ސިޔާސީ ކަންކަމުގައި އަންހެނުންގެ ބައިވެރިވުން އިތުރުކުރުމާ ބެހޭ ގޮތުން ޓްރާންސްޕޭރެންސީ މޯލްޑިވްސް އާއި ޔޫއެންޑީޕީ ގުޅިގެން ބޭއްވި ސިމްޕޯޒިއަމް ނިންމާލައިފިއެވެ.
ދެ ދުވަހުގެ މުއްދަތަކަށް ކުރިއަށްގެން ދިޔަ މި ސިމްޕޯޒިއަމް ފަށާފައިވަނީ އޭޕްރިލް 28 ވަނަ ދުވަހުއެވެ.
ސިމްޕޯޒިއަމް ނިންމުމުގެ ރަސްމިއްޔާތުގައި ވާހަކަ ދައްކަވަމުން ޓްރާންސްޕޭރެންސީ މޯލްޑިވްސްގެ އެގްޒެކްޓިވް ޑިރެކްޓަރ މަރިޔަމް ޝިއުނާ ވިދާޅުވީ ސިމްޕޯޒިއަމްގައި ބައިވެރިވާން ޖެހޭ ގިނަ މުއައްސަސާތަކުން ބައިވެރިނުވުމަކީ ހިތާމަކުރައްވާ ކަމެއް ކަމަށެވެ.
ހޮޓެލް ޖެންގައި ބޭއްވި މި ސިމްޕޯޒިއަމް އަކީ ސިޔާސީ ގޮތުން އަންހެނުން ބައިވެރިކޮށް ސިޔާސީ ކަންކަމުގައި އަންހެނުން ކުރިއެރުވުމަށާއި އަންހެނުންގެ ހަމަހަމަކަމުގެ އެޖެންޑާއެއް ގާއިމް ކުރުމަށް މަގުފަހި ކުރުވުމަށްޓަކައި ބޭއްވި ބައްދަލުވުމެކެވެ.
މި ރަސްމިއްޔާތު ޝަރަފުވެރި ކޮށްދެއްވާފައި ވަނީ ޖެންޑަރ މިނސިޓަރ ޝިދާތާ ޝަރީފުއެވެ. އެކަމަނާ ވިދާޅުވީ ރާއްޖޭގައި މުޖުތަމައާ ގުޅޭ މުހިއްމު ނިންމުންތަކުގައި އަންހެނުންގެ ބައިވެރިވުން ނުހިމެނޭ ކަން ފާހަގަކުރެވޭ ކަމަށެވެ. ރާއްޖެ ސިޔާސީ ގޮތުން އެންމެ ހަލަބޮލި ވެގެން ދިޔަ ދުވަސްވަރު އަންހެނުން އިސް ސަފުގައި ހަރަކާތްތެރިވެފައިވާ މަންޒަރު ފެނުނު ކަމަށާއި އެހެން ނަމަވެސް މުހިއްމު ނިންމުންތަކުން އަންހެނުން ނުފެނުން އެއީ ސުވާލު އުފެދޭ ކަމެއް ކަމަށެވެ.
ޝިދާތާ ވިދާޅުވީ މި ސިމްޕޯޒިއަމުން ނިންމާ ނިންމުންތަކާއި ހިއްސާ ކުރާ މައުލޫމާތުތައް "އިމްޕްލިމެންޓް" ކުރުމަށް މަސައްކަތް ކުރައްވާނެ ކަމަށެވެ.
ޓްރާންސްޕޭރެންސީ މޯލްޑިވްސްގެ ފަރާތުން ބުނެފައިވަނީ ސިޔާސީ ކަންކަމުގައި އަންހެނުންގެ ބައިވެރިވުން އޮތް ގޮތާއި އަންހެނުން ސިޔާސީ ކަންކަމުގައި ބައިވެރިވުމަށް ހައްލު ހޯދައިދިނުމުގެ ގޮތުން އެ ބައްދަލުވުމުގައި މަޝްވަރާ ކޮށްފައިވާނެ ކަމަށާއި އެ މަޝްވަރާތަކުގައި ސިޔާސީ މައިދާނުގައި އަންހެނުންނަށް ދިމާވާ ގޮންޖެހުންތައް ދެނެގަނެ އެ ގޮންޖެހުންތަކުން އަރައިގަންނާނެ މަގުތައް ހޯދުމުގެ މައްޗަށް ވެސް މަޝްވަރާތައް ކުރެވިފައިވާ ކަމަށެވެ.
