރުކޮށްގެން ތަހުގީގުތައް ކުރިޔަށް ގެންދާއިރު، ހައްޔަރުކުރެވުނު މީހުންގެ ތެރޭގައި އެންޓީޖޭގެ ހަޒާންދާރު އަދި ދެވަނައަށް ހުރި ކޮމާންޑަރު ހިމެނޭކަމަށް ފުލުހުންނާ ހަވާލާދީ މީޑިއާތަކުން ރިޕޯޓްކޮށްފައި ވެއެވެ.
