ކުރީގެ ރައީސް އަބްދުﷲ ޔާމީންގެ ސަރުކާރުގައި އޭރުގެ އިދިކޮޅު ފަރާތްތަކުން ކުރި މުޒާހަރާއެއް ކަވަރު ކުރަމުންދަނިކޮށް، ރާއްޖެޓީވީގެ ނޫސްވެރިޔާ ހުސައިން ހަސަން ހައްޔަރުކޮށް، އޭނާއަށް ފުލުހުން އަނިޔާކުރިކަން ތަހުގީގަށް ހާމަނުވާ ކަމަށް ނެޝަނަލް އިންޓަގްރިޓީ ކޮމިޝަން (އެންއައިސީ)އިން ބުނެފިއެވެ.
އައިއައިސީން އެގޮތަށް ބުނެފައި ވަނީ ނޫސްވެރިޔާ ހުސައިނަށް އަނިޔާ ކުރި މައްސަލަ ތަހުގީގު ކުރުމަށް ފަހު، މައްސަލަ ނިންމައި ރާއްޖެޓީވީއަށް ފޮނުވި ސިޓީގައެވެ. ކުއްލި ނުރައްކަލުގެ ހާލަތު އިއުލާން ކޮށްފައި ވަނިކޮށް، މިދިޔަ އަހަރުގެ ފެބްރުއަރީ މަހުގެ 16 ވަނަ ދުވަހުގެ ރޭ ގުޅިފައިވާ ސިޔާސީ ޕާޓީތަކުން ބޭއްވި އެއްވުން ކަވަރު ކުރަމުންދަނިކޮށް ފުލުހުންތަކެއް ހުސައިންނަށް އަނިޔާކުރި މައްސަލަ ބަލަން ރާއްޖެޓީވީން އެ ކޮމިޝަނަށް މައްސަލަ ހުށަހެޅީ މިދިޔަ އަހަރުގެ ފެބްރުއަރީމަހުގެ ފަހުކޮޅުއެވެ.
އެ މައްސަލާގައި ފުލުހުންތަކެއްގެ ބަޔާން އެންއައިސީން ނަގާފައިވެއެވެ. އަދި ހުސައިން ވެސް އެންއައިސީއަށް ހާޒިރުކޮށް ބަޔާން ނަގާފައިވެއެވެ.
އެންއައިސީން ރާއްޖެޓީވީއަށް ފޮނުވި ސިޓީގައި ބުނެފައި ވަނީ މުޒާހަރާ ކަވަރު ކުރަނިކޮށް، ހުސައިން ހައްޔަރު ކުރުމަށް ފަހު އޭނާ އަނިޔާކުރިކަން އެނގެނީ އޭނާ އެ ކަމިޝަނަށް ދީފައިވާ ބަޔާނުންނާއި ރާއްޖެޓީވީން ހުށަހެޅި ސިޓީން އެކަނި ކަމަށެވެ. ނަމަވެސް އެ ތުހުމަތުތަކަށް ފުލުހުން އިންކާރު ކޮށްފައިވާ ކަމަށް އެންއައިސީގެ ސިޓީގައިވެއެވެ.
އެގޮތުން އެއްވެސް ފުލުހަކު ހުސައިނަށް އަނިޔާކުރަނިކޮށް ފެނިފައި ނުވާ ކަމަށް ތަހުގީގަށް ބަޔާން ދީފައިވާ ފުލުހުން ބުނެފައިވާ ކަމަށާއި އެ ފުލުހުންގެ ބަޔާން ނަފީ ކުރާނެ އެއްވެސް ހެއްކެއް އަދި ގަރީނާއެއް އެ ކޮމިޝަންގެ ތަހުގީގަށް ލިބިފައިނުވާ ކަމަށެވެ.
"ޙުސައިން ހަސަން އަނިޔާވެރި ގޮތަކަށް ފުލުހުންގެ ބެލުމުގެ ދަށަށް ގެންގޮސްފައިވާ ކަމާއި ޙުސައިން ހަސަން ފުލުހުންގެ ސްޓޭޝަނަށް ގެންގޮސް ފުލުހުން، ޙުސައިން ހަސަންއަށް އަނިޔާ ކޮށްފައިވާކަން މި ކޮމިޝަންގެ ތަހުގީގަށް އެނގެން ނެތް ކަމަށް ކޮމިޝަނުން ނިންމައިފިކަމުގައި ދަންނަވަމެވެ،" އެންއައިސީން ރާއްޖެޓީވީއަށް ފޮނުވި ސިޓީގައިވެއެވެ.
މިދިޔަ އަހަރުގެ ފެބްރުއަރީ މަހުގެ 16 ވަނަ ދުވަހުގެ ރޭ ގުޅިފައިވާ ޕާޓީތަކުން މާލޭގައި ކުރި މުޒާހަރާ ކަވަރު ކުރަމުންދަނިކޮށް، ހުސައިން ހައްޔަރު ކުރުމަށް ފަހު ގެންދިޔައީ ގަލޮޅު ޕޮލިސް ސްޓޭޝަނަށެވެ. އެތަނުން ނެރެގެން، ފުލުހުންގެ ވެހިކަލަކަށް އަރުވައިގެން ޝަހީދު ހުސައިން އާދަމް ބިލްޑިންއަށް ވެއްދިއިރު، އޭނާއަށް އަނިޔާކޮށްފައިވުމުން، ގެންދިޔައީ އޭޑީކޭ ހޮސްޕިޓަލަށެވެ. އޭނާއަށް ލިބުނު އަނިޔާތަކާ ގުޅިގެން ލަންކާއަށް ގެންގޮސް ފަރުވާ ވެސް ދީފައިވެއެވެ.
ހުސައިނަށް އަނިޔާ ކުރި މައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)އިން ތަހުގީގު ކުރުމަށް ފަހު، އެ ކޮމިޝަނުން ބުނެފައި ވަނީ އޭނާއަށް އަނިޔާކުރީ ކޮން ފުލުހެއްކަން ނޭނގޭ ކަމަށާއި، ފުލުހުން ޤަސްދުގައި ހުސައިން އަށް އަނިޔާއެއް ނުދޭ ކަމަށެވެ.
