އެއްބަސްވުން އާކުރުމާ ގުޅޭގޮތުން ޗެލްސީއަށް ކުޅެމުން އަންނަ ޑޭވިޑް ލުއިޒް އެ ކްލަބާ މަޝްވަރާކޮށްފިއެވެ.

ލުއިޒްއާ ގުޅޭގޮތުން ޗެލްސީގެ ކޯޗު މައުރީޒިއޯ ސާރީ ބުނީ، ލުއިޒް މަޑުކުރާނެ ކަން އޭނާއަށް ނޭގޭ ކަމަށާއި، ނަމަވެސް އެއްބަސްވުމާ ގުޅޭގޮތުން ކްލަބާއެކު އޭނާ ދާދި ފަހުން މަޝްވަރާކޮށްފައިވާ ކަމަށެވެ.

ބައެއް ރިޕޯޓްތައް ބުނާގޮތުން ޗެލްސީއާއެކު ލުއިޒް ހަދާ އާ އެއްބަސްވުމުގެ ދަށުން އޭނާ އިތުރު އެއް އަހަރަށް ކްލަބުގައި މަޑުކުރާނެއެވެ. ނަމަވެސް ބައެއް ރިޕޯޓްތައް ބުނާ ގޮތުން މި ސީޒަނަށްފަހު ޗެލްސީއާއެކު ލުއިޒް ހަދާފައިވާ އެއްބަސްވުން ހަމަވާއިރު، އޭނާ އެހެން ކްލަބަކަށް ބަދަލުވުމަކީވެސް ކައިރި ކަމެކެވެ.

ލުއިޒް ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ސްޕެއިން އަދި ޖަރުމަންގެ ބައެއް ކްލަބްތައްވެސް ހިމެނެއެވެ.

ބެންފީކާއަށް 132 މެޗު ކުޅެފައިވާ ޑޭވިޑް ލުއިޒު ވަނީ އެ ކްލަބާ އެކު ގިނަ ކާމިޔާބީތަކެއް ހޯދާފައެވެ. އެ އަށް ފަހު ޗެލްސީ އަށް އޭނާ ބަދަލުވިއިރު، ޗެލްސީ އަށް އޭނާ ވަނީ 143 މެޗު ކުޅެ އެ ކްލަބާއެކު ޔުއެފާ ޗެމްޕިއަންސް ލީގު އަދި ޔުއެފާ ޔޫރޮޕާ ލީގު ވެސް ކާމިޔާބުކޮށްފައެވެ.

ޗެލްސީ ދޫކޮށް ޑޭވިޑް ލުއިޒް ޕީއެސްޖީ އަށް ބަދަލުވީ 2014 ވަނަ އަހަރުގެ ސީޒަނުގައެވެ. އޭނާ ވަނީ އެ ކްލަބަށް 89 މެޗު ކުޅެ، ފްރެންޗް ލީގު ދެފަހަރު އަދި ފްރެންޗް ކަޕް ދެފަހަރު ކާމިޔާބުކޮށްފައެވެ.

ޕީއެސްޖީ ދޫކޮށް ޑޭވިޑް ލުއިޒް ޗެލްސީއާ އަލުން ގުޅުނީ 2016 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް 101 މެޗު ކުޅެދީފައެވެ.

ބްރެޒިލް ގައުމީ ޓީމާއެކު 2013 ވަނަ އަހަރު ފީފާ ކޮންފެޑެރޭޝަންސް ކަޕް ކާމިޔާބުކޮށްފައިވާ ޑޭވިޑް ލުއިޒް ވަނީ އެޓީމަށް 56 މެޗު ކުޅެފައެވެ.