ސްރީ ލަންކާގައި ކޭމްޕް ކުރަމުން އަންނަ 19 އަހަރުން ދަށުގެ ކްރިކެޓް ޓީމުގެ ހާލު ރަނގަޅު ކަމަށް ކްރިކެޓް ބޯޑް އޮފް މޯލްޑިވްސް އިން ބުނެފިއެވެ.
ލަންކާގައި ދިން ބޮމުގެ ހަމަލާއާ ގުޅޭ ގޮތުން ރާއްޖެއެމްވީއަށް މައުލޫމާތު ދެއްވަމުން ކްރިކެޓް ބޯޑް އޮފް މޯލްޑިވްސްގެ ރައީސް މުހައްމަދު އަފްލާހް ވިދާޅުވީ، ކްރިކެޓް ޓީމުގެ ހާލު ރަނގަޅު ކަމަށާއި، ވަރަށް ހެނދުނު ހަމަލާގެ ޚަބަރު ލިބުނު ކަމަށެވެ.
އަފްލާހް ވިދާޅުވީ، ފާއިތުވެދިޔަ ދެ ދުވަހު ކްރިކެޓް ޓީމު މެޗުތައް ކުޅުމަށް ފަހު މިއަދަކީ އަރާމުކުރަން ހަމަޖެއްސި ދުވަސް ކަމަށާއި، މިއަދު ހަމަޖެހިފައި އޮތީ ބާޒާރު ކުރުމާއި، ކޮލަމްބޯ ސިޓީ ޓުއާއަކަށް ދިޔުން ކަމަށެވެ.
އެގޮތުން އަފްލާހް ވިދާޅުވީ، ހަމަލާގެ ޚަބަރު ކްރިކެޓް ޓީމަށް ލިބުނީ ސިޓީ ޓުއާއަށް ދިޔުމަށް ބަހަށް އަރާ ތިއްބާ ކަމަށާއި، ޚަބަރު ލިބުމާ އެކު ޓީމު ހޮޓަލަށް ވައްދާފައިވާ ކަމަށެވެ.
"ކްރިކެޓް ޓީމަށް ވަރަށް ހެނދުނާ އެނގިއްޖެ ބޮމުގެ ހަބަރު. އިއްޔެ އާއި އިއްޔެ ނޫން ކުރީ ދުވަހު މެޗު ކުޅުނީ. މިއަދަކީ ރެސްޓް ޑޭ. ޝޮޕިން އާއި ޓުއާއަކަށް މިއަދު ދާން އޮތީ. ބޮމުގެ ޚަބަރު ލިބުނު އިރު ޓީމު އޮތީ ބަހަށް އަރާ. ވަގުތުން ޚަބަރު ލިބުމާ އެކު ހޮޓަލަށް ވަނީ ވައްދާފައި،" އަފްލާ ވިދާޅުވިއެވެ.
ކްރިކެޓް ޓީމަށް ލަންކާ ހިމާޔަތް ދިނުމަށް ލަންކާގެ ފުލުހުން މި ވަގުތު ޓީމު ކޭމްޕް ކުރަމުން އަންނަ ހޮޓަލަށް އައިސްފައިވާ ކަމަށާއި، ޓީމުގެ ހާލު ލަންކާގައި ހުންނަ ދިވެހި އެމްބަސީން ވެސް ބަލާފައިވާ ކަމަށެވެ.
އަފްލާހް ވިދާޅުވީ، ހަމަލާގެ ސަބަބުން ކްރިކެޓް ޓީމުގެ ފަރިތަކުރުންތައް ކުރިޔަށް ގެންދިޔުމާ ގުޅޭ ގޮތުން ލަންކާގައި ހުންނަ ދިވެހި އެމްބަސީއާ މަޝްވަރާ ކުރާނެ ކަމަށާއި، ކަންކަން ކުރިޔަށްގެންދާނީ އެމްބަސީގެ ލަފަޔާއެކުގައި ކަމަށެވެ.
"ކްރިކެޓް ޓީމަށް ލަންކާ ފުލުހުން ދަނީ ހިމާޔަތް ދެމުން. މިވަގުތު ފުލުހުން ދަނީ ހޮޓަލުގައި ފޯރި މަރަމުން. ކުރިޔަށް ކަންކަން ރާވާނީ ލަންކާގައި ހުންނަ ދިވެހި އެމްބަސީއާ މަޝްވަރާކުރުމަށް ފަހު،" އަފްލާ ވިދާޅުވިއެވެ.
ކްރިކެޓް ޓީމު ލަންކާއަށް ކޭމްޕްކުރުމަށް ގޮސްފައި ވަނީ މި މަހުގެ 26 ވަނަ ދުވަހު ޔޫއޭއީގައި އޮންނަ 19 އަހަރުން ދަށުގެ އޭސީސީ ވެސްޓަން ރީޖަން ކްރިކެޓް މުބާރާތަށް ތައްޔާރުވުމުގެ ގޮތުންނެވެ.
ފަރިތަކުރުންތައް ނިންމާލުމަށް ފަހު މުބާރާތަށް ކްރިކެޓް ޓީމު ދުބާއީއަށް ފުރުމަށް ހަމަޖެހިފައިވަނީ ސީދާ ލަންކާއިންނެވެ. ޓީމު ފުރުމަށް ހަމަޖެހިފައި ވަނީ ބުދަ ދުވަހުއެވެ.
