ސްޓޫޑެންޓް އޮފް ދަ އިޔާ 2 ގެ ހޫކް އަޕް ރިލީޒްކޮށްފި

"ސްޓޫޑެންޓް އޮފް ދަ އިޔާ 2" ގެ ތިން ވަނަ ލަވަ "ހޫކް އަޕް" ރިލީޒް ކޮށްފިއެވެ.

މި ލަވައިގައި ފެނިގެންދަނީ މި ފިލްމްގައި ޚާއްސަ ފެނިލުމަކުން ފެނިގެންދާ އެއްތަރި ކަމަށްވާ އާލިއާ ބަޓް އާއި ޓައިގާ ޝްރޯފް އެވެ.

މި ލަވަ ރިލީޒް ކުރުމުގެ ކުރިން ހޮނިހިރު ދުވަހު ފިލްމްގެ ޕްރޮޑިއުސަރ ކަރަން ޖޯހަރު ވަނީ މި ލަވައިގެ ޓީޒާ ހިއްސާ ކޮށްފައެވެ.

މި ލަވައާއި ގުޅޭގޮތުން ޓައިގާ ބުނެފައިވަނީ އާލިއާ އާއި އެކު މިލަވަ ޝޫޓު ކުރުމަކީ މަޖާ ތަޖުރިބާއެއް ކަމަށާއި މި ލަވައަކީ ތަފާތު ލަވައެއް ކަމަށެވެ. އަދި މިފަދަ މަސައްކަތެއް ކުރިން ކޮށްފައި ނުވާ ކަމަށް ޓައިގާ ވަނީ ބުނެފައެވެ.

އާލިއާ އަކީ މަޝްހޫރު ތަރިއަކަށް ވީ ނަމަވެސް އާލިއާ އާއި އެކު މަސައްކަތް ކުރަން ވަރަށް ފަސޭހަ ކަމަށް ޓައިގާ ވަނީ ބުނެފައެވެ.

ގިނަ ކާމިޔާބީތައް ލިބިފައިވާއިރު ވެސް އާލިއާ އަކީ ވަރަށް ބުރަކޮށް ސެޓްގައި މަސައްކަތް ކުރާ ތަރިއެއް ކަމަށް ޓައިގާ ވަނީ ބުނެފައެވެ.

ސްޓޫޑެންޓް އޮފް ދަ އިޔާ 2 އަކީ 2012 ވަނަ އަހަރު ރިލީޒް ކުރި ފިލްމް "ސްޓޫޑެންޓް އޮފް ދަ އިޔާ" ގެ ސީކުއެލް އެކެވެ.

އާލިއާ ބޮލީވުޑަށް ތަޢާރަފް ވެގެން ގޮސްފައި ވަނީ "ސްޓޫޑެންޓް އޮފް ދަ އިޔާ" އިންނެވެ.

ސްޓޫޑޭންޓް އޮފް ދަ އިޔާ 2 ގައި ލީޑް ރޯލުން ފެނިގެންދާނީ ޓައިގާގެ އިތުރުން ބޮލީވުޑަށް އަލަށް ތަޢާރަފްވާ ދެތަރިން ކަމަށް ވާ ތާރާ ސުތޭރިއާ އަދި އަނަންޔާ ޕާންޑޭ އެވެ.