ލަންކާގެ ބޮމުގެ ހަމަލާ: 100 މަރު، ޒަހަމްވި އަދަދު 400 އަށް
21 އެޕްރީލު 2019 | އާދީއްތަ 14:29ބޮމުގެ ހަމަލާތައް ރައީސް ސޯލިހް ކުށްވެރި ކުރައްވައިފި
ބޮންގޮއްވާލުމުގެ ހާދިސާ ހިނގި ޗާޗް
ސްރީ ލަންކާގެ ކްރިސްޓިއަނުން އީސްޓަ ސަންޑޭ ފާހަގަ ކުރަމުން ދަނިކޮށް ތިން ފައްޅިއެއްގަ އާއި ކޮލަމްބޯގެ ބައެއް ތަންތަނުގައި ބޮންތަކެއް ގޮއްވާލި ހަމަލާގައި ގިނަ އަދަދެއްގެ ބަޔަކު މަރުވެއްޖެ އެވެ.
ލަންކާގައި ގިނަ އަދަދެއްގެ ދިވެހިން ދިރިއުޅެމުންދާއިރު، ބޮމުގެ ހަމަލާތަކުގައި ދިވެއްސަކު ނިޔާވި ކަމެއް، ނުވަތަ ޒަހަމްވިކަމުގެ ރިޕޯޓެއް އަދި ލިބިފައެއް ނުވެ އެވެ.
ބޮމުގެ ހަމަލާގައި މަރުވި މީހުން
ބޮން ގޮއްވާލި ތަންތަން:
- ކޮއްޗިކަޑޭ ފައްޅި
- ކަޓުވަޕިޓިޔާ ފައްޅި
- ބެޓިކޮއްލާގައި ހުންނަ ފައްޅިއެއް
- ސަންގްރިއްލާ ހޮޓެލް
- ސިނަމަން ގްރޭންޑް ހޮޓެލް
- ކިންގްސް ބަރީ
މިއީ މި ފަހުގެ ތާރީޚުގައި ލަންކާގައި ދިން އެންމެ ވަރުގަދަ ހަމަލާއެވެ. ބައެއް ރިޕޯޓްތައް ބުނާ ގޮތުން ބޮމުގެ ހަމަލާތަކުގައި މަރުވި މީހުންގެ އަދަދު 100 ވުރެ މައްޗަށް ވަނީ އަރައިފަ އެވެ. އަދި ޒަހަމްވި މީހުންގެ އަދަދު 400 އަށް ވުރެ ގިނަ ކަމަށް ރިޕޯޓްތައް ބުނެ އެވެ.
ލަންކާގެ ނޫސްވެރިޔަކު ބުނި ގޮތުގައި، ކޮލަމްބޯގެ ނެޝަނަލް ހޮސްޕިޓަލަށް އެކަނި ވެސް، ބޮމުގެ ހަމަލާތަކުގައި ޒަހަމްވި 295 އަށް ވުރެ ގިނަ މީހުން މިހާރު ވަނީ ގެންގޮސްފަ އެވެ.
ބޮމުގެ ހަމަލާތައް ދިނީ ކޮން ގޮތަކަށް ކަމެއް، އަދި ކޮން ބައެއް ކަމެއް ނޭނގެ އެވެ.
މި ހަމަލާގައި ފައްޅިތަކަށް ބޮޑެތި ގެއްލުންތަކެއް ލިބިފައިވާއިރު، ބޮން ގޮއްވާލި ހޮޓާތަކަށް ލިބިފައިވާ ގެއްލުމުގެ ތަފްސީލެއް އަދި ނުލިބެ އެވެ.
ދިވެހިން ގުޅުއްވަންވީ ނަންބަރު
ރާއްޖޭގެ ފޮރިން މިނިސްޓްރީން ބުނީ ސްރީ ލަންކާގެ އެކި ސަރަޙައްދުތަކުގައި ބޮންތަކެއް ގޮވި ޙާދިސާގައި ދިވެއްސަކަށް އަނިޔާވިތޯ މިމިނިސްޓްރީއިން ބަލަމުންދާ ކަމަށެވެ. އިމަޖެންސީ ކޮންސިއުލަރ ޚިދުމަތް ބޭނުންފުޅުވާނަމަ ހޮޓްލައިން ނަންބަރު 7983400 އަށް ގުޅުމަށް ވަނީ އެދިފައެވެ.
ލަންކާގައި ތިބި ދިވެހިން ގެއިން ބޭރަށް ނުނިކުތުމަށް ލަންކާގައި ހުންނަ ދިވެހި އެމްބަސީން ވަނީ އިލްތިމާސްކޮށްފަ އެވެ. އަދި އެހީތެރިކަމެއް ހޯދުމަށް ބޭނުންވާ ފަރާތްތަކުން ގުޅުއްވާނެ ނަންބަރުތައް ވެސް ވަނީ ހިއްސާ ކުރައްވައިފަ އެވެ. އެއީ:
94727277072+
94766086660+
94764189900+
ލަންކާގެ ދިން ބޮމުގެ ހަމަލަ ހަރުކަށި އިބާރާތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުށްވެރިކުރައްވައިފި އެވެ.
ސްރީ ލަންކާގައި ދިން ބޮމުގެ ހަމަލާ ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވަނީ ކުށްވެރި ކުރައްވައިފަ އެވެ.
ބަންޑާރަނަޔަކަ އިންޓަނޭޝަނަލް އެއާޕޯޓްގެ ސެކިއުރިޓީ ވަރުގަދަކޮށްފައި
ބޮމުގެ ހަމަލާތަކާ ގުޅިގެން ބަންޑާރަނަޔަކަ އިންޓަނޭޝަނަލް އެއާޕޯޓްގެ ސެކިއުރިޓީ ވަނީ ވަރުގަދަކޮށްފަ އެވެ. ފުރަންދާ މީހުން ހަތަރު ގަޑިއިރު ކުރިން ޗެކިން ހެދުމަށް ވަނީ އިލްތިމާސްކޮށްފަ އެވެ. އަދި ފުރަންދާ މީހުން ފިޔަވައި އެހެން މީހުން އެއާޕޯޓަށް ވަނުން ވަނީ މަނާކޮށްފަ އެވެ.
