ދ. އަތޮޅު ތައުލީމީ މަރުކަޒުގެ ދަރިވަރުން ހުށަހެޅި ޑްރާމާއަށް ތައުރީފް އޮހެނީ!
13 އެޕްރީލު 2019 | ހޮނިހިރު 16:52މިިއީ އޯޓިޒަމަށް ހޭލުންތެރިކަން އިތުރުކުރުމަށް ހުށަހެޅި ޑްރާމާއެއް
ދ. އަތޮޅު ތައުލީމީ މަރުކަޒުގެ ދަރިވަރުން ހުށަހެޅި ޑްރާމާގެ ތެރެއިން
ބައިނަލްއަގުވާމީ ގޮތުން ފާހަގަ ކުރާ އޯޓިޒަމް ދުވަހާ ގުޅިގެން ދ. އަތޮޅު ތަޢުލީމީ މަރުކަޒުގެ ދަރިވަރުން ހުށަހެޅި ޑްރާމާއަށް ގިނަ ބަޔަކު ތައުރީފްކުރަން ފަށައިފިއެވެ.
މިިޑްރާމާ މިހާތަނަށް ވިހި ހާހާއި ގާތްކުރާ އަދަކަކަށް ފޭސްބުކް މެދުވެރިކޮށް ބަލާފައިވާއިރު ގިނަ ބަޔަކު ވަނީ މިއީ ވަރަށް އަސަރުން ފުރިގެންވާ ޑްރާމާއެއް ކަމަށް ބުނެފައެވެ. ތަފާތު މޮޅު ޑްރާމާއެއްގެ ގޮތުގައި ގިނަ ބަޔަކު ސިފަކުރި މިޑްރާމާއިން ދައްކުވައިދެނީ ސްކޫލު މާހައުލުން އޯޓިޒަމް ކުއްޖަކަށް ދިމާވާ ކަންކަމާއި އެކަންކަން ހައްލު ކުރާނެ ގޮތްތަކެވެ.
އެގޮތުން އޯޓިޒަމް ކުއްޖަކު ލިޔެފައިވާ އެއްޗެއް ކިޔަން ނޭނގި ގިނަ އިރުތަކެއްވާން ފެށުމުން، އެކުއްޖާއަށް މަލާމާތްކުރުމަށް ފަހު އެހެން ކުދިން ހޭތަން ފެންނައިރު މިކަން ހައްލުކުރުމަށް ދެން ފެނިގެންދަނީ ޓީޗަރަކު އައިސް އެ ކުއްޖާއަށް އެހީތެރިވެދޭތަނެވެ. މިކަހަލަ ތަފާތު ގިނަ މައްސަލަތަކުގެ މައްޗަށް އަލިއަޅުވާލާ ތައްޔާރުކޮށްފައިވާ މިޑްރާމާއަކީ ސޯޅަ މިނިޓްގެ ދިގު ޑްރާމާއެކެވެ. ރަހަ ތަފާތު ކުރުމުގެ ގޮތުން ރައިވަރުގެ ބައިތައް ވެސް މިޑްރާމާގައި ހިމަނާފައިވެއެވެ.
ދ. އަތޮޅު ތަޢުލީމީ މަރުކަޒުގެ އިކޮނޮމިކްސް ޓީޗަރ ޢާލިމް މުޙައްމަދު އެކުލަވާލާފައިވާ މިކޮންސެޕްޓުގެ ފުރިހަމަ ބައިތައް މަންޒަރާއި އެކު ގެނެސްދީފައިވަނީ ދ.އަތޮޅު ތައުލީމީ މަރުކަޒުގެ ސެކަންޑްރީ ކުދިންނެވެ. ރާއްޖެއެމްވީއާއި ވާހަކަދައްކަމުން އާލިމް ވިދާޅުވީ މިފަދަ ކޮންސެޕްޓެއް އެކުލަވާލަން އެހާ ފަސޭހަވީ އޭނާގެ، 8 އަހަރުގެ ދަރިފުޅަކީ އޯޓިޒަމް ކުއްޖެއް ކަމަށް ވުމުން ކަމަށެވެ. އަދި މިޑްރާމާ ގެނެސްދިނުމުގައި އޭނާގެ ދަރިފުޅުގެ އުޅުމަށް ބަލައިގެން ވަރަށް ގިނަ ބައިތައް ހިމަނާފައިވާނެ ކަމަށެވެ. އަދި ފޭސްބުކް މެދުވެރިކޮށް ގިނަ ފަރާތްތަކަށް މި މެސެޖް ފޯރުކޮށްދެވިފައިވާތީއާއި ގިނަ ބަޔަކު މިކަން ބަލައިގެންފައިވާތީ ވަރަށް އުފާކުރާ ކަމަށް އާލިމް ވިދާޅުވިއެވެ.
ދ.އަތޮޅު ތައުލީމީ މަރުކަޒުގެ ދަރިވަރުން ފާހަގަކުރެވިފައިވަނީ ވަރަށް ހަރަކާތްރި ތައުލީމީ ކުދިންތަކެއްގެ ގޮތުގައެވެ.
