ސައުދީގައި ހައްޔަރުކޮށްފައި ތިބި ބައެއް އަންހެން އެކްޓިވިސްޓުން ވަގުތީ ގޮތުން މިނިވަންކޮށްފި

ސައުދީ އަރަބިއާއިން ހައްޔަރުކޮށްފައިވާ އަންހެން އެކްޓިވިސްޓުންގެ ތެރެއިން 4 މީހަކު ވަގުތީގޮތުން މިނިވަން ކޮށްފައިވާކަމަށް، އެމީހުން މިނިވަންކުރުމަށް މަސައްކަތްކުރާ ޖަމިއްޔާތަކުން ބުނެފިއެވެ.

މި ހަތަރު މީހުން ދޫކޮށްލުމާއިއެކު، ސައުދީ ސަރުކާރުން ހައްޔަރުކުރި އަންހެން އެކްޓިވިސްޓުންގެ ތެރެއިން ވަގުތީގޮތުން ދޫކޮށްލި މީހުންގެ އަދަދު ވަނީ ހަތަކަށް އަރާފައެވެ. މި އެންމެންވެސް ދޫކޮށްލީ އެ މީހުންގެ މައްޗަށް ދައުވާ ކުރުމަށް ޝަރީއަތަށް ފޮނުވުމަށްފަހުއެވެ.

ލަންޑަނުގައި ހަރަކާތްތެރިވާ ހައްޤުތަކާއި ބެހޭ އަރަބި ޖަމާއަތެއްކަމަށްވާ އަލްޤުސްޠުން ކުރި ޓްވީޓެއްގައި ބުނީ، ހައްޔަރުކޮށްފައިވާ މީހުންގެ ތެރެއިން ހަތޫން އަޖްވަދު އަލް ފައްސީ އާއި އާމާލް އަލް ހަރްބީ އަދި މައިސާ އަލް މާނިއާގެ އިތުރުން އަބީރް އަބްދުއްލަޠީފް އަލް ނަމަންކަނީ ވަގުތީގޮތުން މިނިވަންކޮށްފައިވާ ކަމަށެވެ.

އެ ޓްވީޓްގައި އިތުރަށް ބުނެފައިވަނީ މި 4 އެކްޓިވިސްޓުންނާއިއެކު އިތުރު އެކްޓިވިސްޓެއްވެސް މިނިވަންކޮށްފައިވާކަމުގެ މަޢުލޫމާތު ލިބިފައިވާ ކަމަށާއި، ނަމަވެސް އެކަން ކަށަވަރު ކުރެވިފައި ނުވާ ކަމަށެވެ. ސައުދީ ސަރުކާރުން ހައްޔަރުކުރި 11 އެކްޓިވިސްޓުންގެ އާއިލާތަކާއި ގާތް މީހަކުވެސް ވަނީ ބުރާސްފަތި ދުވަހު ފަސްވަނަ އެކްޓިވިސްޓަރު މިނިވަން ކޮށްފައިވާކަމަށް ބުނެފައެވެ. ނަމަވެސް އެއީ ކާކުކަމެއް އެފަރާތުން ބުނެފައެއް ނުވެއެވެ.

މިކަމާއި ގުޅިގެން ސައުދީ ސަރުކާރުން މިހާތަނަށް އެއްޗެއް ބުނެފައެއް ނުވެއެވެ.

ވަގުތީގޮތުން މިނިވަން ކުރި އެކްޓިވިސްޓުންނާއި، ބަންދުގައި މިހާރު ތިބި އެކްޓިވިސްޓުންވެސް ވަނީ އެމީހުން ބަންދުގައި ތިބޭތާ އަހަރެއްހާ ދުވަސް ވެފައިވާއިރު، އެ މުއްދަތުގައި ތަހުގީގު ކުރާ ފަރާތްތަކުން އެމީހުންނަށް ޖިންސީ ގޯނާ އާއި ލާއިންސާނީ އަނިޔާ ކޮށްފައިވާ ކަމަށް ތުހުމަތު ކޮށްފައެވެ. މި 11 އެކްޓިވިސްޓުންގެ މައްޗަށްވެސް ކޮށްފައިވަނީ ބޭރުގެ މީޑިއާތަކާއި، ޑިޕްލޮމޭޓުންނާއި، ހައްޤުތަކަށް މަސައްކަތްކުރާ ޖަމިއްޔާތަކާއި ގުޅުންބާއްވާ ކަމުގެ ދައުވާއެވެ.

ބުރާސްފަތި ދުވަހު 4 އެކްޓިވިސްޓުން ދޫކޮށްލިއިރު، ސައުދީ ސަރުކާރުން މި އަހަރުގެ މާރިޗު މަހުވެސް ވަނީ 3 އެކްޓިވިސްޓަކު ވަގުތީ ގޮތުން މިނިވަން ކޮށްފައެވެ. އެފަހަރު މިނިވަންކުރީ ކިންގް ސަލްމާން ޔުނިވަރސިޓީގެ ކުރީގެ ލެކްޗަރަރ އަޒީޒާ އަލް ޔޫސުފާއި، ބްލޮގަރ އީމާން އަލް ނަފްޖާންގެ އިތުރުން އިލްމުވެރިއެއްކަމަށްވާ ރޮކާޔާ އަލް މޮހާރިބްއެވެ.

އަދިވެސް ބަންދުގައި ހުރި އިސް އެކްޓިވިސްޓެއް ކަމަށްވާ ލުޖެއިން އަލް ހަތްލޫލްގެ އާއިލާއިން ވަނީ ލުޖެއިން އާއި މެދު އަމަލުކުރަމުންދާ ގޮތުން ވާހަކަ ނުދެއްކުމަށް އިންޒާރުދީ، ސައުދީ ސަރުކާރާއި ގާތް ގުޅުން އޮންނަ ފަރާތްތަކުން އެ އާއިލާއަށް ބިރުދައްކަމުންދާ ކަމަށް ބުނެފައެވެ. ލުޖެއިން އަކީ ތަހުގީގު ކުރާ ފަރާތްތަކުގެ ޖިންސީ ޝިކާރައަކަށްވި އެއް އެކްޓިވިސްޓް ކަމަށް ހައްޤުތަކަށް މަސައްކަތްކުރާ ޖަމާއަތްތަކުން ވަނީ ބުނެފައެވެ.

މި ތުހުމަތުތަކާއި ގުޅިގެން ސައުދީގެ ޕްރޮސެކިއުޓަރުން ޝަރީއަތުގައި ބުނެފައިވަނީ އެއީ ހިނގާފައިވާ ކަމެއް ނޫން ކަމަށެވެ.

ސައުދީ ސަރުކާރުން ހައްޔަރުކުރި އަންހެނުން ދޫކޮށްލުމަށް ހުޅަނގުގެ ޤައުމުތަކުން ސައުދީ ސަރުކާރަށް ވަރަށް ބޮޑަށް ޕްރެޝަރ ކޮށްފައިވާއިރު، އޭގެ ތެރެއިން ގިނަ މީހުން ހައްޔަރުކޮށްފައިވަނީ މިދިޔަ އަހަރުގެ ކުރީކޮޅުއެވެ.

އޭގެފަހުން ނިމިގެންދިޔަ މަހުވެސް ސައުދީ ސަރުކާރުން ވަނީ އަންހެން އެކްޓިވިސްޓުންތަކެއް ހައްޔަރުކޮށްފައެވެ. ހައްޔަރުކޮށްފައިވާ އަންހެން އެކްޓިވިސްޓުން މިނިވަންކުރުމަށް ކުރާ ކެމްޕެއިންއާއި ގުޅިގެން އޭޕްރީލް މަހު 9 ލިޔުންތެރިންނާއި އިލްމުވެރިން ހައްޔަރުކޮށްފައިވާއިރު، އޭގެ ތެރޭގައި އެމެރިކާގެ ދެ ރައްޔިތަކުވެސް ހިމެނެއެވެ.

އޭޕްރީލް މަހު ސައުދީ ސަރުކާރުން ހިންގި އޮޕަރޭޝަން އަކީ ނިމިގެން ދިޔަ އަހަރުގެ އޮކްޓޯބަރ މަހު އިސްތަންބޫލުގައި ހުންނަ ސައުދީ ކޮންސިއުލޭޓުގައި ނޫސްވެރިޔާ ޖަމާލް ޚާޝުޤްޖީ މަރާލުމާއި ގުޅިގެން ސައުދީ ސަރުކާރަށް އަމާޒުވި ފާޑުކިޔުންތަކަށްފަހު ސައުދީން ހިންގި މިފަދަ ފުރަތަމަ އޮޕަރޭޝަނެވެ.