ބާސެލޯނާ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީއަށް ކޯޗުކޮށްދިނުމަކީ ދެކުނު ހުވަފެނެއް ކަމަށް ސްޕެއިންގެ ކުރީގެ ކޯޗު ވިންސެންޓް ޑެލް ބޮސްކޭ ބުނެފިއެވެ.  

އާޖެންޓީނާގެ ރޭޑިއޯއަކަށް ދިން އިންޓަވިއުއެއްގައި ޑެލް ބޮސްކޭ ބުނީ، މެސީއަކީ މެސީ ކަމަށާއި، ދުނިޔޭގައި ހުރީ އެންމެ މެސީއެއް ކަމަށެވެ. އަދި އޭނާއަށް ކޯޗުކޮށްދިނުމަށް ދުށް ހުވަފެނެއް ކަމަށެވެ.

ޑެލް ބޮސްކޭ ބުނީ، މެސީ ސްޕެއިންގައި ކުޅުވުމަށް ސްޕެއިންގެ ފުޓުބޯޅަ ފެޑެރޭޝަނުން ވަރަށް މަސައްކަތް ކުރި ކަމަށާއި، ނަމަވެސް އެކަމާ ދެކޮޅު ހެދީ މެސީ ކަމަށެވެ.

މެސީ އޭނާގެ ގައުމު އާޖެންޓީނާ ދެކެ ވަރަށް ލޯބިވާކަން ފާހަގަކޮށް ޑެލް ބޮސްކޭ ބުނީ، ސްޕެއިންއަށް މެސީ ކުޅުނު ނަމަ ވަރަށް ތަފާތު ވާނެ ކަމަށެވެ.

ޑެލް ބޮސްކޭ ވަނީ ސްޕެއިނުން 2010 ވަނަ އަހަރު ވޯލްޑް ކަޕް ކާމިޔާބުކުރިއިރު، އެޓީމަށް އިރުޝާދު ދީފައެވެ. އެއީ އެޓީމުގެ ތާރީހުގައި ވެސް ވޯލްޑް ކަޕް ކާމިޔާބުކުރި ފުރަތަމަ ފަހަރެވެ. އަދި އޭނާގެ އިރުޝާދުގެ ދަށުން ސްޕެއިން ވަނީ 2012 ވަނަ އަހަރު ޔޫރޯ ވެސް ކާމިޔާބުކޮށްފައެވެ.

މި ސީޒަނުގައި މެސީ އަންނަނީ މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ މިހާތަނަށް މި ސީޒަނުގައި ބާސާއާއެކު ލަލީގާ ކާމިޔާބުކޮށްފައެވެ. އަދި އޭނާއަށް ކޮޕަޑެލްރޭ އާއި ޔުއެފާ ޗެމްޕިއަންސް ލީގު ބާސާއާއެކު ކާމިޔާބުކުރުމުގެ ފުރުސަތު ވެސް އެބައޮތެވެ.

މި ސީޒަނުގައި ބާސާއާއެކު ކުޅުނު ހުރިހާ މުބާރާތެއްގައި 48 ލަނޑު މިހާތަނަށް ކާމިޔާބުކޮށްފައިވާ މެސީއަކީ މި ސީޒަނުގައި ބާސާގެ ކެޕްޓަންއެވެ. އެގޮތުން އޭނާގެ ކެޕްޓަން ކަމުގެ ދަށުން ބާސާއަށް ތިން ތަށި ކާމިޔާބުކުރުމުގެ ފުރުސަތު އެބައޮތެވެ.

ގިނަ ބަޔަކު ދެކޭގޮތުގައި މި ސީޒަނުގައި އުމުރުން 31 އަހަރުގެ މެސީ ދައްކަމުން އަންނަ ކުޅުމާ އެކު އޭނާއަށް މި އަހަރުގެ އެންމެ މޮޅު ކުޅުންތެރިޔާގެ މަގާމު ލިބުމުގެ ފުރުސަތު ވެސް އެބައޮތެވެ.