ސުޕްރީމް ކޯޓުން އިސްނަގައިގެން ޝަރުއީ ދާއިރާ އިސްލާހު ކުރުމަށް ކަމަށް ބުނެ، މަގުޗާޓު ނެރުމަކީ، ނުލިބޭ ބާރެއް ފަނޑިޔާރުން ބޭނުން ކުރުމުން ކަމަށާއި އެކަން ކުރި ފަނޑިޔާރުންނާ މެދު ފިޔަވަޅު އަޅަން ޖެހޭ ކަމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު ކަމަށް އިންތިހާބުވެވަޑައިގެންނެވި ގާނޫނީ ވަކީލް މޫސާ ސިރާޖު ވިދާޅުވެއްޖެއެވެ.

ޝަރުއީ ދާއިރާ އިސްލާހު ކުރުމަށް ކަމަށް ބުނެ، ސުޕްރީމް ކޯޓުން އެކުލަވާލި މަގުޗާޓަކީ ޔޫއެންޑީޕީގެ މަޝްވަރާ އާއި ރާއްޖޭގެ ޝަރުއީ ދާއިރާއާ ގުޅޭ ގޮތުން ހަދާފައިވާ ދިރާސާތަކަށް ބަލައިގެން އެކުލަވައިލި އެއްޗެއް ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން ބުންނެވެ. އެ މަގުޗާޓުގައިވާ ބައެއް ކަންތައްތަކުގެ ތެރޭގައި ޖޭއެސްސީ އަލުން އެކުލަވާލުމާއި ފަނޑިޔާރުން އައްޔަން ކުރުމާއި ވަކި ކުރުމުގެ ނިޒާމު ހަރުދަނާ ކުރުމާއި ފަނޑިޔާރުން ޖަވާބުދާރީ ކުރެވޭނެ ނިޒާމެއް ގާއިމު ކުރުމާއި ފަސޭހައިން ޝަކުވާ ހުށަހެޅޭނެ ނިޒާމެއް ގާއިމު ކުރުން ހިމެނެއެވެ.

ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަދައްކަމުން ސިރާޖު ވިދާޅުވީ، "ފަނޑިޔާރުގެއިން، ފަނޑިޔާރުގެ އިސްލާހު" ކުރުމުގެ މަސައްކަތް ނުކުރެވޭނެ ކަމަށެވެ. ސުޕްރީމް ކޯޓުން ހަދައިގެން އުޅޭ މަގުޗާޓަކީ ޝަރުއީ ދާއިރާ އިސްލާހު ކުރުމަށް އެމްޑީޕީން އެކުލަވާލި ''އެޖެންޑާ 19'' ހުއްޓުވަން ހުށައަޅަން އުޅޭ އެއްޗެއް ކަމަށް އޭނާ ވިދާޅުވިއެވެ.

''އަޅުގަނޑުމެން އެކަން ކުރަން ފެށީމަ އެކަން ހުއްޓުވަން އަމިއްލަ އެޖެންޑާ އެއް ނެރެގެން އަމިއްލަ ކަންތައްތަކެއް ހިފައިގެން އަމިއްލަ މަގުޗާޓަކާއިގެން އަދި އެވެސް ގާނޫނު އަސާސީން ނުވަތަ އަމިއްލަ އެޖެންޑާ އަށް ނެރެގެން ގާނޫނު ނުލިބެ ބާރެއް... ސުޕްރީމް ކޯޓަށް އޭގެ އިތުރަށް ފުޅާވެގެން ގޮސް ދުނިޔޭގެ ލެއްވި ކަމެއް ރާއްޖޭގެ ހުރިހާ ކަމެއް އަތެއް ނުބޭނޭނެ،'' ސިރާޖް ވިދާޅުވިއެވެ.

ޝަރުއީ ދާއިރާ އިސްލާހުކުރުމަށް އަޑު އުފުލަމުންދާ ސިރާޖް ވިދާޅުވީ، މަޖިލީހުން އިސްތިޝާރި ލަފަޔަކަށް އެދިއްޖެނަމަ ސުޕްރީމް ކޯޓުން ލަފާއެއް ދެވިދާނެ ކަމަށާއި، ނަމަވެސް އެފަދަ މަގުޗާޓެއް ހެދުމުގެ ބާރު ސުޕްރީމް ކޯޓަށް ލިބިގެން ނުވާކަމަށެވެ. 

ސުޕްރީމް ކޯޓަކީ ގާނޫނު އަސާސީގެ ބެލެނިވެރި ފަރާތްކަމަށް ބުނާމުންދާތީވެ، ސިރާޖް ވިދާޅުވީ، އެ ވާހަކައަކީ ކަނޑައެޅިގެން ހަގީގަތާ ހިލާފު އަދި ނުރަނގަޅު ވާހަކައެއް ކަމަށެވެ. މިހާރު ތިބި '' ކޮރަޕްޓް'' ފަނޑިޔާރުންނާ އެކު ކުރިއަށް ދެވޭނެ ކަމަށް ގަބޫލު ނުކުރައްވާ ކަމަށް ސިރާޖު ވިދާޅުވިއެވެ.

ކޯޓުތަކުގައި ހިނގަމުންދާ ޝަރީއަތްތަކަށް ވަކާލާތު ކުރެއްވުމަށް، އާންމުކޮށް ވަޑައިގަންނަވާ ސިރާޖް ވިދާޅުވީ، ފަނޑިޔާރުންގެ އަމަލުތައް ހުރިގޮތް ވަރަށް ސާފުކޮށް ފެނިފައިވާ ކަމަށާއި، އެ ފަނޑިޔާރުންނަށް އިތުރު ބަދަލުތަކެއް އަންނާނެ ކަމަށް ގަބޫލުފުޅު ނުކުރައްވާ ކަމަށެވެ. ނުލިބޭ ބާރެއް ފަނޑިޔާރުން ބޭނުން ކުރުމަކީ ނުރައްކަތެރި ކަމަށް އޭނާ ވިދާޅުވިއެވެ.

 ''ދަށު ކޯޓުތަކުގެ ފަނޑިޔާރުން ނުފޫޒު ފޯރުވުން ދަށު ކޯޓުގައި ހުންނަ ފައިލް ނަގަނީ. މީހުންގެ މައްޗަށް ސުމޯޓޯ މައްސަލަ ހިންގަނީ. ދެން ތަންތަނުގައި ހުންނަ އުފެދިފައި ހުންނަ މުއައްސަސާތަކުގައި ހުންނަ ބާރުތައް ގެނެސް އަމިއްލަ އަތަދަށަށް ގެންނަނީ. އެކަންކަމެއް ނުކުރެވޭނެ. އެކަންކަން ކުރާނަމަ އަޅުގަނޑުމެން ޖެހޭނީ އެބޭފުޅުން ވަކިކުރަން'' ގާނޫނީ ވަކީލް ސިރާޖް ވިދާޅުވިއެވެ.  

ރައްޔިތުންގެ މަޖިލީހުގެ ފޮނަދޫ ދާއިރާއަށް އިންތިހާބުވެވަޑައިގަތް ސިރާޖް ވިދާޅުވީ، ރައްޔިތުން ހިތް އެދޭ ނަޒާހަތްތެރި ފަނޑިޔާރު ގެއެއް ނަވާރަ ވަނަ މަޖިލީހުގައި އުފައްދައިދޭނެ ކަމަށެވެ. ރައްޔިތުން ބޭނުންވާ ގޮތަށް ފަނޑިޔާރުގެއެއް އެކުލަވައިލުމުގެ މަސައްކަތް ކުރައްވާނެ ކަމަށް ވިދާޅުވިއެވެ.

ފަނޑިޔާރުގެއާ ބެހޭ ގޮތުން ކުރެއްވި ޓްވީޓަކާއި ގުޅިގެން ދާދި ފަހުން ސިރާޖް ވަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އަށް ހާޒިރުކޮށް ބަޔާން ނަގާފައެވެ.