މޯލްޑިވިއަނުން ބްލައިންޑް އެންޑް ވިޒުއަލީ އިމްޕެއާރޑް ސޮސައިޓީއަށް 100،000 ރުފިޔާ ހަދިޔާކޮށްފި
21 އެޕްރީލު 2019 | އާދީއްތަ 12:20މިއީ މިހާތަނަށް ކުންފުންޏަކުން އެ ޖައްމިއްޔާއަށް ލިބުނު އެންމެ ބޮޑު އެހީ
މިއަދު ބޭއްވުނު ހަފްލާގެ ތެރެއިން
ގައުމީ އެއާރލައިން މޯލްޑިވިއަނުން އެ ކުންފުނީގެ 19 ވަނަ އަހަރީ ދުވަހާ ގުޅިގެން ބްލައިންޑް އެންޑް ވިޒުއަލީ އިމްޕެއާރޑް ސޮސައިޓީއަށް އެއްލައްކަ ރުފިޔާ ހަދިޔާކޮށްފިއެވެ.
އާދީއްތަ ދުވަހުގެ މެންދުރު މިކަމަށްޓަކައި ބޭއްވި ހަފްލާގައި ވާހަކަ ދައްކަވަމުން މޯލްޑިވިއަންގެ ޑެޕިއުޓީ މެނޭޖިންގް ޑިރެކްޓަރ އައިޝަތު ޖެނިފާރ ވިދާޅުވީ 19 ވަނަ އަހަރީ ދުވަހުގެ މުނާސަބަތުގައި މޯލްޑިވިއަން އިން ނިންމީ ދަރުމައަށް މަސަތްކަތް ކުރާ ޖައްމިއްޔާއަކަށް އެހީ ތެރިކަން ފޯރުކޮށްދޭން ކަމަށާއި އެގޮތުން ކުންފުނީގެ މަސަތްކަތްކުރާ މުއައްޒަފުންގެ ތެރެއިން މިކަމަށް ބޭނުންވާ ކުދިންގެ އެއް ދުވަހުގެ މުސާރައާ އެކު ޖުމްލަ 100،000 ރުފިޔާ ބްލައިންޑް އެންޑް ވިޒުއަލީ އިމްޕެއާރޑް ސޮސައިޓީއަށް ހަދިޔާކުރުމަށް ނިންމާފައިވާ ކަމަށެވެ.
މޯލްޑިވިއަންއިން ފައިސާ ހަދިޔާކުރަނީ
މި ހަފްލާގައި ވާހަކަދައްކަވަމުން ބްލައިންޑް އެންޑް ވިޒުއަލީ އިމްޕެއާރޑް ސޮސައިޓީގެ ރައީސް އަލީ ޝަހީބް ވިދާޅުވީ ލިބޭ އެހީ އަބަދު ވެސް ބޭނުންކުރަނީ ކުދިންނަށް ދިމާވާ ކަންކަން ރަނގަޅުކުރުމުގެ އިތުރުން މުޖްތަމައު އެ ކުދިންނާ ދޭތެރޭ ދެކޭ ގޮތް ބަދަލުކުރުމަށް ހޭލުންތެރި ޕްރޮގްރާމް ހިންގުމަށް ކަމަށެވެ. މި އަހަރު ވެސް އެފަދަ އިތުރު ހަރަކާތްތައް ކުރިޔަށް ގެންދިޔުމަށް ހަމަޖެހިފައިވާކަން ފާހަގަކޮށް ޝަހީބް ވަނީ މޯލްޑިވިއަން އަށް އެ ޖަމިއްޔާގެ ހުރިހާ މެމްބަރުންގެ ފަރާތުން ޝުކުރު ދަންނަވާފައެވެ. އެންޖީއޯ އިން ބުނި ގޮތުގައި މިއީ މިހާތަނަށް އެ ޖަމިއްޔާ އަށް ކުންފުންޏަކުން ލިބުނު އެންމެ ބޮޑު އެހީއެވެ.
2010 ވަނަ އަހަރުގެ ޖެނުއަރިމަހުގައި އުފެއްދި މި ޖައްމިއްޔާގައި މިއަދާ ހަމަޔަށް 100 އަށް ވުރެ ގިނަ މެމްބަރުން ރާއްޖޭގައި އެކި ކަންކޮޅުތަކުން ރަޖިސްޓަރ ވެފައިވެއެވެ.
