ނިޒާމްބެ އޭއެފްސީ އޭ ލައިސަންސް ނަގަނީ
5 މެއި 2019 | އާދީއްތަ 12:49ނިޒާމްބެ ކޯސް ފުރިހަމަކުރަނީ ބަންގްލަދޭޝްގައި
މުހައްމަދު ނިޒާމް
ޓީސީ ސްޕޯޓްސް ކްލަބްގެ ކުރީގެ ކޯޗު މުހައްމަދު ނިޒާމް (ނިޒާމްބެ) އޭއެފްސީ އޭ ލައިސަންސް ކޯސް ފުރިހަމަކުރުމުގެ މަސައްކަތް ފަށައިފިއެވެ.
ބަންގްލަދޭޝްގެ ޑާކާގައި މިހާރު ކުރިޔަށްދާ އޭ ލައިސަންސް ކޯޗިން ކޯހުގައި ނިޒާމްބެ ބައިވެރިވެފައިވާއިރު، މި ކޯސް މި މަހު 14ގެ ނިޔަލަށް ކުރިޔަށްދާނެއެވެ.
ޖުމްލަ 21 ފަރާތަކުން ބައިވެރިވި މި ކޯހުގައި ރާއްޖެ އިން ބައިވެރިވެފައި ވަނީ ނިޒާމްބެ އާއި މުހައްމަދު ޝާހިދު (ޝާޑު) އެވެ. މި ކޯހުގައި ރާއްޖޭގެ އިތުރުން ބަންގްލަދޭޝް، ސްރީލަންކާ، އިންޑިއާ، ބޫޓާން އަދި މެލޭޝިއާގެ ކޯޗުން ބައިވެރިވެއެވެ.
ބަންގްލަދޭޝް ފުޓްބޯޅަ ފެޑެރޭޝަނުގެ ޓެކްނިކަލް އެންޑް ސްޓްރެޓީޖިކް ޑިރެކްޓަރު ޕައުލް ތޯމަސް ސްމޯލޭ ކުރިޔަށްގެންދާ މި ކޯހުގައި ބައިވެރިވެވޭނީ އޭއެފްސީ ބީ އާއި ސީ ލައިސަންސް ލިބިފައިވާ ކޯޗުންނަށެވެ. މި ކޯހުގައި ޕްރެކްޓިކަލް ބައިގެ އިތުރުން ތިއަރީ ބައި ވެސް ހިމެނެ އެވެ.
އެފްއޭއެމުން މި އަހަރުގެ ގަވާއިދެއްގެ ގޮތުގައި ކަނޑައަޅާފައި ވަނީ ޓީމުތަކުގެ ކޯޗުންނަށް ތިބެން ޖެހޭނީ އޭ ލައިސަންސް ކޯޗުން ކަމަށެވެ.
ފާއިތުވެދިޔަ ދެ އަހަރު ރާއްޖޭގެ އެންމެ މޮޅު ކޯޗުގެ މަގާމު ހޯދާފައިވާ ނިޒާމްބެ އިރުޝާދުގެ ދަށުން ޓީސީން ނިމިދިޔަ ސީޒަނުގެ ދިވެހި ޕްރިމިއާ ލީގު ކާމިޔާބުކޮށްފައިވާއިރު، އެޓީމުން ވަނީ ބަންގްލަދޭޝްގައި ބޭއްވި ޝައިހް ކަމާލް އިންޓަނޭޝަނަލް ކަޕް ވެސް ކާމިޔާބުކޮށްފައެވެ.
މީގެ އިތުރުން ނިޒާމްބެ އިރުޝާދުގެ ދަށުން ޓީސީ ވަނީ ދެވަނަ ޑިވިޝަނުން ފުރަތަމަ ޑިވިޝަނަށް ޕްރޮމޯޓްވެ، ވިދިވިދިގެން ތިން އަހަރު ދިވެހި ޕްރިމިއާ ލީގުގެ ދެވަނަ ހޯދާފައެވެ. އަދި ނިޒާމްބެ އިރުޝާދުގެ ދަށުން ޓީސީން ދެ ފަހަރު އެފްއޭކަޕްގެ ދެވަނަ ހޯދާފައިވާއިރު، ޕްރެޒިޑެންޓްސް ކަޕްގެ ދެވަނަ އެއް ފަހަރު ހޯދާފައި ވެއެވެ.
