ރަމަޟާން މަހާ ގުޅިގެން ބާޒާރުމަތީގައި ހުންނަ ތަކެތީގެ އަގު އުފުލެމުން ދިޔުމާ ގުޅިގެން، ވިޔަފާރީގެ ފައިދާ ހޯދުމަށް ގަސްތުކޮށްގެން ތަކެތީގެ އަގު ނުއުފުލުމަށް ރައީސް ސޯލިހު އިލްތިމާސްކުރައްވައިފިއެވެ.
ރަމަޟާން މަހާ ގުޅިގެން އާދިއްތަ ދުވަހު ރައީސް ދެއްވި ހިތާބެއްގައި ވިދާޅުވީ ކާބޯތަކެއްޗާއި އެހެނިހެން މުދާ، ބޮޑު އަގުގައި ވިއްކައިގެން، ލިބޭނެ ވަގުތީ ފައިދާއަށް އެކަނި އިސްކަން ދިނުމުގެ ބަދަލުގައި، އާޚިރަތުގެ ދަރުމަ އާއި ޘަވާބަށް ވިސްނައިގެން، ދީލަތިކަމާއި އޯގާތެރިކަން އިސްކުރުމަށް ވިޔަފާރިވެރިންނަށް އިލްތިމާސްކުރައްވާ ކަމަށެވެ.
މީގެ އިތުރުން ރައީސް ސޯލިހު ވިދާޅުވީ ރަމަޟާން މަހު ލިބޭ އެންމެ މަތިވެރި ފިލާވަޅަކީ އެކަކު އަނެކަކުގެ އިޙްސާސްތައް ދެނެގަތުމާއި، އެއްބަނޑުއެއްބަފާކަމުގެ ގުޅުންތައް ވަރުގަދަކުރުމާއި، އެކަކު އަނެކަކަށް އަޅާލައި އުޅުމުގެ މުހިންމުކަން ކަމަށެވެ.
ރައީސްގެ ހިތާބުގައި އެމަނިކުފާނު ވަނީ ރަމަޟާން މަހަކީ، ދުނިޔެ އާއި އާހިރަތް ބާއްޖަވެރިކުރުމަށްޓަކައި، މާތްﷲ ފަހިކޮށްދެއްވި ވަރަށް އަގުހުރި ރަނުގެ ފުރުސަތެއްކަން ފާހަގަކުރައްވާފައެވެ. އަދި މި މާތް މައްސަރުގެ ދަރުމަ އާއި ސަވާބު ހާސިލުކުރުމަށްޓަކައި، މާތްﷲ އަންގަވާފައިވާ ގޮތުގެ މަތިން ރޯދަ ހިފައި، ރޭ އަޅުކަންކޮށް، ގިނަގިނަ އިން ކީރިތި ގުރްއާން ކިޔަވައި، ސަދަގާތް ދިނުން އިތުރުކުރުމަށް، ރާއްޖޭގެ ރައްޔިތުންނަށް ރައީސް ނަސޭހަތްތެރިވެ ވަޑައިގެންނެވިއެވެ.
ރައީސް ވަނީ މި މާތް މައްސަރުގައި ކެތްތެރިވުމާއި އަނެކުންނަށް މައާފްކުރުމާއި، ހިތްތިރިކޮށް މަޑުމައިތިރިވުމަކީ، ރޯދައިގެ އަޅުކަން ބާރުއަޅާ އެންމެ މުހިންމު ކަންތައްތައް ކަން ފާހަގަކުރައްވައި، އަނެކުންނަށް އެހީތެރިވުމާއި ދީލަތިވުމަކީ، ރަމަޟާން މަހުގައި އަޅުގަނޑުމެންގެ ކިބައިގައި ކޮންމެހެން ހަރުލައްވަންޖެހޭ ސިފަތައް ކަމަށް ވިދާޅުވެފައިވެއެވެ.
ރައީސްގެ ހިތާބު ނިންމަވާލެއްވީ ރަމަޟާން މަހާ ކުރިމަތިލާއިރު، އިސްލާމްދީނުގެ އިޖްތިމާޢީ އަގުތައް، އޭގެ އެންމެ ފުރިހަމަ ގޮތުގައި ދެމެހެއްޓުމަށް، އިތުރު ސަމާލުކަމެއް ދޭންޖެހޭކަން ފާހަގަކުރައްވައި ރައީސް ވަނީ މުޖުތަމައުގެ ރީތި ހަމަތަކާއި އަދަބުތަކަށް ހުރުމަތްތެރިކޮށް ހިތައި، ގާނޫނުތަކަށާއި ގަވާއިދުތަކަށް ފުރިހަމައަށް ބޯލެނބުމުގެ ރޫހު ރަމަޟާން މަސް ފަދަ އިސްލާމީ މުނާސަބަތެއްގައި އާލާކޮށް ދިރުވަންޖެހޭނެ ކަމަށް ވިދާޅުވަމުންނެވެ.
