އޮޑިޓް ރިޕޯޓް ހުށަހެޅީ 3 ޕާޓީއަކުން، މުއްދަތު މި މަހުގެ 9 އަކަށް ހަމަވާނެ!
އޮޑިޓްް ރިޕޯޓް ހުށަހެޅީ އެމްޑީޕީ، އެމްޑީއޭ، ޖޭޕީ
އިލެކްޝަންސް ކޮމިޝަންގެ ރައީސް އަހުމަދު ޝަރީފް
ސިޔާސީ ޕާޓީތަކުގެ ޤާނޫނުގައި ބުނެފައިވާގޮތަށް އޮޑިޓް ރިޕޯޓް ހުށަހެޅީ 3 ޕާޓީއަކުން ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ ސިޔާސީ ޕާޓީތަކުގެ ޤާނޫނުގައި ބުނެފައިވާ ގޮތަށް އޮޑިޓް ރިޕޯޓް ހުށަހެޅުމުގެ އެންމެ ފަހު މުއްދަތަކީ މި މަހުގެ 9 ވަނަ ދުވަސް ކަމަށެވެ. އަދި މި މަހުގެ 7 ވަނަ ދުވަހުގެ ނިޔަލަށް އޮޑިޓް ރިޕޯޓް ހުށަހަޅާފައިވަނީ 3 ޕާޓީއަކުން ކަމަށް އިލެކްޝަނުން ބުންޏެވެ.
ސިޔާސީ ޕާޓީތަކުގެ ޤާނޫނުގައި ބުނެފައިވާ ގޮތަށް އޮޑިޓް ރިޕޯޓް ހުށަހަޅާފައިވަނީ ވެރިކަންކުރާ އެމްޑީޕީއާއި، ޖުމްހޫރީ ޕާޓީގެ އިތުރުން، މޯލްޑިވްސް ޑިވަލޮޕްމަންޓް އެލެއަންސް (އެމްޑީއޭ) އެވެ.
ހަ ޕާޓީއަކުން އޮޑިޓް ރިޕޯޓް ހުށަހަޅަންޖެހޭއިރު، އޮޑިޓް ރިޕޯޓް ހުށަނާޅާ ޕާޓީތަކަކީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ޢަދާލަތު ޕާޓީ (އޭ.ޕީ) އަދި ދިވެހިރައްޔިތުންގެ ޕާޓީ (ޑީ.އާރް.ޕީ) އެވެ. އަލަށް އުފެއްދި ޕާޓީތަކުން މި އަހަރު އޮޑިޓް ރިޕޯޓް ހުށަހަޅާކަށް ނުޖެހޭނެ އެވެ.
އިލެކްޝަންސް ކޮމިޝަނުން ބުނީ ޤާނޫނުގައި ބުނެފައިވާގޮތަށް އޮޑިޓް ރިޕޯޓް ހުށަނާޅާނަމަ ޤާނޫނީ ފިޔަވަޅުތައް އަޅާނެ ކަމަށެވެ. އެގޮތުން ޤާނޫނުގައި ބުނެފައިވަނީ އޮޑިޓް ރިޕޯޓް ހުށަނާޅާ ޕަޓީތައް 20،000 ރުފިޔާއާއި، 50،000 އިން ޖޫރިމަނާ ކުރެވޭނެ ކަމަށެވެ. އަދި ޕާޓީއަކުން ކަނޑައަޅާ ފަރާތެއް 5000 ރުފިޔާއާއި، 10،000 ރުފިޔާއިން ޖޫރިމަނާކުރެވިދާނެ ކަމަށް ވެސް ޤާނޫނުގައި ބުނެފައިވެއެވެ.
