ކޯރަމް ހަމަނުވެގެން ޖަލްސާ ނުފެށުނު!
16 އެޕްރީލު 2019 | އަންގާރަ 04:28ޖަލްސާ ދެން ފެށޭނީ 9.30 ގައި
ރައްޔިތުންގެ މަޖިލީހުގެ ޗެމްބަރުގައި މެމްބަރުން
ރައްޔިތުންގެ މަޖިލީހުގެ ޖަލްސާ ކޯރަމް ހަމަނުވެގެން ފެށުން ލަސްކުރަންޖެހިއްޖެއެވެ.
މަޖިލީހުގެ ރިޔާސަތުން ވިދާޅުވެފައި ވަނީ މަޖިލީހުގެ ޖަލްސާ ދެން ފަށާނީ 9.30 ގައި ކަމަށެވެ. މަޖިލީހުގެ ޖަލްސާތައް ފަށާ ގަނޑިއަކީ ނުވައެއް ޖަހާއިރުއެވެ. މަޖިލީހުގެ ރިޔާސަތުން ވަނީ ޖަލްސާ ފެށުމަށް ބޭނުންވާ ކޯރަމް ހަމަވާތޯ ނުވަ ގަނޑި ދިހައެއް ވަންދެން މަޑުކޮށްފައެވެ.
މަޖިލިސް ޖަލްސާ ފެށުމަށް ބޭނުންވާ ކޯރަމަކީ 22 މެމްބަރުންނެވެ.
އަންގާރަދުވަހުގެ ޖަލްސާއަށް އެޖެންޑާކޮށްފައިވަނީ ކޮމިޓީން ހުށަހަޅާ ކަންތަކެއެވެ. އެގޮތުން ގަވާއިދު ކޮމިޓީން ދިރާސާކޮށްފައިވާ އާންމު ގަވާ އިދުތަކާއި ބެހޭ ޤާނޫނުގެ ޖަދުވަލް 1 އަދި 2 ގައިވާ ގަވާއިދުތަކަށް ޢަމަލުކުރުމުގެ މުއްދަތު އިތުރުކުރުމާ ގުޅޭ މައްސަލަ ކޮމިޓީން ދިރާސާ ކުރައްވައި ނިންމެވިގޮތުގެ ރިޕޯޓާއި، މާލިއްޔަތު ކޮމިޓީން ދިރާސާކޮށްފައިވާ 101 އޮޑިޓް ރިޕޯރޓްތަކުގެ ތެރެއިން 30 ރިޕޯޓެއެވެ.
މާލިއްޔަތު ކޮމިޓީން ދިރާސާކޮށްފައިވާ 101 އޮޑިޓް ރިޕޯރޓްގެ ތެރެއިން 33 ރިޕޯޓެއް ވަނީ ހޯމަ ދުވަހުގެ ޖަލްސާގައި ފާސްކޮށްފައެވެ.
