ކޮންމެ އަހަރަކު ރަމަޟާން މަހު ރާއްޖެ ޓީވީން ގެނެސްދޭ ހެއްވާ މަޖާ ޕްރޮގްރާމް "ދަންބައި" ގެ ޓްރެއިލާ ރިލީޒްކޮށްފިއެވެ.

މި ޕްރޮގްރާމުގެ ޕްރޮޑިއުސަރ އަދި ޑައިރެކްޓަރ އާދަމް ޒަރީރު ބުނީ އެހެން އަހަރުތަކެކޭ ވެސް އެއްފަދައިން މި އަހަރުގެ ރޯދަމަހުވެސް ގެނެސްދޭ ދަންބައި ޕްރޮގްރާމުގައި ފެނިގެންދާނީ ރާއްޖޭގެ މިހާރުގެ ސިޔާސީ މަސްރަހަށް އަލިއަޅުވާލާ ހެއްވާ މަޖާ ކަންތައްތަކެއް ކަމަށެވެ.

 މީގެ އިތުރުން ދަންބައިގެ "ގަމަރު ޚަބަރު" ގެ ބައިގެ ބަދަލުގައި ފެނިގެންދާނީ "ބައި ޚަބަރު" ކަމަށާއި މި ބައިގައިގައި ވެސް ފެނިގެންދާނީ އެހެން އަހަރުތަކުގައި ވެސް ފެނިގެންދާ ފަދަ ބެލުންތެރިން ޝައުގުވެރިވާނެ ޚަބަރުތަކެއް ކަމަށް ޒަރީރު ބުންޏެވެ.

މިދިޔަ އަހަރުތަކާ ޚިލާފަށް ދަންބައިގެ ބައިތައް ގެނެސްދޭ ގޮތް ވަރަށް ތަފާތު ވާނެ ކަމަށް ޒަރީރު ބުންޏެވެ.

"ދަންބައި" ގައި ފެނިގެންދާނީ ރާއްޖެ ޓީވީގައި މިހާރު ވެސް މަސައްކަތް ކުރަމުންދާ އަދި ކުރިން ވެސް ރާއްޖެ ޓީވީގައި މަސައްކަތް ކޮށްފައިވާ މުވައްޒަފުންގެ ތަފާތު ހުނަރުތަކެކެވެ.

"ދަންބައި" ޕްރޮގްރާމު ރާއްޖެ ޓީވީން މެދުކެނޑުމެއް ނެތި ގެނެސްދޭތާ މިއީ ހަވަނަ އަހަރެވެ.

މި ޕްރޮގްރާމް ފުރިހަމަކޮށް ގެނެސްދިނުމުގައި ރާއްޖެ ޓީވީގެ ޓެކްނިކަލް ޓީމާއި ރާއްޖެ ޓީވީގެ ހުރިހާ ޑިޕާޓްމަންޓަކުން ލިބެމުންދާ އެހީތެރިކަން ފާހަގަކޮށް ޒަރީރު ވަނީ ޝުކުރު އަދާކޮށްފައެވެ.