އަންގާރަ ދުވަހު ސުޕްރީމް ކޯޓަށް ހާޒިރުވުމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއަށް ޗިޓު ފޮނުވައިފިއެވެ.
އިންތި ވިދާޅުވީ އޭނާ ސުޕްރީމް ކޯޓަށް ހާޒިރު ވުމަށް އަންގާފައި ވަނީ އަންގާރަ ދުވަހު ހެނދުނު 8:30 އަށް ކަމަށެވެ. އޭނާ އެކޯޓަށް ހާޒިރު ކުރުމަށް އެންގީ ބިރު ދެއްކުމަށް ކަމަށާއި ހާޒިރު ކުރި ނަމަވެސް ބިރުން ފަނޑިޔާރުގެ އިސްލާހުކުރުމުގެ ވާހަކަ ނުދައްކާ ނުހުންނަވާނެ ކަމަށް އިންތި ވިދާޅުވިއެވެ.
Just summoned to SC for April 30th at 8:30 am, while I’m in Parliament. Judicial threats cannot stop us!#ReformJudiciary#ReformSC pic.twitter.com/IQUE9piFrA
— ???????? ????? (@Imthiyazfahmy) April 29, 2019
އިންތި ވަނީ ފަނޑިޔާރުގެ އިސްލާހު ކުރަންޖެހޭ ވާހަކަ މީޑިއާތަކުގަ އާއި މަޖިލީހުގެ ޖަލްސާތަކުގައި ވެސް ދައްކަވާފައެވެ. އެގޮތުން ރާއްޖެޓީވީގެ "ފަލަ ސުރުޚީ"ގައި ޕްރޮގްރާމްގައި އިންތި ވިދާޅުވެފައި ވަނީ ގައުމާއި ދަރިންގެ ހައްގާއި ކުރިމަގަށް ފަނޑިޔާރުގެ އިސްލާހުކުރާ ވާހަކަ ދައްކަންޖެހޭ ކަމަށާއި، އޭނާ ހަލާކުވެދާނީ ފަނޑިޔާރުގެ އިސްލާހުކުރާ ވާހަކަ ދައްކައިގެން ކަމަށެވެ. އަދި އާ ގާނޫނު އަސާސީގެ އައުމުގެ ކުރިން މަގާމުން ވަކިވެފައިވާ ފަނޑިޔާރުންނަށް އިނާޔަތްތައް ލިބޭ ގޮތަށް ފަނޑިޔާރުންގެ ގާނޫނަށް ހުށަހެޅި އިސްލާހަކަށް ބަހުސް ކުރައްވަމުން މިދިޔަ ހަފްތާގައި އޭނާ ވިދާޅުވެފައި ވަނީ ސުޕްރީމް ކޯޓަކީ ރާއްޖޭގެ "ވަކަރުގެ" ކަމަށެވެ. އަދި ރާއްޖޭގެ ރައްޔިތުންނަށް ހައްގުވާނީ މި މިންވަރުގެ ސުޕްރީމް ކޯޓެއް ނޫން ކަމަށް ވިދާޅުވިއެވެ. ހޯމަ ދުވަހުގެ ޖަލްސާގައި ވެސް އިންތިވަނީ އެ ވާހަކަތައް ތަކުރާރުކުރައްވާފައެވެ.
އިންތި ހާޒިރު ކުރަން ޗިޓު ފޮނުވާފައިވާއިރު ސުޕްރީމް ކޯޓަށް ފާޑުވިދާޅުވެގެން މަރުތައް ބަލާ ކޮމިޝަންގެ ރައީސް އަދި ކުރީގެ ބަންޑާރަ ނައިބު ހުސްނުއްސުއޫދާއި ގާނޫނީ ވަކީލު މޫސާ ސިރާޖު ވެސް ވަނީ ސުޕްރީމް ކޯޓަށް ހާޒިރުކޮށް ބަޔާން ނަގާފައެވެ.
