ވިޔަފާރީގެ ވާދަވެރިކަމުގެ ބިލް މަޖިލީހުން ބަލައިގަނެ، ކޮމިޓީއަށް
ބިލްގެ ފުރަތަަމ ކިޔުއްވުން އިއްވީ މި މަހުގެ 15 ވަަނަ ދުވަހު
ހިތަދޫ މެދު ދާއިރާގެ މެމްބަރު އިބްރާހިމް މުހައްމަދު ދީދީ
ސަރުކާރުގެ ފަރާތުން ހިތަދޫ މެދު ދާއިރާގެ މެމްބަރު އިބްރާހިމް މުހައްމަދު ދީދީ މަޖިލީހަށް ހުށައެޅުއްވި، ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމުގެ ބިލްގެ ފުރަތަމަ ކިޔުން މަޖިލީހުގައި ކިޔުމަށް ފަހު އިގްތިސާދީ ކޮމެޓީ އަށް ފޮނުވައިފިއެވެ.
ބިލް މަޖިލީހަށް ހުށައަޅައި ފުރަތަމަ ކިޔުން އިއްވާފައި ވަނީ މިދިޔަ ހަފްތާގެ ހޯމަ ދުވަހުއެވެ. އެ ބިލް ބަލައިގަތުމަށް ފާސްކޮށްފައިވަނީ 49 މެމްބަރުންގެ އިއްތިފާގުންނެވެ.
އެ ބިލް ހުށައެޅުމުގެ ބޭނުމަކީ، ދިވެހިރާއްޖޭގައި ވިޔަފާރީގެ ދާއިރާގައި ވާދަވެރިކަން ދެމެހައްޓައި، ވިޔަފާރީގެ ދާއިރާގައި ވާދަވެރިކަން ހަނިވާ ގޮތަށް ހިންގާ ވިޔަފާރީގެ އަމަލުތަކުގެ ސަބަބުން ގައުމީ އިގްތިސާދީ ކުރިއެރުމަށް ނޭދެވޭ އަސަރުތައް ހުއްޓުވުމަށެވެ. އަދި އެއް ވިޔަފާރިއެއް އަނެއް ވިޔަފާރިއަކާ މާރޖާއެއް ހެދުމުގެ ސަބަބުން ހުރަސް އެޅިގެންދާ ދިޔުން ކޮންޓްރޯލް ކުރުމުގެ ގޮތުން ކަމާބެހޭ އުސޫލުތައް އެކުލަވާލައި، ވިޔަފާރީގެ ދާއިރާގެ ވާދަވެރިކަން ދެމެހެއްޓުމަށްޓަކާ އިދާރާތަކަށް ބާރާއި މަސްއޫލިއްޔަތުތައް ހަވާލުކުރުމެވެ.
ހޯމަ ދުވަހު ބޭއްވި ޖަލްސާގައި އެ ބިލްގެ ބަހުސްކުރުމުގެ ފުރުސަތު ހުޅުވާލުމުން، ކޮމަންޑޫ ދާއިރާގެ މެމްބަރު އަހުމަދު ނާޝިދު ވިދާޅުވީ، ކޮންމެ ވިޔަފާރިއެއްގައި ވާދަވެރިކަން އޮންނަން ޖެހޭ ކަމަށް ގަބޫލުކުރައްވާ ކަމަށެވެ. ވާދަވެރި ކަމެއް ނެތްނަމަ ވިޔަފާރިއަކީ ވިޔަފާރިއެއްގެ ގޮތުގައި ކުރިއަށް ގެންދަން އޭގައި ފޯރި ނެތް އެއްޗަކަށްވާނެ ކަމަށް ވިދާޅުވިއެވެ.
ނާޝިދު ވިދާޅުވީ، މިހާރުވެސް ރާއްޖޭގެ ވިޔަފާރިތައް އޮތީ ވަރަށް ވާދަވެރި މާކެޓެއްގައި ކަމަށެވެ. ބިލުގައި ހުރި ބައެއް ކަންތައް ފާހަގަ ކުރަމުން ނާޝިދު ވިދާޅުވީ، އެ ބިލަކީ ރާއްޖޭގައި ކުރާ މިނިވަން ވިޔަފާރީއެއްގެ ހުރަސް ނޭޅޭނެ ބިލަކަށްވުމަކީ މުހިއްމު ކަމެއް ކަމަށެވެ.
''މި ގާނޫނޫގެ ދަށުން އަޅުގަނޑު ދެކޭ ކަށެއް ހަމަ ގައިމު ބޭނުމެއް ނުވޭ އެހެން ބަޔަކު އެއީ ޕެރަލަލް އިންޕޯޓްސް ގޮތުގައި އެއްޗެހިތައް ގެނެސް މާކެޓްގެ އަގުވައްޓާލާ އަދި ފޭކް އުފެއްދުންތައް އުފައްދައިގެން ޗައިނާ ތަންތަނުން ގެނެސްގެން މިހާރުވެސް އަޅުގަނޑުމެންގެ ތެރޭގައި ހިނގާކަމެއް. އެއްކަލަ ޕްރޮޑަކްޓްގެ ނަމުގައި މާކެޓްގައި ފްލަޑްވުން. އެހެންވެއްޖެއްޔާ ރައްޔިތުންގެ މެދުގައި އުފެއްދެވެނީ ވިޔަފާރީގެ ވާދަވެރިކަންތޯ އަދި ނޫނީއްޔާ އެދަނީ އަޅުގަނޑުމެން އެއަށްވުރެ ފަހަތައް ތޯ'' އޭނާ ވިދާޅުވިއެވެ.
އެ ބިލުގައިވާ ގޮތުން ވިޔަފާރި ހިންގާ ދެ ފަރާތެއްގެ ނުވަތަ އެއަށްވުރެ ގިނަ ފަރާތްތަކެއްގެ މެދުގައި ވާދަވެރި ކަމަށް ހުރަސް އެޅުމަށް ނުވަތަ ނޭދެވޭ ބަދަލެއް ގެނައުމުގެ މަގްސަދުގައި އެއްބަސްވުމެއްވުމަކީ މަނާ ކަމެކެވެ.
އެ ބިލުގައިވާ ގޮތުން އާންމުންނަށް ހިދުމަތްތައް ފޯރުކޮށްދިނުމުގައި އެ ވިޔަފާރި މިންވަރަށް ރިޔާއަތްކޮށް ވަކި ވިޔަފާރިތަކެއް އިސްތިސްނާ ކުރުމުގެ ބާރު އިކޮނޮމިކް މިނިސްޓްރީ އަށް ލިބިގެންވެއެވެ. އެ މިނިސްޓްރީން އެ އިސްތިސްނާ ކުރުމަށް ނިންމާ ނިންމުން ސަރުކާރުގެ ގެޒެޓްގައި ޝާއިއުކުރަން ޖެހެއެވެ.
އެ ބިލުގައިވާ ގޮތުން އިކޮނޮމިކް މިނިސްޓްރީން ވިޔަފާރީގެ ވާދަވެރިކަން އޮތް މިންވަރު ބަލައި ދިރާސާ ކުރަން ޖެހޭއެވެ. އަދި ވިޔަފާރި ހިންގާ ފަރާތްތަކާއި އާއްމުން ހޭލުންތެރިކަން ކުރުމަކީ އެ މިނިސްޓްރީގެ މަސްއޫލިއްޔަތެކެވެ.
