ފަރަންސޭސި ގަދީމީ ފައްޅިއެއްގައި އަލިފާން ރޯވެއްޖެ
16 އެޕްރީލު 2019 | އަންގާރަ 05:06އަލިފާން ރޯވާން ދިމާވި ސަބަބެއް އަދި ސާފެއް ނުވޭ
އަލިފާން ރޯވެފައި ވަނީ ފްރާންސް ގަޑިން 18:30 ހާއިރު
ފަރަންސޭސި ވިލާތުގެ އެންމެ މަޝްހޫރު އެއް ބިނާ ކަމަށްވާ ނޮޓްރަ ޑޭމް ޗަރޗްގައި އަލިފާނުގެ ހާދިސާއެއް ހިނގައިފިއެވެ.
އަށް ސަތޭކަ ފަންސާސް އަހަރުވެފައިވާ މި އިމާރާތުގައި ރޯވެ ފުރާޅު ވެއްޓިފައިވީ ނަމަވެސް އިމާރާތުގެ އޮނިގަނޑާއި ދެ ރަނގަބީލު ޓަވަރު ހަލާކުވެފައި ނުވާ ކަމަށް އޮފިޝަލުން ބުނެފައިވެއެވެ.
އަލިފާން ނިއްވުމުގެ މަސައްކަތްކުރި ފަރާތްތަކުން ވަނީ އިމާރާތުގެ އެތެރޭގައި ހުރި ކުރެހުންތައް ސަލާމަތްކުރެވޭތޯ މަސައްކަތްކޮށްފައެވެ.
އަލިފާން ރޯވާން ދިމާވި ސަބަބެއް އަދި ސާފުވެފައެއް ނުވެއެވެ.
އަލިފާން ރޯވެފައި ވަނީ ފްރާންސް ގަޑިން 18:30 ހާއިރުއެވެ. އަލިފާން ހިފިތާ ހިނދުކޮޅެއްގެ ތެރޭގައި ކުލަ ބިއްލޫރީގެ ދޮރުތަކާއި ލަކުޑިން ހަދާފައިވައި އިންޓީރިއާ ހަލާކުވެ ފުރާޅާ ހަމައަށް އަލިފާން ވަނީ ފޯރާފައެވެ.
ފަރަންސޭސި ރައީސް އެމަނުއެލް މެކްރޮން ވިދާޅުވީ މިއީ "އިންތިހާއަށް ހިތްދަތި" ހާދިސާއެއް ކަމަށެވެ.
އޮފިޝަލުން ވިދާޅުވާ ގޮތުން މި ހާދިސާއަކީ އާބާތުރަ ފިލުވުމަށް ކުރެވެމުންދާ މަސައްކަތުގެ ތެރެެއިން ހިނގާފައިވާ ކަމެއް ކަމަށް ވުން ގާތެވެ. ނަސޯރާ ދީނުގެ މި ފައްޅީގެ މަރާމާތުގެ މަސައްކަތްތަކެއް ފެށީ އިމާރާތުން ރެނދެއް ފެނުމުން އިމާރާތް ހެލެން ފަށާފާނެކަމުގެ ބިރަށެވެ.
މި ހާދިސާގައި އަލިފާން ނިއްވުމުގެ މަސައްކަތްކުރި މީހަކަށް ސީރިއަސް ހާނީއްކަތަކެއް ވެފައިވާ ކަމަށް އޮފިޝަލުން ބުނެއެވެ.
ފަަރަންސޭސި ޕްރޮސިކިއުޓަރުން ބުނެފައި ވަނީ "އަލިފާނުގެ ހާދިސާގެ" ތަހުގީގެއް ފަށާފައެވެ.
