މާލެ ޖަލުގެ އެނެކްސް 1 ބަންދުކޮށްފި
ދިގު މުއްދަތަކަށް ބަންދުކޮށްގެން މީހުން ގެންގުޅެން ފަށާފައިވަނީ 2006 ވަނަ އަހަރު
މާލެ ޖަލުގެ އެނެކްސް 1
މާލެ ޖަލުގެ އެނެކްސް 1 ގައި ތިބި ހުރިހާ ޤައިދީން އެކި ޖަލުތަކަށް ބަދަލު ކުރުމަށް ފަހު މަރާމާތު ކުރުމަށްޓަކައި އެޖަލު ބަންދު ކޮށްފިއެވެ.
ހޯމަ ދުވަހު ބަނދު ކުރި އެޖަލު، ފުރަތަމަ ބޭނުން ކުރަމުން ދިޔައީ މާފުށީ ޖަލުން އެކިއެކި ކަންކަމުގައި މާލެއަށް ގެނެވޭ މީހުން ވަގުތީ ގޮތުން ބޭތިއްބުމަށާއި އަރުވާލުމަށް ޙުކުމްކުރެވި ރަށަކަށް ބަދަލު ކުރެވެންދެން ބަންދު ކުރުމުގެ އިތުރުން، ގޭބަންދު ކުރުމަށް ޙުކުމްކުރެވޭ މީހުންގެ ތެރެއިން ޙަވާލުވާނެ ފަރާތެއް ނެތް މީހުން ބަންދު ކޮށްފައި ބޭތިއްބުމަށެވެ.
ނަމަވެސް ޖަލުގެ ތެރޭގައި އައު ގޮޅިތަކެއް ހެދުމަށް ފަހު ދިގު މުއްދަތަކަށް ބަންދު ކޮށްގެން މީހުން ގެންގުޅެން ފަށާފައި ވަނީ 2006 ވަނަ އަހަރު އެވެ.
ވޭތުދިޔަ 4 އަހަރު މާލެ ޖަލުގެ އެނެކްސް 1 ބޭނުން ކޮށްފައި ވަނީ އުމުރުން ދުވަސްވީ މީހުންނާއި، ދިގުމުއްދަތަކަށް ފަރުވާ ބޭނުންވާ ބަލިތަކުގައި ބޭސް ކުރާ މީހުންނާއި އަދި ބެލެހެއްޓުމުގައި ޚާއްޞަ އެހީތެރިކަން ދީގެން ބަންދުގައި ބައިތިއްބަންޖެހޭ މީހުން ބޭތިއްބުމަށް ކަމަށް ކަރެކްޝަނަލް ސާރވިސް އިން ބުނެފައި ވެއެވެ.
2018 ނޮވެމްބަރ 17 ގައި ސަރުކާރު ބަދަލުވުމާއި ގުޅިގެން މާލޭ ޖަލުގެ އެނެކްސް 1 އެއީ އިންސާނީ ކަރާމާތް ނުގެއްލޭ ގޮތަށް މީހުން ބަންދު ކޮއްގެން ގެންގުޅުމަށް އެކަށީގެންވާ ވަރުގެ ތަނެއް ނޫން ކަމަށާއި، އާދައިގެ ކުދިކުދި މަރާމާތު ކޮށްގެން ބޭނުން ކުރެވޭނެ ކަމަށް ނުފެންނަ ތަނެއްގެ އިތުރުން އެޖަލުގައި މީހުން ބަންދު ނުކޮށް، އެހެން ޖަލުތަކުން ޖާގަ ލިބުނުވަރަކުން މީހުން ބަދަލު ކޮށް އެނެކްސް 1 ހުސް ކުރުމަށް ސަރުކާރުން ވަނީ އަންގާ ފައެވެ.
މާލޭ ޖަލުގެ އެނެކްސް 1 ހުސް ކުރުމަށް ނިންމަވަން ޖެހުނު ސަބަބުތަކުގެ ތެރޭގައި، އެޖަލުގެ ގޮޅިތައް ފަރުމާކުރުމުގައި ދަގަނޑު ކޮށިތަކެއްގެ ސިފައިގާ ފަރުމާ ކޮށްފައި ހުރުމާއި، ވައި ދައުރުވާނެ ގޮތެއް ނެތުމުން ގޮޅިތަކުގައި ހޫނުގަދަވުން ހިމެނެއެވެ. އަދި ގޮޅިތަކުގެ ފާޚާނާތައް ބާވެ، ހަލާކުވެފައި ހުރުމާއި، ވައި ބަންދުވެފައިވާ ތަނެއްގައި މީހުން ބަންދުކޮށްފައި ބޭތިއްބުމުން ހަމުގެ ބަލިތައް ޖެހޭ ޤައިދީންގެ އަދަދު ގިނަވުން ވެސް ހިމެނެއެވެ.
އެނެކްސް 1 ދެން ބޭނުންކުރަން ފަށާނީ އިންސާނީ ބައެއް ޙައްގުތައް ހިފެހެއްޓޭ ގޮތަށް މީހުން ބަންދު ކުރުމުގައި އެހެން ޤައުމުތަކުގައި ވެސް ޖަލުތައް ފަރުމާ ކޮށްފައި ހުންނަ ގޮތަށް އިމާރާތެއް ބިނާކުރުމަށް ފަހުގައެވެ.
