ވައްކަމުގެ މައްސަލަތަކެއްގައި 19 އަހަރުގެ ފިރިހެން ކުއްޖަކު ހައްޔަރުކޮށްފި
22 އެޕްރީލު 2019 | ހޯމަ 18:08ކޮޓަރިއެއްގެ ތެރެއިން ފެނުނު ދަބަހެއްގެ ތެރެއިން 94،705ރ. ފެނިފައިވޭ
ނ. މިލަދޫ ކައުންސިލްގެ އިދާރާ
ވައްކަމުގެ މައްސަލަތަކެއްގައި 19 އަހަރުގެ ފިރިހެން ކުއްޖަކު ނ. މިލަދޫ އިން ހައްޔަރުކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ އެޕްރީލް މަހުގެ 21 ވަނަ ދުވަހު ނ. މިލަދޫގެ ގެއަކުން 19000ރ. ވަގަށް ނާގާފައިވާ މައްސަލައިގެ ތަހުގީގަށް ލިބުނު މައުލޫމާތާ ގުޅިގެން ކޯޓު އަމުރެއްގެ ދަށުން އެރަށުގެ ގެއެއް ބަލާ ފާސްކުރިއިރު އެ ގެއިން ގިނަ އަދަދެއްގެ ފައިސާ ފެނިފައިވާ ކަމަށެވެ. އަދި އެގެ ބަލާ ފާސްކުރިއިރު އެގޭ ކޮޓަރިއެއްގެ ތެރެއިން ފެނުނު ދަބަހެއްގެ ތެރެއިން 94،705ރ. ފެނިފައިވާ ކަމަށް ފުލުހުން ބުނެފައި ވާއިރު އެގޭ އެހެން ކޮޓަރިއެއްގެ ތޭރެގައި ފޮރުވާފައިވާ ވޮލަޓެއްގެ ތެރެއިން 1513ރ. ފެނިފައިވާ ކަމަށް ވެސް ފުލުހުން ބުނެފައި ވެއެވެ.
ފުލުހުން ބުނީ އެގެއިން ފެނުނު ފައިސާތަކުގެ ތެރޭގައި އެރަށު ސްކޫލުގެ ތިޖޫރީން ވަގަށް ނަގާފައިވާ ކަމަށް ބެލެވޭ ފައިސާ ހިމެނޭ ކަމަށް ފުލުހުން މައުލޫމާތު ދެއެވެ.
މިލަދޫ ސްކޫލުގެ ތިޖޫރީން 100000 އަށް ވުރެ ގިނަ ރުފިޔާ ވަގަށް ނަގާފައިވާ ކަމަށް ފުލުހުންނަށް ރިޕޯޓްކޮށްފައި ވާއިރު ހަމަ މި ދުވަހު މި ދެ މައްސަލައިގެ ތުހުމަތުގައި 19 އަހަރުގެ ފިރިހެން ކުއްޖަކު ހައްޔަރުކޮށް މި ދެ މައްސަލަ ވެސް ތަހުގީގު ކުރަމުންދާ ކަމަށް ފުލުހުން ބުނެފައި ވެއެވެ.
