މި ދުވަސްވަރު އެންމެ ގަދަޔަށްކުރެވޭ ބަހުސްއަކީ، އެމްޑީޕީގެ ފަރާތުން މަޖިލީހުގެ ރައީސްކަމަށް ނެރުއްވާނީ ކޮން ބޭފުޅެއްތޯ އެވެ. ޕާޓީގެ ތެރެއިން ފަސް ބޭފުޅަކު މަޖިލީހުގެ ރައީސްކަމަށް ޝައުޤުވެރިކަން ފާޅުކުރައްވާފައިވާއިރު، ޕާލިމެންޓްރީ ގުރޫޕްގެ ތެރޭގައި ނަގާނީ ސިއްރު ވޯޓެއްތޯ ނުވަތަ ނޫންތޯ ކުރެވޭ ބަހުސްވެސް ވަނީ ގަދަވެފަ އެވެ.
ހިޔާލު ތަފާތުވެ، އެއް ބޭފުޅަކު އަނެއް ބޭފުޅަކަށް ބަހުގެ ހަމަލާތައް ގެންދަވަނީ އަމާޒުކުރައްވަމުންނެވެ. އެބޭފުޅަކަށް ފެނިވަޑައިގަންނަވާ ރަނގަޅު ގޮތާއި، އެގޮތަށް އަމަލުކުރާ ދުނިޔޭގެ ޤައުމުތަކުގެ މިސާލުތައް ނަންގަވައި ޓްވީޓް ކުރައްވަމުންގެންދަވަ އެވެ. ހަމައެކަނި މި ބަހުސްގެ ތެރޭގައި ބަހުގެ ހަމާލަތައް އަމާޒު ކުރަނީ ޕާލިމެންޓްރީ ގުރޫޕްގެ މެމްބަރުންނެއް ނޫނެވެ. ޕާލިމެންޓްރީ ގުރޫޕްގެ މެމްބަރުންނެކޭ އެއް ފޯރިއެއްގައި އެކްޓިވިސްޓުން ވެސް ގެންދަނީ ބަހުސްގައި ބައިވެރިވަމުންނެވެ.
މަންޒަރު ބަލަން ތިބި އިދިކޮޅު ފަރާތްތަކާއި، އެހެނިހެން ފަރާތްތަކުން ސިފަކުރާ ގޮތުގައި އެމްޑީޕީ ދެ ކަފިވީ އެވެ. ޕާޓީ ދެ ބަޔަކަށް ބެހި، ޕާޓީ ރޫޅެނީ އެވެ. ނޫސްވެރިންގެ ތެރެއިން ބައެއް ނޫސްވެރިންވެސް ސިފަކުރަނީ އެގޮތަށެވެ. ނަމަވެސް ހޫނުގަދަ ބަހުސްތަކުގެ އަނެއް ފުށުން ފެންނަނީ މުޅިން އެހެން މަންޒަރެކެވެ.
ފުރިހަމަވެ، ފައްކާވެފައި އޮތް ސިޔާސީ ޕާޓީއެއް އޭގެ އެންމެ ފުރިހަމަ ގޮތުގައި މަސައްކަތްކުރާ މަންޒަރު އެވެ. ހިޔާލު ފާޅުކުރުމުގެ މިނިވަންކަން އޭގެ އެންމެ ފުޅާ މިނެއްގައި ބޭނުންކުރަމުންގެންދާ މަންޒަރު އެވެ. ހިޔާލު ފާޅުކުރާއިރުވެސް، އޭގެ އެންމެ ފުރިހަ ހުދޫދުގެ ތެރޭގައިި ފާޅުކުރަމުންގެންދާ މަންޒަރެވެ.
ސިޔާސީ ގޮތުން ފައްކާވެފައި ނުވާ ޕާޓީއެއްނަމަ، ފަސް، ހަ ކެނޑިޑޭޓުންނަށް މަޤާމަށް ޝައުޤުވެރިވެވަޑައިގަންނަވާކަން ހާމަކޮށް، މަޤާމަށް ވާދަކުރައްވާނެކަން ހާމަކުރައްވާކަށްވެސް ކެރިވަޑައެެއްނުގަންނަވާނެެ އެވެ. ޕާޓީގެ އެންމެ އިސް ސަފުގައި ހުންނެވި ބޭފުޅަކު ވިދާޅުވި ކެނޑިޑޭޓަކަށް ފުރުސަތު ދެއްވުމަށްފަހު، ބިރުން ރަޖާ ލައިގެން އޮންނާނީއެވެ. ރާއްޖޭގެ ސިޔާސީ މަސްރަހުން އެ މަންޒަރު ފެނިގެންގޮސްފައިވެއެވެ. ނަމަވެސް އެމްޑީޕީގެ ތެރެއިން ފަސް ކެނޑިޑޭޓަކު އެ ވަނީ މަޖިލީހުގެ ރައީސް ކަމަށް ވާދަކުރައްވާނެކަން އިއުލާންކުރައްވާފަ އެވެ.
ކެމްޕޭންތައްވެސް އޭގެ އެންމެ ފޯރިޔާއެކު އެ ގެންދަނީ ކުރަމުންނެވެ.
އެމްޑީޕީ ފުރިހަމަވެފައިވާކަން ހާމަކޮށްދޭ އަނެއް ކަމަކީ ކޮންމެ އިންތިހާބަކަށް ކުރާ ފޯރިގަދަ ކެމްޕޭނަށްފަހުގައި ޕާޓީ އެކަތިގަނޑަކަށްވާލެއް ފުރިހަމަ ކަމެވެ. ދުރު ނޫން، ތާރީހެއްގައި ފެނިގެންދިޔަ އެފަދަ ކުޑަކުޑަ މިސާލަކަށް ބަލާލާނަމެވެ.
މަޖިލީސް އިންތިހާބުގެ ޕްރައިމަރީ ބޯމަތިވެގެންދިޔަ އިރު، ޕާޓީތަކުން އެމްޑީޕީއަށް ފާޑުކިޔައި، ބުނަމުންގެންދިޔައީ އެއީ ޕާޓީ ތެރޭގައި ބައިބައިވުން އުފެދޭނެ ކަމެއް ކަމަށެވެ. ނަތީޖާ ވަރަށް ހިތިވާނެކަމަށެވެ. ލިބެން ހުރި ވޯޓުތައްވެސް ގެއްލިގެންދާނެ ކަމަށެވެ. ނަމަވެސް އިންތިހާބުގެ ދާއިމީ ނަތީޖާ އައިއިރު، އެ ހުރިހާ ވާހަކައަކީވެސް ހުދުމުހުތާރު ވެރިތަކެއް ހަދަހަދައިގެން ފެތުރި ވާހަކަތަކެއްކަން އެމްޑީޕީން އެ ވަނީ ސާބިތުކޮށްދީފަ އެވެ.
ޕްރައިމަރީއަށްފަހު، ކެނޑިޑޭޓުން އެކަތިވެ، ކެމްޕޭން ޓީމްތައް ރުކުރުވާލާ، ޤައުމީ ފެންވަރުގެ ބޮޑު ކެމްޕޭނެއްކޮށް، ރާއްޖޭގެ ތާރީހް ޕާޓީން އެ ވަނީ ބަދަލުކޮށްލާފަ އެވެ. އެއް ޕާޓީއަކުން ހޯދި އެންމެ ބޮޑު ކާމިޔާބީ އެމްޑީޕީން މަޖިލީސް އިންތިހާބުގައި ހޯދައިފައިވެއެވެ. އެމްޑީޕީ އޮތީ ހަމަ ރަނގަޅަށްވެސް، ޑިމޮކްރަސީއަށް ފައްކާވެ ފުރިހަމަވެފަ އެވެ. ދެން އޮތީ ފޯރިގަދަ ކެމްޕޭނަކަށްފަހު، މަޖިލީހުގެ ރައީސްކަމަށް ނެރުއްވާނެ ބޭފުޅަކު ބެލުމެވެ.
