މަމެން އިންޓަރ ސްކޫލް ފުޓުބޯޅަ މުބާރާތުގެ 13 އަހަރުން ދަށުގެ ޗެމްޕިއަންކަން ޣާޒީ ސްކޫލުން ހޯދައިފިއެވެ.
ޣާޒީ ސްކޫލް މުބާރާތް ކާމިޔާބުކުރީ ފައިނަލުގައި ޕެނަލްޓީ ޖަހައިގެން 4-5 ގެ ނަތީޖާއަކުން ޅ. އަތޮޅު ތައުލީމީ މަރުކަޒު ބަލިކޮށްގެންނެވެ.
ގަލޮޅު ދަނޑުގައި ކުޅުނު ފައިނަލު މެޗު ފެށިގެން ގިނަ ވަގުތު ބޯޅަ ކޮންޓްރޯލް ކޮށްގެން ރަނގަޅަށް ކުޅުނީ ޣާޒީ ސްކޫލުންނެވެ. އެހެން ނަމަވެސް މެޗުގެ ފުރަތަމަ ލަނޑު ޖަހައި ލީޑް ނެގީ ޅ. އަތޮޅު ތައުލީމީ މަރުކަޒުގެ ޓީިމުންނެވެ. މި ލަނޑު އެ ޓީމަށް ކާމިޔާބުކޮށްދިނީ އަބްދުﷲ އަރީންއެވެ.
ޅ. އަތޮޅު ތައުލީމީ މަރުކަޒު ލީޑް ނަގާފައި ވަނިކޮށް މެޗުގެ 20 ވަނަ މިނެޓުގައި ޣާޒީ ސްކޫލްގެ މުހައްމަދު ވަނީ އެ ޓީމަށް ނަތީޖާ ހަމަހަމަ ކޮށްދީފައެވެ.
ދެ ޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ހާފް ނިމުނީ 1-1 ގެ ނަތީޖާއަކުން ދެ ޓީމް އެއްވަރު ވެގެންނެވެ.
ދެވަނަ ހާފް ފެށިގެން ޅ. އަތޮޅު ތައުލީމީ މަރުކަޒުން ކުޅުން ރަނގަޅުކޮށް ލަނޑު ޖަހާނެ ރަނގަޅު ފުރުސަތު ތަކެއް ވަނީ ހޯދާފައެވެ. އެހެން ނަމަވެސް ޣާޒީ ސްކޫލުން އެ ޓީމްގެ ދެވަނަ ލަނޑު ކާމިޔާބުކޮށް ލީޑް ނެގިއެވެ. މި ލަނޑު އެ ޓީމަށް ކާމިޔާބުކޮށްދިނީ ޔޫސުފް އަބްސަމްއެވެ.
ޣާޒީ ސްކޫލުން ލީޑް ނެގިތާ މާގިނައިރެއްނުވެ، ޅ. އަތޮޅު ތައުލީމީ މަރުކަޒުގެ އަލީ އަފްޒާން ވަނީ އެ ޓީމަށް ނަތީޖާ ހަމަހަމަ ކޮށްދީފައެވެ. މި ނަތީޖާއާ އެކު މެޗުގެ ފުރިހަމަ ވަގުތު ހަމަވީ 2-2 ގެ ނަތީޖާއަކުން ދެ ޓީމް އެއްވަރުވެގެންނެވެ.
އެގޮތުން ފުރަތަމަ ޕެނަލްޓީ ޖަހާފައި ވަނީ ޅ. އަތޮޅު ތައުލީމީ މަރުކަޒުންނެވެ. ނަމަވެސް ޣާޒީ ސްކޫލްގެ ކީޕަރު ވަނީ އެ ޕެނަލްޓީ މަތަކޮށްފައެވެ.
ފައިނަލް މެޗަށް ފަހުގައި މުބާރާތް ނިންމުމުގެ ރަސްމިއްޔާތު ވެސް ހޯމަ ދުވަހު ވަނީ ބާއްވާފައެވެ. އެގޮތުން އެ ރަސްމިއްޔާތުގައި ވަނީ ރާއްޖޭގެ އެންމެ ފުރަތަމަ ޕްރޯ ލައިސަންސް ފުޓުބޯޅަ ކޯޗު މުހައްމަދު ޝާޒްލީއަށް ރަސްމީކޮށް ލައިސެންސް ހަވާލު ކޮށްފައެވެ.
މި ރަސްމިއްޔާތުގައި މުބާރާތުގެ އެކި ވަނަވަނައަށް ދިޔަ ކުޅުންތެރިންނަށް ޓްރޮފީ ހަވާލުކޮށްފައިވާއިރު، މުބާރާތުގެ އެންމެ ގިނަ ގޯލް ޖެހި ކުޅުންތެރިއަކަށް ހޮވުނީ ޣާޒީ ސްކޫލްއަށް 12 ލަނޑު ކާމިޔާބުކޮށްދިން ޔޫސުފް އަބްސަމްއެވެ. މި މުބާރާތުގެ އެންމެ މޮޅު ގޯލް ކީޕަރުގެ މަގާމުވެސް ހޯދީ ޣާޒީ ސްކޫލްގެ ގޯލް ބަލަހައްޓައިދިން އާރިޒް ބިން ޝާހިދްއެވެ.
އެންމެ މޮޅު 10 ކުޅުންތެރިންނަށް ހޮވުނީ ގާޒީ ސްކޫލްގެ މުހައްމަދު އައިހަމް އާއި މުހައްމަދު އުނައިސް ބިން ނޫހް އާއި ޅ. އަތޮޅު ތައުލީމީ މަރުކަޒުގެ އަލީ އަފްޒާން އިބްރާހިމް އާއި އަބްދުﷲ މިސާލް މުހައްމަދާއި ރެހެންދި ސްކޫލްގެ މުހައްމަދު އައިމަން އަލީ އާއި އަޔާން މުހައްމަދާއި އިސްކަންދަރު ސްކޫލްގެ ޔޫސުފް އައިޝް މުހައްމަދާއި ހަސަން ނާވީ އާއި ހިރިޔާ ސްކޫލްގެ ހުސެއިން ޖަނާހު އަދި ދަރުމަވަންތަ ސްކޫލްގެ އަބްދުﷲ ނަބާހު އަހުމަދު އެވެ.
