އިސްލާމްދީނާއި ދިވެހި ގައުމަށް ޚިދުމަތްކުރުމުގެ ހަމައެކަނި މަގަކީ ހަނގުރާމަވެރިކަމެއް ނޫން: ޝެއިޚް އިމްރާން
14 އެޕްރީލު 2019 | އާދީއްތަ 06:10ކޮންމެ މީހަކު އެ މީހެއްގެ ޤައުމީ ގޮތުން ނަގަންޖެހޭ ޒިންމާއަކީ ކޮބައިތޯ ވިސްނާ ފިކުރުކޮށްލަންޖެހޭ
މިނިސްޓަރ އޮފް ހޯމްއެފެއާރޒް އިމްރާން ޢަބްދުﷲ
އިސްލާމްދީނާއި ދިވެހި ގައުމަށް ޚިދުމަތްކުރުމުގެ ހަމައެކަނި މަގަކީ ހަނގުރާމަވެރިކަން ކަމުގައި ދެކުމަކީ އެންމެ ބުއްދިވެރި ގޮތް ނޫން ކަމަށް މިނިސްޓަރ އޮފް ހޯމްއެފެއާރޒް އިމްރާން ޢަބްދުﷲ ވިދާޅުވެއްޖެއެވެ.
ޝަހީދުންގެ ދުވަހުގެ މުނާސަބާ ފާހަގަކުރުމަށް ހޮނިހިރު ދުވަހުގެ ރޭ ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން އިމްރާން ވިދާޅުވީ ބަވަނަވެފައިވާ ދުނިޔޭގައި ޤައުމުތައް އެއްބަޔަކު އަނެއް ބަޔަކަށް ވާދަކޮށް އެއްބަޔަކު އަނެއް ބައެއްގެ މައްޗަށް ގަދަވެގަންނަން މަސައްކަތްކުރަމުންދާ ހިނދު، މިންކުރެވޭ ހަމައެކަނި ގޮތަކީ އަސްކަރީ ބާރުތައް ނޫން ކަމަށެވެ. ތަފާތު އިޤްތިޞާދީ ބާރުތަކާއި އެހެނިހެން ވަޞީލަތްތަކުން ވާދަކުރަމުންދާ ހިނދު ދައުރު ފުރިހަމައަށް އަދާކުރުމާ މެދު ވިސްނަންޖެހޭ ކަމަށް އިމްރާން ވިދާޅުވިއެވެ. އިޤްޠިޞާދީ ބާރުތަކާއި އެހެނިހެން ބާރުތަކުން ދުނިޔޭގެ މައްޗަށް ގަދަވެގަންނަން މަސައްކަތްކުރަމުންދާ ހިނދު ހަމައެކަނި ގަދަވާންޖެހެނީ އަސްކަރީބާރުން ކަމަށް ދެކި، ޤައުމާއި ދީނުގެ ހިމާޔަތުގައި ކުރަންޖެހޭ ކަމަކީ ހަމައެކަނި ހަނގުރާމަކުރުންކަމުގައި ދެކުމަކީ އެންމެ ބުއްދިވެރިގޮތް ނޫން ކަމަށް އެމަނިކުފާނު ވިދާޅުވިއެވެ.
"އަޅުގަނޑުމެންގެ ޤައުމާއި ވަޠަނަށްޓަކައި އަޅުގަނޑުމެން އަދާކުރަންޖެހޭ ދައުރަކީ ކޮބައިތޯ. ކޮންމެ މީހަކު އެމީހެއްގެ ޤައުމީގޮތުން ނަގަންޖެހޭ ޒިންމާއަކީ ކޮބައިތޯ ވިސްނާ ފިކުރުކޮށްލަންޖެހޭ،" އިމްރާން ވިދާޅުވިއެވެ.
އިމްރާން ވިދާޅުވީ ޤައުމަށްޓަކައި ތެދުވަންޖެހޭ ކިތަންމެ މައިދާންތަކެއް އެބަހުރި ކަމަށެވެ. އެގޮތުން ޝަހީދުންގެ އެންމެ އިއްޒަތްތެރި ހަމްޒަތު ބުނު ޢަބުދުލް މުއްޠަލިބް އާއި މިފާހަގަކުރެވޭ އަލިރަސްގެފާން ފަދަ ބޭފުޅުންގެ ވަރުގަދަ ހިތްވަރުން ހިތްވަރު ލިބިގަންނަންޖެހޭ ކަމަށެވެ. އެ ބޭފުޅުން ފަދަ ވަރުގަދަ އަޒުމަކާއި ކެރުންތެރިކަން ހުރި ބަޔަކަށް ވާންޖެހޭ ކަމަށް ވެސް އިމްރާން ވިދާޅުވިއެވެ.
އިމްރާންގެ ވާހަކަފުޅުގައި ވަނީ އިސްލާމީ ތާރީޚުން ވެސް ގިނަ މިސާލުތަކެއް ނަންގަވާފައެވެ. އަދި އެފަދަ އެތައް ބަޔަކު އެބަތިބިކަން ފާހަގަކުރައްވާ، އެފަދަ ބަޔަކަށް އެންމެން ވެސް ވުމަށް އިލްތިމާސްކުރެއްވިއެވެ.
