އިންކަމް ޓެކްސްގެ ނިޒާމަކީ ވަރަށް ރަނގަޅު ނިޒާމެއް ކަމަށާއި އިންކަމް ޓެކްސް ނަގަން ފެށުމުން ޓެކްސްގެ ނިޒާމް ވަށާ ޖެހޭ ނިޒާމަކަށް ބަދަލުވެގެންދާނެ ކަމަށް މޯލްޑިވްސް މަނިޓަރީ އޮތޯރިޓީގެ ގަވަނަރ އަހްމަދު ނަސީރު ވިދާޅުވެއްޖެއެވެ.
އެމްއެމްއޭއިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ގަވަނަރ ނަސީރު ވިދާޅުވީ އިންކަމް ޓެކްސްގެ ޒަރީއާއިން އާމްދަނީ ފަރަގު ކުޑަކުރުމަށް އެހީތެރިކަން ލިބިގެންދާނެ ކަމަށެވެ.
އިންކަމް ޓެކްސްއިން ސީދާ ލިބިގެންދާނީ ކިހާ މިންވަރެއް ކަމެއް އަދި އެނގިފައިނުވާއިރު، އެމަސައްކަތް މިހާރު ކުރިއަށްދާއިރު އެންމެ މުހިއްމު އެއް ކަމަކީ މިއީ އާމްދަނީ ފަރަގު ކުޑަ ކުރުމަށްޓަކައި އެޅިގެންދާނެ މުހިއްމު ފިޔަވަޅެއް ކަމަށް ގަވަނަރ ވިދާޅުވިއެވެ.
ރާއްޖޭގެ އިގުތިސޯދު ހަރުދަނާކުރުމަށްޓަކައި، އާމްދަނީ އިތުރުކުރުމުގެ ގޮތުން އާ ސަރުކާރުން ޓެކްސްގެ ނިޒާމަށް ހުށަހަޅާފައިވާ އިންކަމް ޓެކްސް ތައާރަފުކުރުމުގެ ޕްލޭނަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ވެސް ވަނީ ތާއީދުކޮށްފައެވެ.
އަންނަ އަހަރު އިންކަމް ޓެކްސް ނަގަން ފަށޭނެ ކަމަށް ރައީސް އިބްރާހިމް މުހައްމަދު ސޯލިހު ވަނީ ވިދާޅުވެފަ އެވެ.
ރައީސްގެ ރިޔާސީ ވައުދުފުޅާއި އެއްގޮތަށް، ނަވާރަ ވަނަ ރައްޔިތުންގެ މަޖިލީހަށް އެމްޑީޕީގެ ފަރާތުން ހުށަހަޅާ ކަންކަމުގެ ތެރޭގައި "ފަރުދުންގެ އާމްދަނީ ޓެކްސް" ނަގަން ވަނީ ހިމަނާފަ އެވެ.
އެގޮތުން މަހަކަށް 60،000 އާއި 100،000 ރުފިޔާއާ ދެމެދު އާމްދަނީ ލިބޭ މީހުންގެ އަތުން 3.5 ޕަސަންޓުގެ ރޭޓުގައި ޓެކްސް ނަގާނެ ކަމަށާއި 100،000 އައި 150،000 ދެމެދު އާމްދަނީ އެއް ލިބޭ މީހުންގެ އަތުން 6.5 ޕަސަންޓުގެ ރޭޓުގައި އިންކަމް ޓެކްސް ދައްކަން ޖެހޭނެ ކަމަށް ވެސް އެ ބިލްގެ ޑްރާފްޓްގައިވެ އެވެ. އަދި ފިނޭންސް މިނިސްޓްރީ ވަނީ ހާއްސަ ޓެކްސް ޕޮލިސީ ޔުނިޓެއް ގާއިމުކޮށްގެން، ޓެކްސްގެ ނިޒާމް އިސްލާހު ކުރުމުގެ މަސައްކަތް ކުރަން ފަށާފައެވެ.
ޕާސަނަލް އިންކަމް ޓެކްސް ނަގަން ފަށައިފިނަމަ، އެކި ފަންތީގައި އާމްދަނީ ލިބޭ މީހުން މާ ރަނގަޅަށް ދެނެގަނެވޭއިރު، އެއާއި އެކު އާމްދަނީގެ ފަރަގު ކުޑަކުރުމަށް ކުރެވޭ މަސައްކަތަށް އިތުރު ބާރެއް ލިބިގެންދާނެއެވެ.
ލިބޭ އާމްދަނީ އާއި ހަރަދުތައް އެއްވަރެއްގައި ހިފެހެއްޓުމަކީ މުހިއްމު ކަމަށްވާއިރު ބޭރުގެ މާކެޓުތަކާއި އިގުތިސޯދުތަކަށް ބަރޯސާނުވެ، އާމްދަނީ ލިބޭނެ ރަނގަޅު ބިންގަލެއް ގާއިމުކުރަންޖެހޭއިރު، ދައުލަތުގެ ރިޒާވް ކުޑަވަނީ ކުރަންޖެހޭ ހަރަދުތަކާއި އެއްވަރަށް އާމްދަނީ އިތުރުނުވާތީއެވެ.
