އެޓްލެޓިކޯ މެޑްރިޑާއެކު ހަދާފައިވާ އެއްބަސްވުން ޖެން އޯބްލެކް އާކޮށްފިއެވެ.
ގިނަ ކްލަބްތަކުން ފާރަލަމުންދިޔަ އުމުރުން 26 އަހަރުގެ އޯބްލެކް އެޓްލެޓިކޯއާއެކު ހަދާފައިވާ އެއްބަސްވުން އާކޮށްފައިވަނީ 2023 ވަނަ އަހަރުގެ ނިޔަލަށެވެ.
އެއްބަސްވުން އާކުރުމަށްފަހު އޯބްލެކް ބުނީ އެޓްލެޓިކޯއާއެކު އިތުރު ދުވަސްތަކެއް ހޭދަކުރަން ފުރުސަތު ލިބުމުން އުފާވާ ކަމަށާއި، ކްލަބާއެކު ކާމިޔާބީ ހޯދަން ކެތްމަދުވެފައި ހުރި ކަމަށެވެ.
މީގެކުރިން ބެންފީކާއަށް ވެސް ކުޅެފައިވާ އޯބްލެކް އެޓްލެޓިކޯއަށް ބަދަލުވީ 2014 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް 199 މެޗު ކުޅެދީފައެވެ.
ބެންފީކާއާއެކު ލީގު ތަށި އަދި ޔޫރޮޕާ ލީގުގެ ދެވަނަ ހޯދާފައިވާ އޯބްލެކް ވަނީ އެޓްލެޓިކޯއާއެކު ސްޕެނިޝް ސުޕަ ކަޕް، ޔުއެފާ ޗެމްޕިއަންސް ލީގުގެ ދެވަނަ، ޔުއެފާ ސުޕާ ކަޕް އަދި ޔުއެފާ ޔޫރޮޕާ ލީގު ކާމިޔާބުކޮށްފައެވެ.
ޕޯޗުގީޒް ލީގުގެ އެންމެ މޮޅު ގޯލު ކީޕަރުގެ މަގާމު 2013 ވަނަ އަހަރުގެ ސީޒަނުގައި ހޯދާފައިވާ އޯބްލެކް ވަނީ ލަލީގާގެ އެންމެ މޮޅު ގޯލު ކީޕަރުގެ މަގާމު ދެފަހަރު ހޯދާފައެވެ.
ސްލޮވޭނިއާގެ އެންމެ މޮޅު ކުޅުންތެރިޔާގެ މަގާމު ފާއިތުވެދިޔަ ހަތަރު އަހަރުވެސް ހޯދާފައިވާ އޯބްލެކް ވަނީ ގައުމީ ޓީމަށް މިހާތަނަށް 20 މެޗު ކުޅެފައެވެ.
