ކުރިޔަށް އޮތް ސީޒަނަށް މާޒިޔާ އިން ފަރިތަކުރުންތައް ފަށައިފި

ކުރިޔަށް އޮތް ސީޒަނަށް މާޒިޔާ ސްޕޯޓްސް އެންޑް ރެކްރިއޭޝަނުން ފަރިތަކުރުންތައް ފަށައިފިއެވެ.

މާޒިޔާގެ އޮފިޝަލަކު ރާއްޖެއެމްވީއަށް ވިދާޅުވީ، ކުރިޔަށް އޮތް ސީޒަނަށް ތައްޔާރުވުމުގެ ގޮތުން އެ ކްލަބުގެ ފަރިތަކުރުންތައް ހޮނިހިރު ދުވަހު 17:30 ގައި ފަށާފައިވާ ކަމަށެވެ.

އޮފިޝަލް ވިދާޅުވީ، ސަމޫހު އަލީ (ސަމުއްޓެ) ފިޔަވައި ހުރިހާ ކުޅުންތެރިން ހޮނިހިރު ދުވަހު އޮތް ފަރިތަކުރުންތަކުގައި ބައިވެރިވެފައިވާ ކަމަށެވެ. އޭނާ ވިދާޅުވީ، ސަމުއްޓެ ފަރިތަކުރުންތަކުގައި ބައިވެރިނުވީ ބަލިވެ އުޅޭތީކަމަށެވެ.

މާޒިޔާއިން ވަނީ ކުރިޔަށް އޮތް ސީޒަނަށް ތައްޔާރުވުމުގެ ގޮތުން ވަރުގަދަ ކުޅުންތެރިންތަކެއް އެ ކްލަބަށް ގެނެސްފައެވެ. އެގޮތުން ޓީސީގެ އަބްދުﷲ ހަނީފް (ބެންޖޯ)، އިބްރާހިމް ވަހީދު ހަސަން (އިއްބެ)، އިބްރާހިމް މަހުދީ (ފޭދޫ އިއްބެ)، ނިއު ރޭޑިއަންޓުގެ އަހުމަދު އަބްދުﷲ (ލިލީ) އަދި ހަމްޒާ މުހައްމަދު (ހަމްޕު( ވެސް އެ ކްލަބުން ވަނީ ގެނެސްފައެވެ.

ކުރިޔަށް އޮތް ސީޒަނުން މާޒިޔާއިން ނުފެންނާނީ އެ ކްލަބް ދޫކޮށް ދިޔަ ދަ ގްރާންޑޭ އަށް ސޮއިކުރި ޔަސްފާދު ހަބީބު (މުލަކޭ) އާއި ޓީސީ އަށް ބަދަލުވި އިސްމާއިލް އީސާ (މެސީ) އަދި ގްރީން ސްޓްރީޓްސް އަށް ސޮއިކުރި ގާސިމް ސައްމާމު (ސައްމެ) އެވެ.

މާޒިޔާއިން ވަނީ އެޓީމަށް 2017 ވަނަ އަހަރު އިރުޝާދުދިން ކޯޗު މަރުޖާން ސެކުލޮސްކީ ގެނެސްފައެވެ. އޭނާ އެ މަގާމަށް ގެނައީ މިދިޔަ އަހަރު އެ ކްލަބަށް ކޯޗުކަންކޮށްދިން އިސްމާއިލް މަހުފޫޒް (އިންމަ) ގެ ބަދަލުގައެވެ.