ރޯދަމަހު ކާބޯތަކެތީގެ އަގު ދަށްކޮށްދޭނެ ކަމަށް އުރުދުން ސަރުކާރުން ވައުދުވެއްޖެ

މި ރަމަޟާން މަހު އުރުދުންގައި ވިއްކާ ކާބޯތަކެތީގެ އަގު ދަށްކޮށްދޭނެ ކަމަށް އެ ގައުމުގެ ބޮޑު ވަޒީރު އޮމަރް ރައްޒާޒް އެގައުމުގެ ރައްޔިތުންނަށް ވައުދުވެވަޑައިގެންފިއެވެ.

ރޯދަ މަހުގެ ފުރަތަމަ ދުވަހު ވެރިރަށް އައްމާންގައި ހުންނަ ކާބޯތަކެތި ވިއްކާ މާރުކޭޓަކަށް ކުރެއްވި ޒިޔާރަތެއްގައި ބޮޑުވަޒީރު ވިދާޅުވީ، ރައްޔިތުންނަށް ލުއި ފަސޭހަކޮށް ކާބޯތަކެތި ލިބޭ ގޮތަށް ހެދުމަށްޓަކައި އެގައުމުގެ ސަރުކާރުން މި އަހަރުގެ ރޯދަ މަހު އެއްޗެހީގެ އަގު ދަށްކުރުމުގެ މަސައްކަތް ކުރަމުން ގެންދާނެ ކަމަށެވެ.

ބޮޑުވަޒީރު އަރިހުގައި އެތަނަށް ޒިޔާރަތް ކުރެއްވި ޑައިރެކްޓަރ ޖެނެރަލް އޮފް ދަ މިލިޓަރީ ކޮންސިއުމާ ކޯޕަރޭޝަން ބްރިގޭޑިއާ ޖެނެރަލް މުތައްސެފް އޮމަރީ ވިދާޅުވީ، އެއްޗެހީގެ އަގު ކުޑަކުރުމުން، 220 ބާވަތެއްގެ ކާބޯތަކެތީގެ އިތުރުން ސާފުކުރަން ގެންގުޅޭ ތަކެތީގެ އަގު 40 ޕަސެންޓަށް ދަށްވެގެން ދާނެ ކަމަށެވެ. އަދީ އޭގެ އިތުރުން 87 ބާވަތެއްގެ އެއްޗެހީގެ އަގުވެސް ރަމަޟާން މަހު ކުޑަވެގެންދާނެ ކަމަށް އޭނާ ވިދާޅުވިއެވެ.

އުރުދުންއަކީ އާއްމު ގޮތެއްގައި ކާބޯތަކެތީ ކުޑަ އަގެއްގައި ލިބޭ ގައުމެކެވެ. އާފަލު ކިލޯއެއް 1.85 ޑޮލަރަށް ހުންނަ އިރު ޓޯމާޓޯއާ އަލުވި ފަދަ ތަކެތީގެ އަގު އުޅެނީ އެއް ޑޮލަރަށް ވުރެ ވެސް ދަށް އަގެއްގައެވެ.

އުރުދުންގައި ރޯދަމަހާ ދިމާކޮށް އެއްޗެހީގެ އަގު ކުޑަކުރުމަށް ސަރުކާރުން ނިންމާފައިވާއިރު މާރުކޭޓު ސަރަހައްދުގެ އިތުރުން އެހެނިހެން ކާރުބާރު ބޮޑު ސަރަހައްދުތަކުގައި އެކްސިޑެންޓްތައް މަދު ކުރުމަށް ޓްރެފިކް ފުލުހުން ދަނީ އޮޕަރޭޝަންތަކެއް ހިންގަމުންނެވެ.

އުރުދުންގެ ސިވިލް ޑިފެންސް ޑިޕާޓްމެންޓުން ބުނީ، ރެސްޓޯރެންޓްތަކާއި ކާބޯތަކެތި ވިއްކާ ތަންތަނުން ގަވާއިދަށް މަސައްކަތް ކުރޭތޯ ބެލުމަށް އެ ޑިޕާޓްމެންޓުގެ ޓީމުތަކުން އެތަންތަން އިންސްޕެކްޓް ކުރުމަށް ހަމަޖެހިފައިވާ ކަމަށެވެ.