ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ކޮންގްރެސް ނިންމުމުގެ ގޮތުން ބޭއްވި ޖަލްސާއަށް ކުރީގެ ރައީސް އަބްދުﷲ ޔާމީން ވަޑައިނުގެންނެވީ މިހާރުގެ ހާލަތުގެ ސަބަބުން ކަމަށް އެ ޕާޓީން ބުނެފިއެވެ. 

ޕީއެންސީން ކުރިން ބުނީ، ކޮންގްރެސް ނިންމުމުގެ ޖަލްސާގައި ޕީޕީއެމްގެ ރައީސް އަބްދުﷲ ޔާމީން ބައިވެރިވެވަޑައިގަންނަވާނެ ކަމަށެވެ. އަދި ޕީއެންސީގެ ބައެއް އިސް ބޭފުޅުން އެކަން ހާމަކޮށް ޓުވީޓްތައް ކުރައްވަމުންގެންދެވިއެވެ. ނަމަވެސް ޖަލްސާ ފެށުނުއިރުވެސް އަބްދުﷲ ޔާމީން ޖަލްސާގައި ބައިވެރިވެވަޑައިގަތުމަށް، ޖަލްސާ ބާއްވާ ހޯލަށް ވަޑައިގެންފައެއް ނުވެއެވެ. 

އަބްދުﷲ ޔާމީން ޖަލްސާއަށް ވަޑައިނުގަތުމުން، ޖަލްސާގެ ބައިވެރިންނާއި ވާހަކަދައްކަވަމުން ޕީއެންސީގެ ނައިބް ރައީސް މުހައްމަދު ހުސެއިން ޝަރީފް (މުންދު) ވިދާޅުވީ ހާލަތު އޮތް ގޮތުގެ ސަބަބުން އަބްދުﷲ ޔާމީން ޖަލްސާގައި ބައިވެރިވެވަޑައިނުގެންނެވީ ކަމަށެވެ. އެގޮތުން އަބްދުﷲ ޔާމީންގެ މައްޗަށް ދައުވާއެއް އުފުލި، ޝަރީއަތް ކުރިއަށްދާތީ މިއީ ޖަލްސާގައި ބައިވެރިވެވަޑައިގެންނެވުމަށް އެންމެ ރަނގަޅު ވަގުތުކަމަށް އެމަނިކުފާނުވެސް އަދި ޕީއެންސީންވެސް ގަބޫލުނުކުރާތީ، ބައިވެރިވެވަޑައިނުގެންނެވުުމަށް ނިންމެވީ ކަމަށެވެ. 

"އެހެން ނަމަވެސް އެމަނިކުފާނު ތިޔަބޭފުޅުންގެ މި ބައްދަލުވުން، ދެވަނަ ދަންފަޅި ހަމަ ބައްލަވަމުންގެންދަވާ. އަދި އިރާދަފުޅުކުރެއްވިއްޔާ އަޅުގަނޑުމެންގެ އަޒުމަކީ ފޯރިގަދަ ޖަލްސާއަކުން މާ ލަހެއް ނުވެ، އަޅުގަނޑުމެންގެ ދެ ޕާޓީންވެސް އިރާދަކުރެއްވިޔާ އިންތިޒާމްކުރެވިގެން އެމަނިކުފާނު މި ދުއްތުރާތަކުންނާއި، ފިއްތުންތަކުން ސަލާމަތްވެ އެމަނިކުފާނާއެކު ބައްދަލުކުރެވި، ތިޔަ ބޭފުޅުންނާއި މުހާތަބުކުރައްވާ އެއްޗެއް ވިދާޅުވެވޭނެފަދަ މާހައުލަކުން ބައްދަލުވެވޭނެކަމަށް" 

އަބްދުﷲ ޔާމީންގެ މައްޗަށް ދައުލަތުންް މަނީ ލޯންޑަރިންގެ ދައުވާ އުފުލާފައިވާއިރު، އެ މައްސަލާއިގެ ފުރަތަމަ އަޑުއެހުން ވަނީ ނިމުނު ހަފްތާގެ ތެރޭގައި ބާއްވާފައެވެ. ދައުލަތުގެ ފަރާތުން ވަނީ ޔާމީނާ ދެކޮޅަށް 8 ހެއްކެއް ހުށަހަޅާފައެވެ. އަދި ބައެއް ލިޔެކިޔުންތައް ހުށަހަޅާފައިވެއެވެ. 

މައްސަލައިގެ ޝަރީއަތް ނިމެންދެން ބަންދުގައި ހުންނެވި ޔާމީން، ދޫކޮށްލިފަހުން އެއްވެސް ސިޔާސީ ހަރަކާތެއްގައި ބައިވެރިވެވަޑައިގެންފައެއް ނުވެއެވެ. މިނިވަންވެވަޑައިގެންފަހުން އެމަނިކުފާނު ހަމައެކަނި ބައިވެރިވެވަޑައިގެންފައިވަނީ ޕީޕީއެމް އޮފީހުގައި ބޭއްވި ބައެއް ހަރަކާތްތަކުގައާއި، ފޯން ކޯލް މެދުވެރިކޮށް ދެއްވި ސްޕީޗްތަކެއްގައެވެ.