1440ވަނަ އަހަރުގެ ރަމަޟާން ހަދިޔާގެ ގޮތުގައި ހޯރަފުށީގައި މީހުން ދިރިއުޅޭ ކޮންމެ ގެއަކަށް ހަނޑޫ ބަސްތާއަކާއި ހަކުރު ބަސްތާއެއް ހަދިޔާ ކުރުމަށް ހޯރަފުށި ކައުންސިލް އިން ނިންމައިފިއެވެ.

ކައުންސިލްގެ ރައީސް މުހައްމަދު ވަހީދު ވިދާޅުވީ މިރަމަޟާން މަހަށް ޚާއްސަކޮށް ކޮންމެ ގޭބިސީއަކަށް ހަނޑޫ، ހަކުރު ބަސްތާ ދިނުމަށް ނިންމީ ކައުންސިލްގެ ހުރިހާ މެންބަރުންގެ އިއްތިފާގުން ކަމަށެވެ. އަދި ޚަރަދު ކުރުމަށް ނިންމާފައިވަނީ ކައުންސިލްގެ އެހީގެ ގޮތުގައި ލިބިފައިވާ ފައިސާއިން ކަމަށެވެ.

ވަހީދު ވިދާޅުވީ މިފަދަ ހަދިޔާއެއް ކައުންސިލުން ދިނުމަށް ނިންމި މިއީ ފުރަތަމަ ފަހަރު ކަމަށާއި ކުރިއަށް އޮތް ތިންވަރަކަށް ދުވަސް ތެރޭގައި ބެހެން ފެށޭނެ ކަމަށެވެ. 

''މިހާރު މިކުރިއަށް ދަނީ އިދާރީ މަސައްކަތްތައް.ދެން ކުރިއަށް އޮތް ދެތިން ދުވަހެއްގެ ތެރޭގައި ބެހެން ފެށޭވަރުވާނެ. ރައްޔިތުންގެ ލާބަޔާ މަންފާއަށް ވިސްނާ ކުރަން ނިންމި ކަމެއް މިއީ. ވަހީދު ވިދާޅުވިއެވެ.  

ވަހީދު ވިދާޅުވީ ގާތްގަނޑަކަށް 700 ގެ ރަޖިސްޓްރީކޮށްފައި ހުރި ނަމަވެސް މީހުން ދިރިއުޅެމުން ގެންދަނީ 400 ގެއެއްގައި ކަމަށެވެ. އަދި މިމަސައްކަތަށް ދެލައްކައެއްހާ ރުފިޔާ ހޭދަވާނެ ކަމަށް އޭނާ ވިދާޅުވިއެވެ.

ހޯރަފުށީގެ އިތުރުން އެހެން ރަށްރަށުގައި ރަމަޟާން މަހަށް ޚާއްސަކޮށް ކައުންސިލްތަކުން އަންނަނީ ތަފާތު އެކި އެހީތެރިކަން ފޯރު ކޮށްދެމުންނެވެ. އެގޮތުން ބައެއް ރަށްރަށުގައި ކަރަންޓު ހިލޭ ދިނުމަށް ވަނީ ނިންމާފައެވެ.