މިދިޔަ މާރޗް މަހު މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއަށް އެންމެ ގިނައިން ރިޕޯޓު ކޮށްފައިވަނީ ކުޑަކުދިންނަށް އަނިޔާކުރި މައްސަލަތައް ކަމަށް އެމިނިސްޓްރީން ބުނެފިއެވެ.

ޖެންޑަރ މިނިސްޓްރީގެ ތަފާސް ހިސާބުތަކުން ދައްކާގޮތުން ޖުމުލަ 253 މައްސަލަ ރިޕޯޓުކޮށް އެޓެންޑް ކޮށްފައިވާއިރު މިދިޔަ މަހު ރިޕޯޓް ކޮށްފައިވާ މައްސަލަ ތަކުގެ ތެރެއިން 52 އިން ސައްތަ އަކީ ކުޑަކުދިންނާއި ގުޅުން ހުރި މައްސަލަތައް ކަމަށެވެ.

އެގޮތުން ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 131 މައްސަލަ މިދިޔަ މަހު ވަނީ ރިޕޯޓު ކޮށްފައެވެ.  ޖިސްމާނީ ހާނީއްކައިގެ 38 މައްސަލަ ރިޕޯޓު ކޮށްފައިވެއެވެ.

މީގެ އިތުރުން އިހުމާލުވުމުގެ 35 މައްސަލަ، ޖިންސީ ހާނީއްކައިގެ 32 މައްސަލަ، ނަފްސާނީ ހާނީއްކައިގެ 14 މައްސަލަ، ގެވެށި އަނިޔާ ކުރާތަން ފެނުމުގެ 6 މައްސަލަ، އެހެން ކުދިންގެ ފަރާތުން އިންޓަނެޓް މެދުވެރިކޮށް ގަނާލިބުމުގެ 3 މައްސަލަ އަދި އެހެން ކުދިންގެ ފަރާތުން ގަނާލިބުމުގެ އަދި ފުރައްސާރައިގެ ޝިކާރައަކަށްވުމުގެ 2 މައްސަލަ ހިމެނެއެވެ.

މީގެ އިތުރުން ޙައްޤުތަކުން ކުޑަކުދިން މަޙްރޫމު ކުރުމުގެ 6 މައްސަލަ މިދިޔަ މަހު އެ މިނިސްޓްރީއަށް ވަނީ ރިޕޯޓު ކޮށްފައެވެ. މި މައްސަލަތަކުގެ ތެރޭގައި، ސާފު ބޯފެނާއި ކަރަންޓުގެ ޚިދުމަތަށް ހުރަސް އެޅުމުގެ 4 މައްސަލައާއި، ތަޢުލީމަށް ހުރަސް އެޅުމުގެ 1 މައްސަލަ އަދި އައިޑީކާޑު/ ޕާސްޕޯޓް/ އުފަންދުވަހުގެ ސެޓުފިކެޓު ހޯދުމާ ބެހޭ 1 މައްސަލަ ހިމެނެއެވެ.

ޖެންޑަރ މިނިސްޓްރީން ބުނީ ޢާއިލީ 27 މައްސަލަ މިދިޔަ މަހު އެ މިނިސްޓްރީއަށް ހުށަހަޅައިފައިވާ ކަމަށެވެ.

އަދި އެކި ބާވަތުގެ ކުށްކުރާ ކުޑަކުދިންގެ 5 މައްސަލަ، ކުޑަކުދިންގެ އަޚުލާޤާ ގުޅުން ހުރި 15 މައްސަލަ، ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 38 މައްސަލަ، ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުނަށް އަޅައިލުމާއި އެހީތެރިކަން ބޭނުންވެގެން 19 މައްސަލަ އަދި އަމިއްލަ ނަފުސަށް ގެއްލުންދިނުމާ ގުޅޭ 12 މައްސަލައެއް މިދިޔަ މަހު އެ މިނިސްޓްރީއަށް ވަނީ ރިޕޯޓް ކޮށްފައެވެ.