ދުވަހަކުވެސް ތިޔަ އިއްޒަތްތެރި މެމްބަރުންގެ ހިތެއް ނުފުރޭނެ!

މިހާރު މި ހިނގަމުންދާ މަޖިލިސްގެ ފަހު ޖަލްސާތައް އަންނަ ހަފްތާގައި އޮންނާނެއެވެ. އަށާރަ ވަނަ ރައްޔިތުންގެ މަޖިލީހުގެ މެމްބަރުންގެ ތެރެއިން ގޮނޑި ދިފާއު ނުކުރެވި ނާކާމިޔާބުވި މެމްބަރުންގެ އަދަދު 60 އަށް ވުރެ ގިނައެވެ. އެ މެމްބަރުން މަޖިލީހުގައި ހޭދަކުރާނެ ފަހު ދުވަސްތައް ގުނަމުން އަންނަ އިރު، މީގެ ތެރެއިން ބައެއް މެމްބަރުން ފެންނަމުންދަނީ އަމިއްލަ އެދުމުން ފޯވެފައިވާ މަންޒަރެވެ. މެމްބަރު ކަމަށް ވަޑައިގަންނަވަން މީގެ ފަސް އަހަރު ކުރިން ރައްޔިތުންގެ ގާތަށް ވަޑައިގެން ވައުދުވެވަޑައިގެންފައި ވަނީ، ތިމަންނާމެން މަޖިލީހުގައި މަސައްކަތް ކުރާނީ ގައުމާއި ރައްޔިތުންގެ ހެވާއި ލާބައާއި މަންފާއަށް ކަމަށެވެ. އެ މެމްބަރުންގެ އަސްލު ސޫރަ ރައްޔިތުންނަށް ފެނުނީ އަދި ކިރިޔާއެވެ. އެ މެމްބަރުންގެ އަމިއްލަ އެދުމުން ފޯވެފައިވާ މިންވަރާއި، ދާއިރާ އާއި ގައުމަށް އިޚްލާސްތެރިކަން ނެތް މިންވަރެއެވެ.

ދައްކަން މި އުޅެނީ 18 ވަނަ މަޖިލިސްއަށް ފަހު މެމްބަރުކަމުގެ ގޮނޑި ގެއްލޭ މެމްބަރުން، މެމްބަރު ކަމުން ވަކިވެވަޑައިގެންނެވުމުގެ ކުރިން އެ މެމްބަރުންގެ އަމިއްލަ މަންފާ އާއި ލާބައަށް ކަމަށް ބެލެވޭ ގޮތަށް މަޖިލީހަށް ވައްދައިގެން އުޅޭ ބިލްތަކުގެ ވާހަކައެވެ. ރައްޔިތުންގެ މަޖިލީހުގެ އިއްޒަތްތެރި މެމްބަރުންނަށް އިނާޔަތާއި ރައްކާތެރިކަން ހޯދަން މަޖިލީހަށް ވައްދައިގެން އުޅޭ ބިލްތަކުގެ ވާހަކައެވެ.

ރައްޔިތުންގެ މަޖިލީހުގެ މެމްބަރުކަމުން ވަކިވުމުން، މެމްބަރުންނަށް ދޭ މުސާރައިން ވަކި ނިސްބަތެއް ދިނުމަށާއި އިނާޔަތްތައް މެދުނުކެނޑި ލިބޭ ގޮތަށް ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނަށް އިސްލާހު ގެންނަން މި ވަނީ ތިން ބިލެއް މަޖިލީހަށް ވައްދާފައެވެ. މި ތިން ބިލް ވެސް މަޖިލީހަށް ވައްދާފައި ވަނީ 18 ވަނަ މަޖިލީހާ އެކު، ދާއިރާގެ ގޮނޑި އާއި އަލްވަދާއު ކިޔަންޖެހޭނެ ތިން މެމްބަރުންނެވެ. އެއީ ދިއްދޫ ދާއިރާގެ މެމްބަރު އަބްދުއްލަތީފު މުހައްމަދާއި، ތިމަރަފުށީ ދާއިރާގެ މެމްބަރު މުހައްމަދު މުސްތަފާގެ އިތުރުން ވެލިދޫ ދާއިރާގެ މެމްބަރު އަބްދުﷲ ޔާމީން ރަޝީދެއެވެ. މީގެ ތެރެއިން ތިމަރަފުށީ ދާއިރާގެ މެމްބަރު މުހައްމަދު މުސްތަފާ ބުދަ ދުވަހުގެ ޖަލްސާގައި ވިދާޅުވެފައި ވަނީ އޭނާ މަޖިލީހުގެ އިމްތިޔާޒްތަކާއި ބެހޭ ގާނޫނަށް ގެންނަން ހުށަހެޅުއްވި އިސްލާހު ނަންގަވާނެ ކަމަށެވެ. ނަމަވެސް އަދި އެ އިސްލާހު ނެންގެވި ކަމެއް އެގިފައެއް ނެތެއެވެ.

އިމްތިޔާޒުގެ ގާނޫނަށް މެމްބަރު ލަތީފް ހުށަހެޅުއްވި އިސްލާހުގައި ބުނެފައި ވަނީ މެމްބަރުކަމުން ވަކިވުމުން މުސާރައިގެ ވަކި ޕަސެންޓެއް ދޭންޖެހޭނެ ކަމަށެވެ. ނަމަވެސް މިހާރު ގާނޫނުގައި ބުނެފައިވާ ގޮތުން އެ އިނާޔަތް ލިބޭނީ މެމްބަރުކަމުން ވަކިވުމަށް ފަހު، އުމުރުން 55 އަހަރުވުމުން ކަމަށެވެ. އެހެންކަމުން ލަތީފް މިހާރު މެމްބަރުންކަމުން ވަކިވެވަޑައިގެންނެވިޔަސް އޭނާގެ އުމުރުން 55 އަހަރު ފުރުމުން މުސާރަ އާއި އިނާޔަތް އޭނާއަށްވެސް ލިބިވަޑައިގަންނަވާނެއެވެ. ނަމަވެސް މެމްބަރު ބޭނުންފުޅުވަނީ މެމްބަރުކަމުން ވަކިވެވަޑައިގެންނެވި ކަމުގައިވިޔަސް ތާ އަބަދު އިނާޔަތާއި، ރައްކާތެރިކަން ހޯދާށެއެވެ. މެމްބަރުންނަށް ހީވާ ކަހަލައެވެ. މެމްބަރުކަމަށް ވަޑައިގަންނަވާ ހިސާބުން، ތާއަބަދުމެ އެ މެމްބަރުންނަށް ދައުލަތުން އިނާޔަތާއި ރައްކާތެރިކަން ދޭންޖެހޭނެ ކަމަށެވެ.

އިއްޒަތްތެރި މެމްބަރުން ވަނީ މެމްބަރުކަމުން ވަކިވިޔަސް ގިނަ އިނާޔަތްތަކެއް ހޯދަން ހުށަހަޅާފައެވެ. އޭގެ ތެރޭގައި އަނބިމީހާއަށާއި ފިރިމީހާއަށް ޑިޕްލޮމެޓިކް ޕާސްޕޯޓާއި އެއް ދައުރު އަދާކުރުމުން މެމްބަރެއްގެ މުސާރައިގެ 30 ޕަސެންޓް، ދެ ދައުރު އަދާކުރުމުން މެމްބަރެއްގެ މުސާރައިގެ 45 ޕަސެންޓް، ހެލްތު އިންޝުއަރެންސް އަނބިދަރިންނަށް، އެއާޕޯޓް ވިއައިޕީ ސާވިސް ހިދުމަތް، މިހެން ގޮސް ބޭނުންނުވާ އިނާޔަތެއް ނެތޭ ބުންޏަސް ދޮގަކަށް ނުވާނެއެވެ. މީގެ އިތުރުން މެމްބަރުކަމުން ވަކިވެވަޑައިގެން ސަރުކާރުގެ ވަޒީފާއެއް އަދާކުރިޔަސް އިނާޔަތް ހޯދަން ވެސް ވަނީ ހުށަހަޅާފައެވެ. މީހުން ބުނާތީ އަޑުއަހަމެވެ. ކިތަންމެ ވަރަކަށް ލިބުނަސް ހިތްނުފުރޭނެއެވެ.. ފެންނަނީ ހިތް ނުފުރިގެން އުޅޭ ތަނެއެވެ. މެމްބަރުންނާއި، މެމްބަރުންގެ އަނބިދަރިންނާއި އާއިލާ އުމުރު ތާއަބަދު ދައުލަތުން ބަލަންވެއްޖެ ނަމަ، ދައުލަތުން ހަމައެކަނި ބަލަންޖެހޭނީ މި ގައުމުގައި ރައްޔިތުންގެ މަޖިލީހުގެ އިއްޒަތްތެރި މެމްބަރުންނާއި އެމީހުންގެ އާއިލާތަކެވެ.

އެގޮތަށް ރައްޔިތުންގެ މަޖިލީހުގެ މަޖިލިސް މެމްބަރުންނަށް ދައުލަތުން އިނާޔަތް ދޭން ވެއްޖެނަމަ އިނާޔަތް ދޭންޖެހޭ މީހުންގެ ލިސްޓް ވަރަށްވެސް ދިގެއެވެ. މިސާލަކަށް ދަންނަވަންޏާ ކަތީބުންނާއި، ސްކޫލްތަކުގެ މުސްކުޅި ދަރިވަރުންނާއި، ސްކޫލްތަކުގެ ޕްރިފެކްޓްކަން ކޮށްފައި ތިބި މީހުންނާއި، މިހެން ގޮސް ހައްތާހާ ވެސް އިނާޔަތްދޭންޖެހޭ މީހުންނެވެ.

އިއްޒަތްތެރި މެމްބަރުންނެވެ. ނިކަން ގައުމު އޮތް ހާލަތާއި ދޭތެރޭ ވިސްނަވާށެވެ. މި ގައުމު މިހާރު އޮތް ހާލަތު އެންމެ ބޮޑަށް އެގިވަޑައިގަންނަވާނީ ތިޔަ އިއްޒަތްތެރި މެމްބަރުންނަށެވެ. މިހާރު ރައްޔިތުން ތި ވަނީ ތި ފަދަ މެމްބަރުންނަށް ބޮޑުތަނުން "ނޯ" ބުނެފައެވެ. ދެންވެސް ތި ފަދަ ބިލްތައް މަޖިލީހަށް ހުށަނާޅުއްވާ، ތިޔަ މެމްބަރުން ރައްޔިތުންގެ މަޖިލީހަށް އަލްވަދާއު ކިޔުމުގެ ކުރިން ގައުމަށް ރައްޔިތުންނަށް ފާއިދާ ހުރި އަގުހުރި މަސައްކަތެއް މަޖިލީހުގައި ތިޔަ މެމްބަރުންނަށް ކޮށްދެވޭތޯ ބައްލަވާށެވެ. އެންމެ ފަހު ދުވަހު ވެސް އަމިއްލަ އެ ދުން ދޫކޮށް ގައުމާއި ރައްޔިތުންގެ ހައްގުގައި ކަމެއް ކޮށްބަލާށެވެ.